Tovuti Rasmi ya Rais

Rais wa Jamhuri ya Muungano wa Tanzania Mhe. Dkt. John Pombe Magufuli na Mkewe Mhe. Mama Janeth Magufuli tarehe 17 Desemba, 2017 wameungana na waumini wa Kanisa Kuu la Mtakatifu Paulo wa Msalaba, Jimbo Kuu Katoliki la Dodoma kusali ibada ya Jumapili.

Akizungumza baada ya Ibada hiyo Mhe. Rais Magufuli amewashukuru viongozi wote wa dini na waumini wa madhehebu mbalimbali ya dini kwa kuendelea kuliombea Taifa ili lidumishe amani na upendo.

Mhe. Rais Magufuli amesema Serikali anayoiongoza inatambua juhudi zinazofanywa na viongozi wa Dini katika kudumisha amani na upendo na ameahidi kuwa itaendelea kushirikiana nao katika kujenga Tanzania bora.

“Nawaomba viongozi wa madhehebu yote ya dini tuendelee kuliombea Taifa letu liwe na amani na upendo, na Serikali itashirikiana nanyi muda wote” amesema Mhe. Rais Magufuli.

Padre wa kanisa hilo Fr. Sergio Madinda amemshukuru Mhe. Rais kwa ushirikiano wake na kanisa na pia amemshukuru kwa uamuzi wake wa kuhamishia Serikali Dodoma.

Katika Ibada hiyo Mhe. Rais Magufuli ametoa Shilingi Milioni 3 kwa ajili ya kuchangia ujenzi wa Kigango cha Michese na kwaya ya Kanisa Kuu la Mtakatifu Paulo wa Msalaba.

Gerson Msigwa

Mkurugenzi wa Mawasiliano ya Rais, IKULU

Dodoma

17 Desemba, 2017 

Rais wa Jamhuri ya Muungano wa Tanzania Mhe. Dkt. John Pombe Magufuli amewahakikishia Walimu wote nchini kuwa Serikali ipo tayari kulipa madeni ya Walimu baada ya madeni hayo kuhakikiwa.

Mhe. Rais Magufuli ameyasema hayo tarehe 14 Desemba, 2017 katika ukumbi wa Chimwaga Mjini Dodoma wakati akifungua Mkutano Mkuu wa Chama cha Walimu Tanzania (CWT).

Pamoja na kulipa madeni ya walimu Mhe. Rais Magufuli ameongeza kuwa Serikali inawajali walimu na ipo tayari kuboresha maslahi yao na kuboresha mazingira ya kazi kulingana na uwezo wake, na hivyo amewataka Watanzania wakiwemo walimu kuchapa kazi kwa juhudi na maarifa ili nchi iwe na fedha za kutosha kuongezea maslahi hayo.

Hata hivyo Mhe. Rais Magufuli ametoa wito kwa Walimu kuangalia upya matumizi ya michango ya asilimia 2 ya mshahara anayokatwa kila Mwalimu kila mwezi kwa ajili ya kuendesha CWT na amebainisha kuwa fedha zinazokusanywa ni nyingi na zingeweza kutumika kuwasaidia walimu badala ya kuwekezwa katika miradi ambayo haimsaidii Mwalimu.

Mhe. Rais Magufuli ametolea mfano wa mradi wa Benki ya Walimu ambao unasuasua na kuweka wazi kuwa mradi huo una dosari nyingi kulingana na taarifa za Benki Kuu ya Tanzania (BOT) ambayo ndio msimamizi mkuu wa benki hapa nchini.

Halikadhalika Mhe. Rais Magufuli amewatoa shaka Walimu wote juu ya mchakato wa kuunganishwa kwa mifuko ya hifadhi ya jamii na kufafanua kuwa michango yao ipo salama, na mafao yao watayapata kama kawaida na kwamba Serikali inakusudia kuunganisha mifuko yote inayowahudumia watumishi wa umma na kuwa mfuko mmoja, na wafanyakazi wa sekta binafsi kuunganishwa katika mfuko mmoja ili kuongeza tija.

Aidha, Mhe. Rais Magufuli ametoa wito kwa CWT kutojiingiza katika masuala ya kisiasa na badala yake ijikite kupigania maslahi na ustawi wa Walimu, pamoja na kusimamia wajibu wa Walimu.

“Kuna wakati hiki Chama cha Walimu kiligeuzwa kama chama cha siasa, msikubali kwenda kwa mwelekeo huo, hiki ni chombo muhimu ni lazima kiende katika mwelekeo mzuri wenye manufaa, na mimi nataka kuwahakikishia kuwa nawapenda sana Walimu, mimi mwenyewe nilikuwa Mwalimu nafahamu kila kitu kuhusu Ualimu” amesisitiza Mhe. Rais Magufuli.

Mhe. Rais Magufuli pia ametaka CWT ijiepushe na vitendo vya rushwa katika uchaguzi na kuonya kuwa vyombo vya dola vipo macho kufuatilia na kuchukua hatua dhidi ya wote wanaojihusisha na rushwa.

Kuhusu uhaba wa walimu wa masomo ya sayansi Mhe. Rais Magufuli amesema Serikali inaendelea kuchukua hatua za kukabiliana na changamoto hiyo na ameonya kuwa walimu ambao wamekuwa wakikataa kuripoti katika vituo vya kazi wanavyopangiwa Serikali itawafuta kazi.

Wakati huo huo, Mhe. Rais Magufuli ameendesha harambee ya kuchangisha fedha na kufanikiwa kukusanya Shilingi Milioni 60 za papo kwa papo ambazo wajumbe wa Mkutano huo pamoja na wanafunzi walioalikwa watagawiwa kama posho.

Katika mkutano huo Mhe. Rais Magufuli ameongozana na Waziri Mkuu Mhe. Kassim Majaliwa Majaliwa, Mawaziri na viongozi mbalimbali wa Serikali.

Gerson Msigwa

Mkurugenzi wa Mawasiliano ya Rais, IKULU

Dodoma

14 Desemba, 2017

Rais wa Jamhuri ya Muungano wa Tanzania Mhe. Dkt. John Pombe Magufuli ameiagiza bodi na menejimenti ya Shirika la Nyumba la Taifa (NHC) kujirekebisha kwa kuondokana na matumizi mabaya ya fedha na kuwasilisha upya ombi lake la kutaka kibali cha kukopa fedha kwa ajili ya kumalizia miradi yake ya ujenzi iliyokwama kutokana na ukosefu wa fedha.

Mhe. Rais Magufuli ametoa agizo hilo leo tarehe 13 Desemba, 2017 katika sherehe ya uzinduzi wa mradi wa ujenzi wa nyumba za makazi wa Iyumbu Mjini Dodoma baada ya Mkurugenzi Mkuu wa NHC Bw. Neemia Mchechu kuomba Serikali itoe kibali kwa NHC kukopa Shilingi Bilioni 232 kwa ajili ya kumalizia miradi minne mikubwa ya ujenzi wa majengo iliyopo Jijini Dar es Salaam.

Pamoja na agizo hili Mhe. Rais Magufuli pia amemtaka Waziri wa Ardhi, Nyumba na Maendeleo ya Makazi Mhe. William Lukuvi na Bodi ya NHC kuchukua hatua dhidi ya migogoro iliyopo ndani ya shirika hilo ikiwa ni pamoja na kuwaondoa watendaji wanaoleta chokochoko.

Hata hivyo Mhe. Rais Magufuli amempongeza Mkurugenzi Mkuu wa NHC Bw. Neemia Mchechu na wafanyakazi wa NHC kwa kazi nzuri wanazofanya ikiwemo ujenzi wa nyumba katika maeneo mbalimbali nchini na kuongeza ukusanyaji wa mapato kutoka Bilioni 34 hadi 154.

“Mambo mengi mnafanya vizuri, naifahamu NHC najua mmepiga hatua kubwa ya kujenga nyumba sehemu mbalimbali, lakini jirekebisheni kwenye matumizi ya fedha, nataka Waziri Lukuvi ukakae na bodi ya NHC na Mkurugenzi Mkuu mfanye tathmini na mniletee maelezo ya namna mtakavyozirudisha hizo Shilingi bilioni 232 mtakazokopa, nikipata maelezo vizuri nitatoa maelekezo Wizara ya Fedha na Mipango iwape kibali” amesisitiza Mhe. Rais Magufuli.

Mapema akitoa maelezo ya mradi huo, Mkurugenzi Mkuu wa NHC Bw. Neemia Mchechu amesema katika awamu ya kwanza mradi wa makazi wa Iyumbu unajenga nyumba 300, ambapo 150 zimekamilika na zimeshanunuliwa na nyingine 150 ujenzi wake umeanza.

Waziri wa Ardhi, Nyumba na Maendeleo ya Makazi Mhe. William Lukuvi amemshukuru Mhe. Rais Magufuli kwa kuanzisha ujenzi wa nyumba za makazi Dodoma hata kabla ya mradi wa Iyumbu na amebainisha kuwa ili kuwafikia Watanzania wengi ameshatoa maelekezo kwa NHC kuachana na ujenzi wa majengo marefu na badala yake kujielekeza katika ujenzi wa nyumba za kawaida zitakazouzwa kwa gharama nafuu.

Wakati huo huo, Mhe. Rais Magufuli ameufuta mpango wa kuwepo eneo la makaburi ya viongozi na kuagiza eneo lenye ukubwa wa ekari 129 katika kata ya Iyumbu lililochukuliwa na Serikali lirudishwe kwa wananchi na waruhusiwe kulitumia kwa shughuli zao.

Mhe. Rais Magufuli pia ametaka mchakato wa kubadili sheria ya makaburi ya viongozi wa kitaifa ufanye kwa kuwa amejiridhisha kuwa viongozi wote hawana nia ya kuzikwa katika eneo hilo.

Sherehe za uzinduzi wa mradi wa ujenzi wa makazi wa Iyumbu Mjini Dodoma umehudhuriwa na Spika wa Bunge Mhe. Job Yustino Ndugai, Naibu Spika Dkt. Tulia Ackson, Mawaziri na Naibu Mawaziri na Viongozi wa Mkoa wa Dodoma.

Gerson Msigwa

Mkurugenzi wa Mawasiliano ya Rais, IKULU

Dodoma

13 Desemba, 2017

Rais wa Jamhuri ya Muungano wa Tanzania Mhe. Dkt. John Pombe Magufuli ameitaka Benki Kuu ya Tanzania (BOT) kudhibiti matumizi ya fedha za kigeni katika biashara na huduma hapa nchini ili kulinda nguvu ya fedha ya Tanzania na kukabiliana na uhalifu wa kifedha.

Mhe. Magufuli ametoa agizo hilo tarehe 13 Desemba, 2017 wakati akifungua tawi la benki ya CRDB-LAPF Dodoma na kubainisha kuwa hatua hiyo itasaidia kuimarisha uchumi wa nchi.

Aidha, Mhe. Rais Magufuli ameitaka BOT kuongeza usimamizi wa benki zinazoendesha shughuli zake hapa nchini ikiwa ni pamoja na kuhakikisha zinajiunga na mfumo wa ukusanyaji mapato kwa njia ya kielektroniki na kufuatilia kwa ukaribu utendaji wake wa kila siku ili ziwe na manufaa kwa nchi.

“Hivi sasa kuna benki 58 hapa Tanzania, BOT ni lazima mzifuatilie kwa ukaribu benki hizi, na zile zisizofanya vizuri chukueni hatua mara moja, ni bora tubakiwe na benki chache kuliko kuwa na benki nyingi zinazofanya vibaya”

“Pia nataka mdhibiti matumizi ya Dola, hivi navyozungumza kuna Dola Milioni 1 zimekamatwa uwanja wa ndege wa kimataifa wa Julius Nyerere Jijini  m.caDar es Salaam, hakuna maelezo yoyote juu ya kuingia fedha hizo, ni lazima tuwe makini” amesisitiza Mhe. Rais Magufuli.

Mhe. Rais Magufuli ameipongeza benki ya CRDB kwa kuendeshwa kwa ufanisi tangu ilipobinafsishwa kutoka Serikalini ambapo katika kipindi cha miaka 10 imelipa kodi serikalini kiasi cha Shilingi Bilioni 800, imetoa ajira kwa Watanzania 3,200, imetoa gawio Serikalini la Shilingi Bilioni 19.5 mwaka huu na imetoa mikopo yenye thamani ya Shilingi Trilioni 3.5 ambapo Shilingi Trilioni 1 kati yake zimeelekezwa katika sekta ya viwanda na kilimo.

Kuhusu kupungua kwa kasi ya ukuaji wa mikopo kwa sekta binafsi Mhe. Rais Magufuli amesema Serikali imechukua hatua mbalimbali zitakazoongeza kasi hiyo zikiwemo kupunguza kiwango cha kisheria cha sehemu ya amana za benki za biashara kinachotakiwa kuwekwa Benki Kuu kutoka asilimi 10 hadi 8, kushusha riba ya Benki Kuu mara mbili kutoka asilimia 16 hadi 9, kutoa mikopo maalum kwa benki za biashara, pamoja na Benki Kuu kununua fedha za kigeni kwenye soko la jumla la benki ili kuongeza ukwasi wa shilingi kwenye uchumi.

“Kutokana na hatua hizi nimeambiwa kuwa hali ya ukwasi imeanza kuimarika na kusaidia kupunguza riba katika soko la fedha baina ya benki (IBCM rate) kutoka asilimia 13.69 Desemba 2016 hadi kufikia asilimia 3.29 Novemba 2017, pia riba katika soko la dhamana za Serikali zimepungua kutoka wastani wa asilimia 15.12 hadi 8.76 katika kipindi hicho” amebainisha Mhe. Rais Magufuli.

Mhe. Rais Magufuli ametoa wito kwa benki zote nchini kuanzisha matawi ya benki vijijini na kuwakopesha wajasiriamali ili waweze kuongeza uzalishaji hasa kilimo na viwanda, na pia ametaka wananchi wanaopata mikopo wazingatie kurejesha.

Mapema katika maelezo yake Mkurugenzi Mtendaji wa CRDB Dkt. Charles Kimei amempongeza Mhe. Raia Magufuli kwa juhudi kubwa za kuimarisha uchumi zikiwemo ujenzi wa viwanda, ununuzi wa ndege, ujenzi wa reli ya kisasa (SGR), ujenzi wa barabara za juu (Flyover) na ameahidi kuwa CRDB yenye matawi 469 na wateja 3,500,000 ikiwa ndio benki inayoongoza kwa mtandao mkubwa nchini, itaendelea kushirikiana na Serikali katika kuwawezesha wajasiriamali na uwekezaji katika viwanda na kilimo.

Dkt. Charles Kimei na Mwenyekiti wa Bodi ya CRDB Bw. Ally Laay wamekabidhi hundi ya Shilingi Milioni 100 kwa Mhe. Rais Magufuli kwa ajili ya kuchangia huduma za kijamii, na Mhe. Rais Magufuli amekabidhi hundi hiyo kwa Mkuu wa Mkoa wa Dodoma Dkt. Binilith Satano Mahenge kwa ajili ya ujenzi wa wodi katika hospitali ya Mkoa Dodoma.

Ufunguzi wa tawi la CRDB LAPF Dodoma umehudhuriwa na Mke wa Rais Mhe. Mama Janeth Magufuli, Spika wa Bunge Mhe. Job Yustino Ndugai, Naibu Spika Dkt. Tulia Ackson, Waziri Mkuu Mstaafu Mhe. John Samwel Malecela na Waziri wa Fedha na Mipango Mhe. Philip Isdor Mpango.

Gerson Msigwa

Mkurugenzi wa Mawasiliano ya Rais, IKULU

Dodoma

13 Desemba, 2017 

Rais wa Jamhuri ya Muungano wa Tanzania Mhe. Dkt. John Pombe Magufuli  tarehe 10 Desemba, 2017 ametia saini nyaraka za msamaha alioutoa jana kwa wafungwa 61 waliohukumiwa kunyongwa hadi kufa na wawili Nguza Viking (Babu Seya) na Johnson Nguza (Papii Kocha) waliohukumiwa kifungo cha maisha jela.

Mhe. Rais Magufuli ametia saini nyaraka hizo Ikulu ya Chamwino Mkoani Dodoma na kuwapongeza Jeshi la Magereza kwa kazi nzuri wanayoifanya kurekebisha tabia za wafungwa wa makosa mbalimbali.

Mhe. Rais Magufuli amesisitiza kuwa pamoja na kutolewa kwa msamaha huo, vyombo vya dola viendelee kusimamia sheria, na kwa Jeshi la Magereza amelitaka kuhakikisha linawatumia wafungwa kuzalisha mali ikiwemo kuzalisha mazao ya kilimo na kufanya kazi za ujenzi.

“Nimeona nitumie kifungu hiki cha Katiba (Ibara ya 45 {1}) ambacho nilipewa na Watanzania, ingawa kilikuwa hakijawahi kutumika, unajua mtu ambaye alihukumiwa kunyongwa halafu baadaye anaachiwa, ni kitu kinashangaza kwa sababu hakijawahi kutokea, lakini nimeona nifanye hivyo kwa ajili ya Watanzania”

“Mimi nikuombe tu, muendelee kusimamia wajibu wenu na kusimamia sheria, mtu anayehukumiwa kufungwa afungwe kweli, na nilishatoa wito kwa magereza, pasiwepo wafungwa wa kukaa tu na kupumzika, wafanye kazi, kufungwa sio kustarehe” Amesisitiza Mhe. Rais Magufuli.

Kwa upande wake Kamishna Jenerali wa Magereza Dkt. Juma Malewa amemshukuru Mhe. Rais Magufuli kwa kutoa msamaha huo wa kihistoria na kubainisha kuwa wafungwa na Maafisa Magereza wameipongeza hatua hiyo, ambayo itasaidia kuwatia moyo wafungwa wanaorekebishwa tabia katika magereza mbalimbali nchini.

Kamishna Jenerali Malewa amesema wafungwa waliopatiwa msamaha wa kuachiwa huru, waliruhusiwa kutoka magerezani tangu jana na Maafisa Magereza wamewaasa kwenda kuonesha mfano bora kwenye jamii watakakwenda kuishi.

Katika hatua nyingine Mhe. Rais Magufuli amelipongeza Jeshi la Magereza kwa kutekeleza agizo lake la kutengeneza viatu kwa ajili ya askari wake badala ya kuagiza kutoka nje ya nchi.

Jeshi la Magereza linazalisha jozi 150 za viatu kwa siku katika kiwanda chake cha Karanga kilichopo Moshi Mkoani Kilimanjaro, na kwa kushirikiana na mfuko wa hifadhi ya jamii wa PPF limeanza kuboresha kiwanda hicho ili kufikia uzalishaji wa jozi 450 kwa siku.

Gerson Msigwa

Mkurugenzi wa Mawasiliano ya Rais, IKULU

Chamwino, Dodoma

10 Desemba, 2017

Rais wa Jamhuri ya Muungano wa Tanzania Mhe. Dkt. John Pombe Magufuli tarehe 09 Desemba, 2017 amewaongoza Watanzania kusherehekea maadhimisho ya miaka 56 ya Uhuru wa Tanzania Bara katika uwanja wa Jamhuri Mjini Dodoma.

Sherehe hizo zimehudhuriwa na Rais wa Zanzibar na Mwenyekiti wa Baraza la Mapinduzi Mhe. Dkt. Ali Mohamed Shein, Makamu wa Rais wa Jamhuri ya Muungano wa Tanzania Mhe. Samia Suluhu Hassan, Waziri Mkuu Mhe. Kassim Majaliwa Majaliwa, Makamu wa Pili wa Rais wa Zanzibar Mhe. Balozi Seif Ali Idd, Spika wa Bunge la Jamhuri ya Muungano wa Tanzania Mhe. Job Yustino Ndugai, Spika wa Baraza la Wawakilishi Mhe. Zubeir Ali Maulid, Jaji Mkuu wa Tanzania Mhe. Prof. Ibrahim Hamis Juma, Spika wa Bunge wa Bunge la Morocco Mhe. Hakim Benchamach, Marais wastaafu wa Jamhuri ya Muungano wa Tanzania na viongozi wengine wastaafu na wanaoongoza taasisi mbalimbali.

Pamoja na kukagua gwaride rasmi na kupigiwa mizinga 21 kwa heshima yake, Mhe. Rais Magufuli, viongozi mbalimbali na wananchi wameshuhudia maonesho mbalimbali yaliyofanywa na kikundi cha komandoo, askari wa kupambana na ugaidi, ndege za kivita, gwaride la wanafunzi, ngoma za asili, kwaya na muziki wa wasanii wa kizazi kipya (Bongo Fleva) walioimba wimbo maalum wa uzalendo kwa Tanzania.

Akizungumza katika sherehe hizo Mhe. Rais Magufuli ametoa msamaha kwa wafungwa 8,157 ambao ni sehemu ya wafungwa wote 39,000 waliopo magerezani wakitumikia vifungo mbalimbali.

Kati ya wafungwa hao, 6,329 wamepunguziwa adhabu na 1,828 wameachiwa huru kuanzia leo wakiwemo 61 waliohukumiwa kunyongwa na waliokuwa wakitumikia vifungo vya maisha, na amewataja miongoni mwao kuwa ni Mganga Matonya aliyefungwa gerezani kwa miaka 44 na mwenye umri wa miaka 85, wanamuziki Nguza Viking (Babu Seya) na mwanae Johnson Nguza (Papii Kocha)

“Nawapa msamaha wafungwa hawa kwa mujibu wa ibara ya 45 ibara ndogo ya 1 ya Katiba ya Jamhuri ya Muungano wa Tanzania inayonipa mamlaka hayo, nimeamua kufanya hivi kwa sababu baadhi ya wafungwa wanaotumikia vifungo vya maisha ni wazee sana na wangine wameonesha mwenendo mzuri wa kitabia wakiwa gerezani”

“Na hawa niliowapa msamaha sio wale waliojihusisha na mauaji ya watu wenye ualbino na waliofungwa kwa kuhusika katika ujambazi” amesema Mhe. Rais Magufuli.

Hata hivyo Mhe. Rais Magufuli ameonya kuwa msahama alioutoa usitafsiriwe kwa kuhalalisha watu kujihusisha katika uhalifu na amesisitiza kuwa vyombo vya dola vitaendelea kusimamia sheria.

Mhe. Rais Magufuli amewapongeza Watanzania wote kwa kufikisha miaka 56 ya Uhuru na kubainisha kuwa katika kipindi hicho nchi imepiga hatua kubwa katika maendeleo ikiwemo kuongezeka mtandao wa barabara kutoka kilometa 33,600 hadi kufikia kilometa 150,946, kati yake kilometa za lami zikiwa zimeongezeka kutoka 1,360 hadi 12,679.55.

Aidha, ameongeza kuwa Wakala wa barabara nchini (TANROADS) inaendelea na ujenzi wa barabara nyingine za lami zenye kilometa 2,480 na barabara nyingine za lami zenye urefu wa kilometa 7,087 zipo katika maandalizi ya kuanza ujenzi.

Maeneo mengine ambayo Tanzania imepiga hatua ni kuongezeka kwa shule za msingi kutoka 3,100 hadi 17,379, shule za sekondari kutoka 41 hadi 4,817, vyuo vikuu kutoka 1 hadi 48, Madaktari waliosajiliwa kutoka 403 hadi 9,343, Wahandisi waliosajiliwa kutoka 2 hadi 19,164 na Wakandarasi kutoka 2 hadi 9,350.

“Kwa hiyo ndugu zangu tumepiga hatua kubwa sana, hata wastani wa maisha yetu umepanda kutoka miaka 37 hadi 61 na pia idadi yetu imeongeza kutoka watu Milioni 9 hadi Milioni 52” amesisitiza Mhe. Rais Magufuli.

Gerson Msigwa

Mkurugenzi wa Mawasiliano ya Rais, IKULU

Dodoma

09 Desemba, 2017

Rais wa Jamhuri ya Muungano wa Tanzania na Amiri Jeshi Mkuu Mhe. Dkt. John Pombe Magufuli amepokea kwa mshtuko na masikitiko makubwa taarifa za kuuawa kwa askari 14 wa Jeshi la Ulinzi la Wananchi wa Tanzania (JWTZ) waliopo katika operesheni ya ulinzi wa amani katika Jamhuri ya Kidemokrasia ya Kongo (DRC).

Pamoja na askari hao kuuawa, askari wengine 44 wamejeruhiwa na 2 hawajulikani walipo.

Kufuatia vifo hivyo Mhe. Dkt. Magufuli amemtumia salamu za rambirambi Waziri wa Ulinzi na Jeshi la Kujenga Taifa Dkt. Hussein Ali Mwinyi, Mkuu wa Majeshi ya Ulinzi Jen. Venance Salvatory Mabeyo, Maafisa na Askari wa wote JWTZ, familia za marehemu na Watanzania wote kwa kuwapoteza mashujaa waliokuwa wakitekeleza wajibu wao.

“Nimeshtushwa na kusikitishwa sana na vifo vya vijana wetu, askari shupavu na mashujaa waliopoteza maisha wakiwa katika majukumu ya kulinda amani kwa majirani zetu DRC” amesema Mhe. Dkt. Magufuli.

Amewaombea marehemu wote wapumzishwe mahali pema peponi, Amina.

Aidha, Mhe. Rais Magufuli amewataka Watanzania wote kuwa watulivu na kuwa na subira wakati Serikali ikiendelea kuchukua hatua zinazostahili baada ya kutokea tukio hilo, na pia amewaombea majeruhi wote wapone haraka ili waweze kuendelea na majukumu yao ya kawaida.

Gerson Msigwa

Mkurugenzi wa Mawasiliano ya Rais, IKULU

Chamwino, Dodoma

08 Desemba, 2017

Rais wa Jamhuri ya Muungano wa Tanzania Mhe. Dkt. John Pombe Magufuli  tarehe 07 Desemba, 2017 amekutana na kufanya mazungumzo na Jaji Mkuu wa Tanzania Mhe. Prof. Ibrahim Hamis Juma katika Ikulu ya Chamwino Mkoani Dodoma.

Baada ya mazungumzo hayo Mhe. Prof. Ibrahim Hamis Juma amesema Mhe. Rais Magufuli amemuahidi kuwa Serikali itatoa eneo kwa ajili ya ujenzi wa Mahakama Kuu Mkoani Dodoma na kwamba ujenzi wa majengo utaanza mwezi ujao.

Ameongeza kuwa ujenzi huo utakuwa ni wa Makao Makuu ya Mahakama na Mahakama ya Rufani, na pia utaambatana na ujenzi wa makazi ya Majaji.

Mhe. Prof. Ibrahim Hamis Juma ameongeza kuwa pamoja na kuanza kwa ujenzi huo Mkoani Dodoma Mahakama inaendelea na ujenzi wa majengo ya Mahakama Kuu katika Mikoa ya Mara, Kigoma, Morogoro na Singida.

Mhe. Prof. Ibrahim Hamis Juma amemshukuru Mhe. Rais Magufuli kwa ushirikiano wake kwa Mahakama na ameahidi kuwa Mahakama itaendelea kutekeleza majukumu yake kwa weledi na ufanisi zaidi ikiwemo kupunguza msongamano wa mashauri mahakamani.

Gerson Msigwa

Mkurugenzi wa Mawasiliano ya Rais, IKULU

Chamwino, Dodoma

07 Desemba, 2017

Rais wa Jamhuri ya Muungano wa Tanzania Mhe. Dkt. John Pombe Magufuli tarehe 07 Desemba, 2017 amewasili Mkoani Dodoma ambako pamoja na mambo mengine atakuwa mgeni rasmi katika sherehe za maadhimisho ya miaka 56 ya Uhuru zitakazofanyika katika uwanja wa Jamhuri Mjini Dodoma Jumamosi tarehe 09 Desemba, 2017.

Katika Ikulu ya Chamwino, Mhe. Rais Magufuli amepokelewa na Mkuu wa Mkoa wa Dodoma Dkt. Binilith Satano Mahenge.

Akiwa Mkoani Dodoma Mhe. Rais Magufuli ambaye ni Mwenyekiti wa Chama Cha Mapinduzi (CCM) atafungua vikao vya Jumuiya za CCM na pia atakuwa mgeni rasmi katika shughuli mbalimbali za kiserikali.

Mhe. Rais Magufuli ameongozana na Mkewe Mhe. Mama Janeth Magufuli.

Gerson Msigwa

Mkurugenzi wa Mawasiliano ya Rais, IKULU

Dar es Salaam

07 Desemba, 2017

“Jioni hii nimepokea kwa mshtuko na huzuni kubwa taarifa za kifo cha Mkuu wa Mkoa Mstaafu Dkt. Joel Nkaya Bendera, natoa pole kwa familia yake na wote walioguswa na msiba huu na pia naungana nao katika kipindi hiki cha majonzi”

Hii ni sehemu ya salamu za rambirambi za Rais wa Jamhuri ya Muungano wa Tanzania Mhe. Dkt. John Pombe Magufuli alizozitoa kufuatia kifo cha aliyekuwa Mkuu wa Mkoa wa Manyara Dkt. Joel Nkaya Bendera kilichotokea jioni ya leo tarehe 06 Desemba, 2017 katika Hospitali ya Taifa Muhimbili Jijini Dar es Salaam alikofikishwa kwa ajili ya kupata matibabu.

Mhe. Rais Magufuli amesema Dkt. Joel Bendera atakumbukwa kwa mchango wake mkubwa alioutoa kwa Taifa akiwa kiongozi katika nyadhifa mbalimbali zikiwemo Mkuu wa Mkoa wa Manyara, Naibu Waziri na Mbunge na pia kwa mchango wake mkubwa katika maendeleo ya michezo.

“Dkt. Joel Nkaya Bendera alikuwa kiongozi shupavu, mahiri na mchapakazi, alipenda kufanya kazi kwa ushirikiano na daima alitamani kupata mafanikio makubwa katika majukumu aliyokuwa nayo, hakika tutamkumbuka” amesisitiza Mhe. Rais Magufuli.

Pamoja na kutoa pole kwa familia ya marehemu, Mhe. Rais Magufuli amewapa pole wananchi wa Mkoa wa Manyara ambako alikuwa Mkuu wa Mkoa hadi tarehe 26 Oktoba, 2017, wananchi wa Mkoa wa Tanga ambako alikuwa Mbunge, wanachama wote wa Chama Cha Mapinduzi (CCM), Wanamichezo wote na wote walioguswa na msiba huu na amemuombea kwa Mwenyezi Mungu aipumzishe roho yake mahali pema peponi, Amina.

Gerson Msigwa

Mkurugenzi wa Mawasiliano ya Rais, IKULU

Dar es Salaam

06 Desemba, 2017

Rais wa Jamhuri ya Muungano wa Tanzania Mhe. Dkt. John Pombe Magufuli amefanya uteuzi wa wenyeviti wa bodi 6 za taasisi za Serikali baada ya wenyeviti waliokuwepo kumaliza muda wao.

Kwa mujibu wa taarifa iliyotolewa tarehe 06 Desemba, 2017 na Katibu Mkuu Kiongozi Balozi John Kijazi, Kwanza Mhe. Rais Magufuli amemteua Bi. Monica Ngenzi Mbega kuwa Mwenyekiti wa Bodi ya Mazao Mchanganyiko kuanzia tarehe 30 Novemba, 2017.

Pili, Mhe. Rais Magufuli amemteua Prof. Egid Beatus Mubofu kuwa Mwenyekiti wa Bodi ya Wakurugenzi wa Kampuni ya Mbolea Tanzania (TFC) kuanzia tarehe 01 Desemba, 2017.

Tatu, Mhe. Rais Magufuli amemteua Prof. Abiud Kaswamila kuwa Mwenyekiti wa Bodi ya Mamlaka ya Hifadhi ya Eneo la Ngorongoro kuanzia tarehe 01 Desemba, 2017.

Nne, Mhe. Rais Magufuli amemteua Prof. Esther Hellen Jason kuwa Mwenyekiti wa Bodi ya Mamlaka ya Maabara ya Mkemia Mkuu wa Serikali kuanzia tarehe 01 Desemba, 2017.

Tano, Mhe. Rais Magufuli amemteua Dkt. Kenneth Mdadila kuwa Mwenyekiti wa Bodi ya taasisi ya kifedha ya Self Microfinance Fund Limited kuanzia tarehe 01 Desemba, 2017.

Sita, Mhe. Rais Magufuli amemteua Dkt. Titus Mlengeya Dismas Kamani kuwa Mwenyekiti wa Tume ya Maendeleo ya Ushirika Tanzania kuanzia tarehe 06 Desemba, 2017.

Gerson Msigwa

Mkurugenzi wa Mawasiliano ya Rais, IKULU

Dar es Salaam

06 Desemba, 2017

Rais wa Jamhuri ya Muungano wa Tanzania Mhe. Dkt. John Pombe Magufuli amekutana na viongozi wa kampuni ya Total ambayo ni mwekezaji mkubwa wa mradi wa ujenzi wa bomba la mafuta ghafi la kutoka Hoima nchini Uganda hadi bandari ya Tanga nchini Tanzania na kuwahakikishia kuwa Tanzania itatoa ushirikiano wa kutosha kwa kampuni hiyo na washirika wengine katika ujenzi wa mradi huo.

Viongozi wa Total waliokutana na Mhe. Rais Magufuli tarehe 05 Desemba, 2017 Ikulu Jijini Dar es Salaam ni Rais wa masoko na huduma Bw. Momar Nguer, Rais wa Total Afrika Bw. Stanislas Mittelman, Makamu wa Rais wa Total wa Afrika ya Kati na Afrika Mashariki Bw. Jean Christian Bergeron na Mkurugenzi Mtendaji Total Tanzania Bw. Tarik Moufaddal.

Mhe. Rais Magufuli ameitaka Total kuharakisha ujenzi wa bomba hilo uliopangwa kuanza mwezi ujao na kukamilisha mapema hata kabla ya mwaka 2020 uliopangwa ili wananchi wa Tanzania na Uganda waanze kunufaika na mafuta hayo.

“Tuna matumaini makubwa na Total kuwa kazi hii mtaifanya haraka, na naomba niwahakikishie kuwa pamoja na soko la nje, kuna soko kubwa Afrika Mashariki yenye watu Milioni 165, na Serikali ya Tanzania itawapa ushirikiano wa kutosha wakati wote wa ujenzi na uendeshaji wa mradi ili mradi mnalipa kodi vizuri na mnazingatia sheria zetu” amesisitiza Mhe. Rais Magufuli.

Aidha, Mhe. Rais Magufuli ameitaka kampuni hiyo kuzingatia kutoa ajira kwa Watanzania katika wilaya 24 ambazo bomba litapita huku akiwahakikishia kuwa Tanzania inao wakandarasi na wahandisi wa kutosha na wenye uwezo wa kushirikiana nao katika ujenzi wa bomba hilo.

Baada ya mazungumzo hayo Waziri wa Nishati Dkt. Medard Kalemani na Waziri wa Viwanda, Biashara na Uwekezaji Bw. Charles Mwijage wamesema pamoja na kuja nchini kuangalia maandalizi ya ujenzi wa bomba, viongozi wa Total wameamua kuimarisha soko la mafuta Tanzania na pia kushirikiana na Serikali katika utafiti wa mafuta katika maeneo ya Ziwa Tanganyika, Eyasi Wembere na Ziwa Rukwa.

Kwa upande wake Bw. Momar Nguer amemshukuru Mhe. Rais Magufuli na Rais wa Jamhuri ya Uganda Mhe. Yoweri Kaguta Museveni kwa msukumo mkubwa walioutoa katika kufanikisha mradi huu na ameahidi kuwa Total itahakikisha inakamilisha haraka mambo machache yaliyobaki ili kuanza ujenzi bila kuchelewa.

Bw. Momar Nguer amempongeza Mhe. Rais Magufuli kwa juhudi zake za kupambana na rushwa jambo lililosaidia kuimarisha mazingira ya uwekezaji na amemuhakikishia kuwa Total ipo tayari kufanya kazi bega kwa bega na Tanzania katika jukumu la utafiti wa mafuta katika maeneo yote yaliyotajwa.

Wakati huo huo, Mhe. Rais Magufuli ameagana na Balozi wa Umoja wa Falme za Kiarabu (UAE) aliyemaliza muda wake Mhe. Abdulla Ibrahim Alsiwaidi, Ikulu Jijini Dar es Salaam.

Mhe. Rais Magufuli amemshukuru Mhe. Abdulla Ibrahim Alsiwaidi kwa utumishi wake wa miaka 5 na amemuomba amfikishie salamu za shukrani kwa Rais wa UAE Mtukufu Sheikh Khalifa bin Zayed Al Nahyan kwa ushirikiano ambao Tanzania inaupata katika Nyanja mbalimbali za maendeleo na ustawi wa jamii.

Gerson Msigwa

Mkurugenzi wa Mawasiliano ya Rais, IKULU

Dar es Salaam

05 Desemba, 2017

Mwakilishi wa Benki ya Dunia katika nchi za Tanzania, Burundi, Malawi na Somalia Bi. Bella Bird amemhakikishia Rais wa Jamhuri ya Muungano wa Tanzania Mhe. Dkt. John Pombe Magufuli kuwa benki hiyo imejipanga kuendelea kutoa mikopo nafuu kwa miradi mbalimbali ya maendeleo hapa nchini ili kukuza uchumi na kupunguza umasikini.

Bi. Bella Bird ametoa kauli hiyo  tarehe 04 Desemba, 2017 Ikulu Jijini Dar es Salaam na kubainisha maeneo ya kipaumbele kuwa ni miundombinu hususani barabara na reli, kuongeza uzalishaji na usambazaji wa nishati ya umeme, Teknolojia ya Habari na Mawasiliano (TEHAMA) na elimu kwa kujielekeza katika ubora na kuhakikisha idadi ya wanaopata elimu inaongezeka.

Maeneo mengine ni kuboresha sekta ya afya, kuongeza upatikanaji wa maji, usimamizi bora wa ardhi, mawasiliano, huduma za fedha jumuishi, vituo vya pamoja vya Serikali na kusaidia familia masikini.

Bi. Bella Bird amempongeza Mhe. Rais Magufuli kwa usimamizi mzuri wa miradi ya maendeleo inayotekelezwa na Benki ya Dunia na amemuahidi kuwa benki hiyo itaendelea kushirikiana kwa karibu na Tanzania katika utekelezaji wa miradi mingine.

“Mwaka uliopita Benki ya Dunia imetoa mikopo nafuu yenye thamani ya Dola za Marekani Bilioni 1.2 (Shilingi Trilioni 2.7) kwa Tanzania, fedha hizi zimekwenda katika miradi mbalimbali na tunafurahi kuwa miradi hiyo inakwenda vizuri na wananchi wanafurahia, kwa sasa tunapanga namna tutakavyotoa mikopo kwa ajili ya kuunga mkono juhudi za maendeleo katika kipindi kijacho” amesema Bi. Bella Bird.

Kwa upande wake Mhe. Rais Magufuli ameishukuru Benki ya Dunia kwa ushirikiano wake na Tanzania katika maendeleo na amemhakikishia Bi. Bella Bird kuwa Serikali itazisimamia vizuri fedha zote zinazotolewa na benki hiyo ili zilete matokeo yanayotarajiwa.

Mhe. Rais Magufuli ameongeza kuwa maeneo yote ambayo benki hiyo imeyataja kuwa kipaumbele katika fedha zitakazotolewa kuanzia sasa ni muhimu kwa ustawi wa Tanzania na amesisitiza kuwa fedha zitakazotolewa kwa mkopo zielekezwe katika maendeleo na sio vinginevyo.

“Naishukuru sana Benki ya Dunia kwa kutuunga mkono, nitafurahi kuona mnaendelea kutupatia fedha ambazo zinaelekezwa kwenye miradi ya maendeleo na kuleta manufaa mapana na endelevu, badala ya kugawa fedha kwa watu na baadaye nchi inakuja kuzilipa kwa kukusanya kodi za wananchi” amesisitiza Mhe. Rais Magufuli.

Wakati huo huo, Mhe. Rais Magufuli leo ameongoza kikao cha Baraza la Mawaziri Kilichofanyika Ikulu Jijini Dar es Salaam.

Gerson Msigwa

Mkurugenzi wa Mawasiliano ya Rais, IKULU

Dar es Salaam

04 Desemba, 2017

Rais wa Jamhuri ya Muungano wa Tanzania Mhe. Dkt. John Pombe Magufuli amemteua Bi. Stella Tullo Chagi kuwa Msajili wa Mabaraza ya Ardhi na Nyumba wa Wilaya.

Taarifa iliyotolewa na Katibu Mkuu Kiongozi Balozi John Kijazi imeeleza kuwa uteuzi huu umeanza tarehe 25 Novemba, 2017.

Kabla ya uteuzi huu Bi. Stella Tullo Chagi alikuwa Msajili Msaidizi wa Mabaraza ya Ardhi na Nyumba, Wizara ya Ardhi, Nyumba na Maendeleo ya Makazi.

Gerson Msigwa

Mkurugenzi wa Mawasiliano ya Rais, IKULU

Dar es Salaam

30 Novemba, 2017

Makamu wa Rais wa Jamhuri ya Muungano wa Tanzania Mhe. Samia Suluhu Hassan tarehe 28 Novemba, 2017 amewasili Mjini Nairobi nchini Kenya ambako anamwakilisha Rais wa Jamhuri ya Muungano wa Tanzania Mhe. Dkt. John Pombe Magufuli katika sherehe za kuapishwa kwa Rais wa Jamhuri ya Kenya Mhe. Uhuru Kenyatta.

Katika uwanja wa ndege wa kimataifa wa Jomo Kenyatta Mhe. Samia Suluhu Hassan ambaye ameambatana na Naibu Waziri wa Mambo ya Nje na Ushirikiano wa Afrika Mashariki Dkt. Suzan Kolimba amepokelewa na Mhe. Balozi Robinson Njeru Githae wa Kenya na Balozi wa Tanzania nchini Kenya Mhe. Dkt. Pindi Chana.

Sherehe za kuapishwa kwa Mhe. Rais Uhuru Kenyatta zinafanyika katika uwanja wa Moi Kasarani Mjini Nairobi.

Gerson Msigwa

Mkurugenzi wa Mawasiliano ya Rais, IKULU

Nairobi

28 Novemba, 2017

Rais wa Jamhuri ya Muungano wa Tanzania Mhe. Dkt. John Pombe Magufuli amefanya ziara ya kushtukiza katika maeneo ya kutunzia magari ndani bandari ya Dar es Salaam na kubaini uwepo wa magari madogo ya kubebea wagonjwa 50 ambayo yamekwama bandarini hapo tangu tarehe 29 Juni, 2015 na magari ya Jeshi la Polisi 53 ambayo yamekwama tangu Juni 2016.

Mhe. Rais Magufuli pia amebaini uwepo wa magari yaliyotekelezwa bandari hapo kwa zaidi ya miaka 10 hali inayopunguza uwezo wa bandari kuhifadhi mizigo.

Kufuatia hali hiyo Mhe. Rais Magufuli ametoa siku 7 kwa Mamlaka ya Mapato Tanzania (TRA), Mamlaka ya Usimamizi wa Bandari Tanzania (TPA) na Jeshi la Polisi kumpa taarifa juu ya sababu za magari hayo kukwama bandarini hapo kwa muda mrefu na kinyume cha sheria, na pia ameagiza magari yote ambayo yamekaa bandarini hapo kwa muda mrefu yaondolewe kwa taratibu za kisheria na kwa uwazi.

“Nataka magari yote yaliyokaa muda mrefu kupita muda uliopangwa kisheria yaondolewe haraka, kama ni kupigwa mnada yapigwe mnada, kama ni kuchukuliwa na Serikali yachukuliwe, hatuwezi kuendelea kutunza magari ya watu humu kwa miaka 10 tena watu wengine hawajulikani” ameagiza Mhe. Rais Magufuli.

Halikadhalika Mhe. Rais Magufuli amemuagiza Mkurugenzi Mkuu wa Taasisi ya Kuzuia na Kupambana na Rushwa (TAKUKURU) Kamishna Valentino Mlowola kufanya uchunguzi kwa magari yote yaliyokwama bandarini hapo baada ya kuagizwa kwa majina ya taasisi za Serikali na kuwabaini wote walioshiriki katika uingizaji.

Aidha, Mhe. Rais Magufuli aliyeongozana na Waziri wa Ujenzi, Uchukuzi na Mawasiliano Prof. Makame Mbarawa Mnyaa na Waziri wa Fedha na Mipango Dkt. Philip Isdor Mpango, amewataka Mawaziri hao kufuatilia utendaji kazi wa vyombo na taasisi wanazozisimamia na kuchukua hatua kwa wakati pale wanapobaini uwepo wa mambo yasiyofaa.

Mapema kabla ya kufanya ziara ya kushtukiza katika maeneo ya utunzaji wa magari yaliyokaa bandarini hapo kwa muda mrefu Mhe. Rais Magufuli ametembelea meli ya Jeshi la Jamhuri ya Watu wa China iitwayo Peace Ark ambayo tangu tarehe 20 Novemba, 2017 ilikuwa ikitoa huduma za matibabu ya bure kwa wananchi.

Meli hiyo ambayo ni hospitali yenye vifaa vyote vya uchunguzi na dawa ina madaktari 115, wauguzi na wafanyakazi wengine 266 na vitanda vya kulaza wagonjwa 300, kwa muda wa wiki 1 imetoa huduma za matibabu kwa wagonjwa 6,421 wakiwemo 31 waliofanyiwa upasuaji. Meli hiyo imeondoka nchini leo.

Kamanda anayeongoza timu ya madaktari, wauguzi na wafanyakazi katika meli hiyo Guan Bailin amesema meli hiyo imekuja kwa mara ya pili nchini Tanzania na kwamba China inafanya hivyo kwa kutambua uhusiano na ushirikiano mzuri, wa kihistoria na kidugu kati ya Tanzania na China na kwamba meli hiyo inaweza kuja tena endapo Tanzania itahitaji.

Akizungumza baada ya kutembelea vitengo mbalimbali ya uchunguzi na matibabu ndani ya meli hiyo Mhe. Rais Magufuli ameishukuru Serikali ya China kwa kuleta meli na kutoa matibabu kwa idadi kubwa ya wananchi na amesema Tanzania inaikaribisha kwa wakati mwingine wowote ili isaidie juhudi za kutoa matibabu kwa wananchi.

Mhe. Rais Magufuli amemkabidhi Kamanda wa meli hiyo Guan Bailin barua ya shukrani kwa Rais wa China Mhe. Xi Jinping yenye shukrani zake kwa ujio wa meli hiyo, na pia amemuomba Mhe. Rais Xi Jinping kuisadia Tanzania kupata meli kama hiyo na kuendelea kuwaleta madaktari kutoka China.

“Kwa wiki moja mmetoa matibabu kwa wananchi 6,421 lakini nimeambiwa waliojiandikisha walikuwa zaidi ya 10,000 hii inaonesha kuwa kuna mahitaji makubwa ya matibabu, kwa hiyo natoa wito kwa ndugu zetu wa China mje muwekeze katika ujenzi wa vituo vya tiba hapa Tanzania” amesema Mhe. Rais Magufuli.

Amewashukuru madaktari wa China waliotoa huduma kwa wiki nzima pamoja na madaktari wa hapa nchini walioshirikiana nao, amempongeza Mkuu wa Mkoa wa Dar es Salaam Bw. Paul Makonda kwa kusimamia zoezi hilo na ametaka Wakuu wa Mikoa yote nchini waige mfano wa Bw. Makonda kuwapenda na kuwapigania wananchi wao.

Mhe. Rais Magufuli ameongozana na Mkewe Mama Janeth Magufuli, Balozi wa China hapa nchini Mhe. Wang Ke, Mkuu wa Majeshi ya Ulinzi Tanzania Jen. Venance Salvatory Mabeyo, Mawaziri na Wakuu wa vyombo vya ulinzi na usalama.

Gerson Msigwa

Mkurugenzi wa Mawasiliano ya Rais, IKULU

Dar es Salaam

26 Novemba, 2017

Rais wa Jamhuri ya Muungano wa Tanzania Mhe. Dkt. John Pombe Magufuli tarehe 25 Novemba, 2017 amefungua hospitali ya taaluma na tiba ya chuo kikuu cha afya na sayansi shirikishi Muhimbili (MUHAS) kampasi ya Mloganzila iliyojengwa kwa ushirikiano wa Serikali ya Tanzania na Jamhuri ya Korea.

Hospitali hiyo bora kuliko zote Afrika Mashariki na Kati imejengwa na kuwekwa vifaa tiba vya kisasa na vya teknolojia ya hali ya juu, ina uwezo wa kudahili wanafunzi 4,010 kwa mwaka, ina vitanda 571 vya kulaza wagonjwa, ina vyumba 13 vya upasuaji na ujenzi wake umegharimu Shilingi Bilioni 266.7.

Kabla ya kuzungumza na wananchi, Mhe. Rais Magufuli aliyeongozana na Mkewe Mhe. Mama Janeth Magufuli, amekagua jengo la ghorofa 9 lenye vifaa tiba vya kisasa na vyenye ubora wa hali ya juu kwa ajili ya uchunguzi na matibabu, vilivyofungwa katika vitengo mbalimbali vya hospitali hiyo vikiwemo kliniki ya wagonjwa (OPD) upasuaji, usingizi, magonjwa ya moyo, matibabu ya kansa, huduma ya mama na mtoto, wagonjwa wa dharula, idara ya MRI na CT-Scan.

Mhe. Rais Magufuli ameishukuru Jamhuri ya Korea kwa kushirikiana na Tanzania kujenga hospitali hiyo kwa lengo la kutoa matibabu kwa watanzania waliokuwa wakilazimika kwenda nje ya nchi, kufundisha madaktari na madaktari bingwa pamoja na kufanya utafiti wa kuboresha tiba na kinga ya magonjwa.

Pia, Mhe. Rais Magufuli amempongeza Rais Mstaafu wa Awamu ya Nne Mhe. Dkt. Jakaya Mrisho Kikwete kwa kuanzisha ujenzi wa Hospitali hiyo mwaka 2014 na ameahidi kuwa Serikali ya Awamu ya Tano itaiendeleza Hospitali hiyo ili ifikie malengo yake ya kutoa matibabu kwa Watanzania kwa viwango vya juu na kufundisha madaktari bingwa wengi zaidi.

Mhe. Dkt. Magufuli ameiagiza Wakala wa Majengo Tanzania (TBA) kujenga haraka miundombinu mbalimbali iliyotengewa Shilingi Bilioni 13.32 kwa ajili ya kuimarisha hospitali ya Mloganzila.

Wakati huo huo, Mhe. Rais Magufuli amesema ekari 3,865.6 za eneo la hospitali ya Mloganzila ambalo awali lilikuwa linatumika kunenepeshea mifugo, ni mali halali ya Serikali na kwamba hakuna fidia yoyote itakayotolewa kwa kuwa hata waliolivamia walishalipwa fidia ya kuondoa makazi waliyoyaweka ndani ya eneo hilo.

Aidha, Mhe. Rais Magufuli ameagiza hospitali zote za mikoa kuhamishiwa Wizara ya Afya, Maendeleo ya Jamii, Jinsia, Wazee na Watoto ili zisimamiwe vizuri na wataalamu na pia ameiagiza wizara hiyo kurekebisha mgawanyo wa madaktari katika hospitali zote nchini ili kuepuka uwepo madaktari wengi katika sehemu moja, huku maeneo mengine yakiwa na uhaba mkubwa.

Halikadhalika Mhe. Rais Magufuli ameagiza Wizara ya Afya, Maendeleo ya Jamii, Jinsia, Wazee na Watoto kushirikiana na Wizara ya Elimu, Sayansi, Teknolojia na Ufundi ili kujadili na kuondoa mkanganyiko wa utoaji wa huduma kwa taasisi zinazohusisha wizara zote ikiwemo Hospitali ya Mloganzila.

Mapema kabla ya kuhutubia, Kaimu Makamu Mkuu wa Chuo Kikuu cha Afya na Sayansi Shirikishi Muhimbili (MUHAS) Prof. Appolinary Kamuhabwa amemshukuru Mhe. Rais Magufuli kwa kukamilisha ujenzi wa hospitali hiyo na amesema ujenzi wa miundombinu iliyobaki ukikamilika utasaidia kuongeza udahili wa wanafunzi kutoka 4,010 wa sasa hadi kufikia wanafunzi 15,000.

Sherehe za ufunguzi wa hospitali hiyo zimehudhuriwa na Makamu wa Rais Mhe. Samia Suluhu Hassan, Makamu wa Rais Mstaafu Mhe. Dkt. Mohamed Gharib Bilal, Waziri Mkuu Mstaafu Mhe. Mizengo Kayanza Peter Pinda, Spika Mstaafu Mhe. Ane Semamba Makinda, Balozi wa Jamhuri ya Korea Mhe. Song Geum-young, Mawaziri, Mabalozi kutoka nchi mbalimbali na viongozi mbalimbali.

Gerson Msigwa

Mkurugenzi wa Mawasiliano ya Rais, IKULU

Dar es Salaam

25 Novemba, 2017

Rais wa Jamhuri ya Muungano wa Tanzania Mhe. Dkt. John Pombe Magufuli amemtumia salamu za rambirambi Spika wa Bunge la Jamhuri ya Muungano wa Tanzania Mhe. Job Yustino Ndugai kufuatia kifo cha Mbunge wa Jimbo la Songea Mjini Mhe. Leonidas Tutubert Gama.

Mhe. Leonidas Tutubert Gama amefariki dunia jana tarehe 23 Novemba, 2017 saa 4:25 usiku katika hospitali ya Mtakatifu Joseph ya Peramiho, iliyopo Wilaya ya Songea Mkoani Ruvuma ambako alikimbizwa kwa matibabu baada ya kuugua ghafla.

“Nimepokea kwa mshtuko na majonzi taarifa za kifo cha ghafla cha Mhe. Leonidas Tutubert Gama, nakupa pole Mhe. Spika Job Ndugai, Wabunge na wafanyakazi wa ofisi yako, na kupitia kwako naomba ufikishe salamu zangu za pole kwa familia ya Marehemu, wananchi wa Jimbo la Songea Mjini na Mkoa mzima wa Ruvuma, ndugu, jamaa, marafiki na wote walioguswa na msiba huu” amesema Mhe. Rais Magufuli.

Aidha, Mhe. Rais Magufuli amempa pole Mwenyekiti wa Chama Cha Mapinduzi (CCM) Mkoa wa Ruvuma Ndg. Oddo Mwisho na wana CCM wote kwa kumpoteza kada wao aliyeiwakilisha vizuri CCM kwa nafasi yake ya ubunge.

Mhe. Rais Magufuli amesema Mhe. Leonidas Tutubert Gama ambaye amewahi kushika nyadhifa mbalimbali za uongozi ikiwemo Mkuu wa Wilaya, Mkuu wa Mkoa na Mbunge, alikuwa kiongozi hodari, aliyefanya kazi kwa kujiamini na aliyependa kupigania maslahi ya wananchi bila kuchoka.

Amemuombea kwa Mwenyezi Mungu aiweke roho yake mahali pema peponi na pia ameiombea familia yake iwe na subira, uvumilivu na ustahimilivu katika kipindi hiki cha majonzi.

Bwana ametoa, Bwana ametwaa, jina lake lihimidiwe, Amina.

Gerson Msigwa

Mkurugenzi wa Mawasiliano ya Rais, IKULU

Dar es Salaam

24 Novemba, 2017   

Rais wa Jamhuri ya Muungano wa Tanzania Mhe. Dkt. John Pombe Magufuli ametuma salamu rambirambi kwa familia, ndugu, jamaa na marafiki kufuatia kifo cha Mzee Kleist Sykes kilichotokea tarehe 22 Novemba, 2017 Jijini Dar es Salaam.

Mhe. Rais Magufuli amesema amepokea taarifa za kifo cha Mzee Kleist Sykes kwa majonzi na huzuni hasa akikumbuka mchango mkubwa alioutoa katika ujenzi wa Taifa akiwa mmoja wa viongozi waliokuwa mstari wa mbele katika kupiga vita umasikini, kuilinda misingi ya uhuru na kujenga uzalendo kwa Watanzania.

Ameongeza kuwa Mzee Kleist Sykes na familia yake walijitoa kwa hali na mali kukijenga chama tangu TAA, TANU na baadaye Chama Cha Mapinduzi (CCM) pamoja na kushiriki katika harakati kubwa za uhuru, kwa kuweka mbele maslahi ya Taifa licha ya changamoto mbalimbali walizokabilina nazo.

“Mchango wa Mzee Kleist Sykes na familia yake katika nchi yetu hautasahaulika, uzalendo wake utakumbukwa na kudumishwa na hakika kifo chake kimetuachia majonzi na huzuni hasa kwa kuwa kimetokea wakati ambapo busara zake bado zinahitajika”

“Nawapo pole wanafamilia, ndugu, jamaa, wana CCM, marafiki na wote walioguswa na kifo hiki, naungana nao katika majonzi na sala za kumuombea Mzee Kleist Sykes apumzike mahali pema, Amina”

Gerson Msigwa

Mkurugenzi wa Mawasiliano ya Rais, IKULU

Dar es Salaam

23 Novemba, 2017

Rais wa Jamhuri ya Muungano wa Tanzania Mhe. Dkt. John Pombe Magufuli tarehe 23 Novemba, 2017 amemteua Dkt. Wilbrod Peter Slaa kuwa Balozi.

Dkt. Wilbrod Peter Slaa ataapishwa baada ya taratibu kukamilika.

Gerson Msigwa

Mkurugenzi wa Mawasiliano ya Rais, IKULU

Dar es Salaam

23 Novemba, 2017

Rais wa Jamhuri ya Muungano wa Tanzania Mhe. Dkt. John Pombe Magufuli  tarehe 22 Novemba, 2017 amekutana na kufanya mazungumzo na Rais wa Zanzibar na Mwenyekiti wa Baraza la Mapinduzi Mhe. Dkt. Ali Mohamed Shein, Ikulu Jijini Dar es Salaam.

Mhe. Rais Magufuli ambaye ni Mwenyekiti wa Chama Cha Mapinduzi (CCM) na Mhe. Rais Shein ambaye ni Makamu Mwenyekiti wa CCM Zanzibar wamezungumzia masuala mbalimbali yahusuyo chama hicho.

Baada ya mazungumzo hayo Mhe. Rais Shein amesema wamejadili kuhusu kukiimarisha Chama Cha Mapinduzi kuelekea uchaguzi wa Serikali za Mitaa mwaka 2019 na Uchaguzi Mkuu mwaka 2020.

Wakati huo huo, Mhe. Rais Magufuli amekutana na kufanya mazungumzo na Balozi wa Japan hapa nchini Mhe. Masaharu Yoshida.

Viongozi hao wamezungumzia masuala mbalimbali yahusuyo utekelezaji wa miradi mbalimbali inayofanywa kwa ushirikiano wa Japan na Tanzania hususani ya ujenzi wa barabara na madaraja.

Gerson Msigwa

Mkurugenzi wa Mawasiliano ya Rais, IKULU

Dar es Salaam

22 Novemba, 2017

Rais wa Jamhuri ya Muungano wa Tanzania Mhe. Dkt. John Pombe Magufuli amemteua Bw. Edwin Novath Rutageruka kuwa Mkurugenzi Mkuu wa Mamlaka ya Maendeleo ya Biashara Tanzania (TANTRADE).

Taarifa iliyotolewa tarehe 21 Novemba, 2017 na Katibu Mkuu Kiongozi Balozi John Kijazi imeeleza kuwa uteuzi wa Bw. Edwin Novath Rutageruka umeanza tarehe 11 Novemba, 2017.

Kabla ya Uteuzi huo, Bw. Edwin Novath Rutageruka alikuwa akikaimu nafasi hiyo.

Gerson Msigwa

Mkurugenzi wa Mawasiliano ya Rais, IKULU

Dar es Salaam

21 Novemba, 2017

Taarifa zinazoenezwa kupitia mitandao ya kijamii kuwa Rais wa Jamhuri ya Muungano wa Tanzania Mhe. Dkt. John Pombe Magufuli ametengua uteuzi wa Katibu Mkuu, Ofisi ya Rais, Menejimenti ya Utumishi wa Umma na Utawala Bora Dkt. Laurian Ndumbaro sio za kweli na zipuuzwe.

Wananchi endeleeni kupokea taarifa rasmi kutoka kwenye mamlaka na vyombo rasmi vya Serikali, na pia watumiaji wa mitandao ya kijamii mnakumbushwa kuwa kueneza taarifa za uongo ni makosa kisheria.

Serikali itawafuatilia wote waliozusha taarifa hizi na kuchukua hatua kwa mujibu wa sheria.

Gerson Msigwa

Mkurugenzi wa Mawasiliano ya Rais, IKULU

Dar es Salaam

20 Novemba, 2017 

Rais wa Jamhuri ya Muungano wa Tanzania Mhe. Dkt. John Pombe Magufuli tarehe 15 Novemba 2017, amerejea jijini Dar es salaam akitokea kijijini kwake Chato, mkoani Geita.

Katika Uwanja wa Ndege wa Kimataifa wa Mwalimu Julius Nyerere jijini Dare es salaam, Mhe. Rais amepokelewa na Makamu wa Rais Mhe. Samia Suluhu Hassan na Mkuu wa Mkoa wa Dar es salaam Mhe. Paul Makonda na viongozi wengine wa mkoa.

Baada ya kutoka Uwanja wa Ndege, Rais Magufuli akiwa ameongozana na Makamu wa Rais pamoja na Mkuu wa Mkoa wa Dar es salaam,amekagua Ujenzi wa Daraja la juu Tazara ( Tazara Fly-Over) na Ujenzi wa Daraja la ghorofa tatu la Ubungo ( Ubungo Interchange)

Akikagua maendeleo ya ujenzi wa Daraja la Ubungo, Rais Magufuli amemuagiza Meneja wa Wakala wa Barabara nchini TANROADS  Mkoa wa Dar es salaam Mhandisi Ndyamukama Julius kuvunja sehemu ya jengo la TANESCO na jengo la Wizara ya Maji yaliyopo katika eneo la hifadhi ya barabara ili kupisha ujenzi wa miundombinu ya daraja hilo.

''Sheria ya hifadhi ya barabara katika eneo hilo ni mita tisini kila upande kutoka katikati ya barabara hivyo ni lazima sheria hiyo iheshimiwe ili kuharakisha ujenzi wa Daraja la ghorofa tatu katika eneo hilo la Ubungo uanafanyika bila vikwazo kwani sheria ni msumeno haina budi kuzingatiwa hata na Serikali yenyewe'' amesema Rais Magufuli.

Aidha Rais Magufuli ameiagiza TANROADS kutangaza tenda ya ujenzi wa barabara yenye urefu wa kilomita kumi na sita (16) kutoka eneo linapoishia Daraja la ghorofa tatu katika eneo la Ubungo kuelekea Chalinze ili itanuliwe kwa lengo la kurahisha usafiri katika jiji la Dar es salaam.

Rais Magufuli amewataka Makandarasi wanaojenga Daraja la Tazara na Ubungo kuharakisha ujenzi wa madaraja hayo usiku na mchana ili yaweze kumalizika kwa wakati ama kabla ya muda huo katika kurahisisha maendeleo ya kibiashara katika jiji la Dar es salaam.

''Dar es salaam ni jiji la kibiashara hivyo hakuna budi miundombinu yake ya usafiri iweze kurahisha usafirishaji wa bidhaa mbalimbali kutoka ndani ya jiji na nje ya jiji la Dar es salaam'' amesema Rais Magufuli.   

Mhandisi wa Masuala ya Usalama wa Ujenzi Mhandisi Richard Baruani amemueleza Rais Magufuli kuwa Ujenzi wa Daraja la Tazara umefikia asilimia 64 ambapo Daraja hilo linatarajiwa kukamilika mwezi Oktoba 2018.

Kwa upande wa Daraja la ghorofa tatu la Ubungo, Mhandisi Mshauri Reginald Kayanga amesema  ujenzi wake unatarajiwa kuanza rasmi Desemba 2017.

Jaffar Haniu

Naibu Mkurugenzi wa Mawasiliano ya Rais, IKULU

Dar es Salaam

15 Novemba, 2017

Rais wa Jamhuri ya Muungano wa Tanzania Mhe. Dkt. John Pombe Magufuli ameiagiza Wizara ya Ujenzi, Uchukuzi na Mawasiliano kutafuta fedha na kujenga barabara ya Mutukula – Minziro yenye urefu wa kilometa 6 ili kurahisisha usafiri wa watu na mizigo.

Mhe. Rais Magufuli ametoa agizo hilo tarehe 11 Novemba, 2017 katika Mji wa Mutukula mpakani mwa Tanzania na Uganda baada ya kupokea kero za wananchi waliokusanyika jirani na geti la kuvuka mpaka huo ambao wamedai kukosekana kwa barabara hiyo kunawalazimu kutumia barabara ya kuzunguka Kyaka.

Pamoja na kumtaka Waziri wa Ujenzi, Uchukuzi na Mawasiliano kujenga barabara hiyo Mhe. Rais Magufuli pia amewataka viongozi wa Mkoa wa Kagera kufanyia kazi madai ya wananchi waliolalamikia kupata usumbufu katika kizuizi cha Kyaka jirani na mto Kagera.

Hata hivyo Mhe. Dkt. Magufuli amewataka wananchi wa Mutukula kutambua kazi ya ulinzi na usalama inayofanywa na vyombo vya dola na amewataka kutoa ushirikiano kwa viongozi na Serikali katika kuhakikisha mpaka huo unakuwa salama.

Aidha, Mhe. Rais Magufuli amewataka wananchi hao kuongeza juhudi katika shughuli za maendeleo zikiwemo kilimo na biashara na amerejea agizo lake la kuutaka Mkoa wa Kagera kujenga soko la kimataifa katika maeneo ya jirani na mpaka huo ili wananchi wapate mahali pa kuuzia bidhaa zao kwa njia halali.

Gerson Msigwa

Mkurugenzi wa Mawasiliano ya Rais, IKULU

Mutukula

11 Novemba, 2017 

Rais wa Jamhuri ya Muungano wa Tanzania Mhe. Dkt. John Pombe Magufuli tarehe 11 Novemba, 2017 amemaliza ziara rasmi ya kiserikali ya siku 3 nchini Uganda na kurejea nchini Tanzania.

Mhe. Rais Magufuli ameagana na Rais wa Jamhuri ya Uganda Mhe. Yoweri Kaguta Museveni katika Mji wa Masaka na baadaye kusindikizwa na Makamu wa Rais wa Uganda Mhe. Edward Kiwanuka Sekandi hadi Mutukula, mpakani mwa Tanzania na Uganda.

Kabla ya kuagana na Mhe. Rais Magufuli, Rais wa Uganda Mhe. Yoweri Kaguta Museveni ametoa tamko la kulaani uamuzi uliotolewa na Mahakama ya Kimataifa ya Makosa ya Jinai (ICC) ambayo imemuagiza mwendesha mashtaka wa mahakama hiyo kuanzisha uchunguzi dhidi ya mgogoro wa Burundi.

Majaji wa ICC wametoa uamuzi huo juzi tarehe 09 Novemba, 2017 na kumtaka mwendesha mashtaka wa mahakama hiyo kuchunguza vitendo vya kihalifu dhidi binadamu vilivyotokea nchini Burundi tangu ulipozuka mgogoro nchini humo miaka miwili iliyopita.

Katika tamko hilo Mhe. Rais Museveni ambaye ni Mwenyekiti wa Jumuiya ya Afrika Mashariki amesema ICC inaingilia mambo ya Jumuiya ya Afrika Mashariki bila kuwahusisha viongozi wa Jumuiya hiyo jambo ambalo sio sahihi na linarudisha nyuma juhudi za kutafuta amani ya Burundi.

Akizungumzia uamuzi huo Mhe. Rais Magufuli amesema hatua hiyo inarudisha nyuma hatua zilizochukuliwa na Jumuiya ya Afrika Mashariki ambayo iliunda Kamati ya usuluhishi wa mgogoro wa Burundi inayoongozwa na Mhe. Rais Museveni na Rais Mstaafu wa Awamu ya Tatu wa Tanzania Mhe. Benjamin William Mkapa.

Mhe. Rais Magufuli amesema hali ya Burundi sio mbaya kama inavyotangazwa kwa kuwa tayari wakimbizi wengi waliokuwa Tanzania wamerejea Burundi na wengine wanaendelea kurejea, na pia viongozi wanaosuluhisha mgogoro huo wamepanga kukutana tarehe 23 Novemba, 2017 kwa lengo kuendeleza mchakato wa kutatua mgogoro huo.

Gerson Msigwa

Mkurugenzi wa Mawasiliano ya Rais, IKULU

Masaka, Uganda

11 Novemba, 2017

Rais wa Jamhuri ya Muungano wa Tanzania Mhe. Dkt. John Pombe Magufuli amekutana na Watanzania waishio nchini Uganda katika Mji wa Masaka na kuwahakikishia kuwa hatua zilizoanza kuchukuliwa na Serikali ya Awamu ya Tano katika kuleta mabadiliko zimeanza kuzaa matunda.

Mhe. Rais Magufuli aliyeongozana na Mkewe Mama Janeth Magufuli, Mawaziri na viongozi wakuu wa taasisi za Serikali ametaja baadhi ya matokeo hayo kuwa ni kusimamia vizuri uchumi unaokuwa kwa wastani wa asilimia 7, kudhibiti mfumuko wa bei hadi asilimia 5.1, kuokoa Shilingi Bilioni 238 walizokuwa wanalipwa watumishi hewa kwa mwaka na kuondoa watumishi wenye vyeti feki waliokuwa wakilipwa Shilingi Bilioni 142 kwa mwaka.

Matokeo mengine ni kuongeza ukusanyaji wa mapato kutoka Shilingi Bilioni 850 hadi wastani wa Shilingi Trilioni 1.2 kupitia Mamlaka ya Mapato (TRA), kuanza ujenzi wa reli ya kati kwa kiwango cha kisasa (Standard Gauge) kuanzia Dar es Salaam hadi Dodoma umbali wa kilometa 726 ambapo Shilingi Trilioni 7 zitatumika, kununua ndege 6 za Serikali kwa ajili ya kuinua utalii na kuimarisha usafiri wa anga, kutoa elimu bila malipo kwa shule za msingi na sekondari na kuboresha huduma za afya ikiwemo kuongeza bajeti ya dawa kutoka Shilingi Bilioni 31 hadi 269.

Mhe. Rais Magufuli pia amesema Serikali imechukua hatua madhubuti za kuwavutia wawekezaji na sasa wengi wapo katika hatua mbalimbali za uwekezaji ikiwemo ujenzi wa viwanda na ametoa wito kwa Watanzania hao kuendelea kuwashawishi wawekezaji wengine kwenda kuwekeza nchini Tanzania kwa kuwa fursa zipo nyingi.

Katika mkutano huo Watanzania waishio Uganda wamemshukuru na kumpongeza Mhe. Rais Magufuli kwa juhudi mbalimbali anazozifanya na wameomba Serikali iwajengee mazingira bora pale wanapowapeleka wawekezaji nchini Tanzania.

Pamoja na Mhe. Rais Magufuli kuahidi kufanyia kazi maoni ya Watanzania hao, Mawaziri waliokuwa wakijibu hoja mbalimbali zilizotolewa wamewataka kutosita kuwasiliana nao pale wanapokuwa na jambo linalohitaji majibu ya Serikali.

Huu ni mkutano wa kwanza wa Mhe. Rais Magufuli kukutana na Watanzania waishio nje ya nchi (Diaspora), na Uganda kuna Watanzania 45,000 waishio nchini hapa.

Gerson Msigwa

Mkurugenzi wa Mawasiliano ya Rais, IKULU

Masaka, Uganda

10 Novemba, 2017

Rais wa Jamhuri ya Muungano wa Tanzania Mhe. Dkt. John Pombe Magufuli na Rais wa Jamhuri ya Uganda Mhe. Yoweri Kaguta Museveni wamewaagiza Mawaziri wa nchi hizi mbili kujadiliana juu ya namna ya kuongeza biashara kati ya nchi hizi ili kupata manufaa makubwa zaidi ya uhusiano na ushirikiano wa kidugu uliopo.

Viongozi hao wametoa kauli hiyo tarehe 10 Novemba, 2017 baada ya kufanya mazungumzo rasmi na kisha kuzungumza na waandishi wa habari katika Ikulu ndogo ya Masaka nchini Uganda ambako Mhe. Rais Magufuli ameendelea na ziara yake rasmi ya kiserikali ya siku 3.

Akisisitiza juu ya agizo hilo Mhe. Rais Magufuli amesema kwa muda mrefu biashara kati ya Tanzania na Uganda imekuwa ni takribani shilingi Bilioni 200 kwa mwaka kiasi ambacho ni kidogo mno ikilinganishwa na fursa zilizopo, uhusiano na ushirikiano wa kidugu uliojengwa tangu enzi za Baba wa Taifa Hayati Mwl. Julius Kambarage Nyerere.

“Tumewaagiza Mawaziri na wataalamu wakae na waangalie vikwazo vyote vinavyosababisha tufanye biashara kwa kiasi kidogo, wakishajadili watatuambia tufanye nini, tunataka kuona biashara ya Tanzania na Uganda inakua, hivi sasa Uganda imewekeza Dola za Marekani Milioni 47 tu nchini Tanzania na kuzalisha ajira 146,000, kiasi hiki ni kidogo sana, ni lazima tuongeze” amesema Mhe. Rais Magufuli.

Kuhusu hatua ambazo Tanzania imeanza kuchukua Mhe. Rais Magufuli amesema pamoja kuanza ujenzi wa reli ya kati kwa kiwango cha kisasa (Standard Gauge) kutoka Dar es Salaam hadi Dodoma umbali wa kilometa 726, Serikali imekarabati reli iliyopo, pamoja na kivuko cha mabehewa ya treni cha Umoja katika ziwa Victoria ili kuwezesha mizigo ya kutoka bandari ya Dar es Salaam kufika Kampala kwa gharama nafuu na pia inaendelea kujenga na kuimarisha barabara za mpakani.

“Napenda pia kukushukuru Mhe. Rais Museveni kwamba Serikali yako sasa itajenga kipande cha kilometa 11 za reli kutoka Portbell hadi Kampala, na sisi tumeamua kuweka bandari kavu pale Mwanza ili wafanyabiashara wa Uganda wasisumbuke kwenda hadi Dar es Salaam, mizigo yao wataipata Mwanza, hii ni njia ya uhakika na nafuu ya kusafirisha mizigo” ameongeza Mhe. Rais Magufuli.

Akijibu maswali ya waandishi wa habari Mhe. Rais Magufuli ameeleza kuwa Tanzania imejipanga kuimarisha zaidi uhusiano na ushirikiano wake na Uganda kwa kuhakikisha miradi mbalimbali inakwenda vizuri ikiwemo kituo cha pamoja cha huduma za mpakani (One Stop Border Post – OSBP) na mradi wa bomba la mafuta ghafi kutoka Hoima nchini Uganda hadi bandari ya Tanga nchini Tanzania.

Kwa upande wake Mhe. Rais Museveni amempongeza Mhe. Rais Magufuli kwa juhudi kubwa anazozifanya kupambana na rushwa na kuimarisha uchumi, na amemuagiza Waziri wake wa Ujenzi na Uchukuzi Mhe. Monica Azuba Ntege kuharakisha mchakato wa ujenzi wa kipande cha reli cha kilometa 11 kutoka bandari ya Portbell hadi Kampala ili usafirishaji wa mizigo kwa njia ya reli kutoka bandari Dar es Salaam uanze mara moja.

Mhe. Rais Museveni amesisitiza kukuzwa kwa biashara katika ya Tanzania na Uganda hasa wakati huu ambapo Uganda inahitaji kununua gesi ya Tanzania kwa ajili ya viwanda vyake vya mbolea na chuma na pia kurudisha historia ambapo Uganda ilikuwa mnunuzi mkubwa wa bidhaa za Tanzania.

Kabla ya kuzungumza na waandishi wa habari Marais wote wawili wameshuhudua utiaji saini wa makubaliano ya ushirikiano kati ya Shirika la Utangazaji Tanzania (TBC) na Shirika la Utangazaji wa Uganda (UBC) na makubaliano kati ya Jeshi la Polisi la Tanzania na Jeshi la Polisi la Uganda.

Mhe. Rais Magufuli atamaliza ziara yake rasmi ya siku 3 kesho na kurejea nchini Tanzania.

Gerson Msigwa

Mkurugenzi wa Mawasiliano ya Rais, IKULU

Masaka, Uganda

10 Novemba, 2017

Rais wa Jamhuri ya Muungano wa Tanzania Mhe. Dkt. John Pombe Magufuli tarehe 09 Novemba, 2017 ameanza ziara rasmi ya kiserikali ya siku 3 katika Jamhuri ya Uganda kwa mwaliko wa Rais wa Uganda Mhe. Yoweri Kaguta Museveni.

Mhe. Rais Magufuli aliyeongozana na Mkewe Mhe. Mama Janeth Magufuli tayari amewasili Mtukula mpakani mwa Tanzania na Uganda ambako amepokelewa rasmi na mwenyeji wake Mhe. Rais Museveni aliyeongozana na Mkewe Mhe. Mama Janeth Museveni kwa kupigiwa mizinga 21 na kukagua gwaride rasmi lililoandaliwa kwa heshima yake.

Wakiwa mpakani hapo Marais wote wawili watafungua  kituo cha pamoja cha huduma za mpakani (One Stop Border Post - OSBP) kilichojengwa kwa lengo la kurahisisha taratibu za kiforodha, uhamiaji na kuharakisha biashara kati ya nchini hizi mbili.

Baadaye leo, Marais wote wawili wataweka jiwe la msingi katika mradi wa bomba la mafuta ghafi la kuanzia Hoima nchini Uganda hadi bandari ya Tanga nchini Tanzania, sherehe hizi zitafanyika katika kijiji cha Luzinga, kilichopo katika Mkoa wa Rakai nchini Uganda.

Baada ya ufunguzi huo, Mhe. Rais Magufuli na Mhe. Rais Museveni watazungumza na wananchi katika mkutano wa hadhara utakaofanyika katika Wilaya ya Kyotera nchini Uganda.

Jioni ya leo Mhe. Rais Magufuli atahudhuria dhifa ya kitaifa iliyoandaliwa kwa heshima yake na mwenyeji wake Mhe. Rais Museveni katika Mji wa Masaka.

Gerson Msigwa

Mkurugenzi wa Mawasiliano, IKULU

Mtukula

09 Novemba, 2017

Rais wa Jamhuri ya Muungano wa Tanzania Mhe. Dkt. John Pombe Magufuli na Rais wa Jamhuri ya Uganda Mhe. Yoweri Kaguta Museveni wameweka jiwe la msingi la Mradi wa Bomba la Mafuta Ghafi la Afrika Mashariki (EACOP) katika kijiji cha Luzinga, Mutukula nchini Uganda.

Sherehe za kuweka jiwe la msingi la mradi huo zimehudhuriwa na viongozi mbalimbali wakiwemo Makamu wa Rais wa Uganda Mhe. Edward Kiwanuka Sekandi, Mke wa Rais Magufuli Mhe. Mama Janeth Magufuli, Mke wa Rais Museven Mhe. Mama Janeth Museveni, Naibu Waziri Mkuu wa 3 wa Uganda Mhe. Kirunda Kivenjinja, Mawaziri wa Tanzania na Uganda, viongozi wa vyombo vya ulinzi na usalama na viongozi wa taasisi mbalimbali za nchi zote mbili.

Upande wa Tanzania sherehe za uwekaji wa jiwe la msingi la mradi huu zilifanyika tarehe 05 Agosti, 2017 katika Kijiji cha Chongoleani Mkoani Tanga.

Bomba la mafuta ghafi la Afrika Mashariki litaanzia Wilaya ya Hoima nchini Uganda ambako kumegunduliwa kuwepo kwa mafuta ghafi mapipa Bilioni 6.5 ambayo yatasafirishwa kwa bomba kwa kiasi cha mapipa 216,000 kila siku hadi bandari ya Tanga nchini Tanzania ambako yatakwenda katika masoko mbalimbali duniani.

Bomba hili litakuwa na urefu wa kilometa 1,445 ambapo kati yake kilometa 1,149 zitapita katika Mikoa 8 na Wilaya 24 za Tanzania, na wakati wa ujenzi mradi huu unatarajiwa kutoa ajira kwa watu 10,000.

Bomba hili litajengwa na kuendeshwa na Kampuni ya Bomba la Mafuta kwa ubia na Kampuni ya Taifa ya Mafuta ya Uganda (NOC), Shirika la Maendeleo ya Petroli Tanzania (TPDC) na kampuni tatu za mafuta za CNOOC, TOTAL na TULLOW kwa gharama ya Dola za Marekani Bilioni 3.5.

Akizungumza katika sherehe hizo Mhe. Rais Magufuli amemshukuru na kumpongeza Mhe. Rais Museveni kwa kufanikisha ugunduzi wa mafuta na kukubali bomba la kuyasafirisha kupitia Tanzania, na amemhakikishia kuwa Tanzania itatoa ushirikiano wa kutosha wakati wa ujenzi na uendeshaji wake.

“Mhe. Rais Museveni kwa kutekeleza mradi huu umeleta ustawi wa wananchi wa Uganda na pia umeleta ustawi wa wananchi wa Tanzania, mradi huu utaleta manufaa makubwa ya kiuchumi kwa nchi zetu na watu wetu, napenda kukushukuru sana wewe, wawekezaji wanaokuja kujenga bomba hili na wote walioshiriki kuufikisha mradi huu hapa, pia naomba wale vijana wa Uganda waliogundua mafuta uwape tuzo ya kutambua mchango wao na kulijengea heshima Bara la Afrika, kuwa nasi tunaweza kugundua mafuta” amesema Mhe. Rais Magufuli.

Kwa upande wake Mhe. Rais Museveni ameelezea kufurahishwa kwake na mradi huo na amesema ana matumaini kuwa utaleta manufaa makubwa kwa nchi zote mbili.

Mapema kabla ya kuweka jiwe la msingi la mradi huo Mhe. Rais Magufuli amepokelewa rasmi na mwenyeji wake Mhe. Rais Museveni aliyemwalika kwa ziara rasmi ya kiserikali ya siku 3, na baadaye viongozi hao wawili wamezindua kituo cha pamoja cha huduma za mpakani (One Stop Border Post – OSBP) kilichopo Mutukula.

Kituo hiki kilianza kujengwa mwaka 2011 na kuanza kutoa huduma mwaka 2015 na kimesaidia kuharakisha utoaji wa huduma za mpaka kulikowezesha kukua kwa ukusanyaji wa mapato, kuokoa muda na kukuza biashara kati ya Tanzania na Uganda.

Kituo hicho kimejengwa na Tanzania na Uganda kwa ufadhili kutoka asasi ya Trade Mark East Africa na kugharimu Shilingi Bilioni 7.3

Mhe. Rais Magufuli na Mhe. Rais Museveni wamefanya mkutano wa hadhara katika Wilaya ya Kyotera nchini Uganda na kuwasisitiza wananchi wa Tanzania na Uganda kutumia uhusiano na ushirikiano mzuri na wakidugu uliopo kati ya nchi hizi, kujenga uchumi kwa kasi zaidi kwa kufanya biashara pamoja na kuzitumia ipasavyo fursa mbalimbali ikiwemo kituo cha pamoja cha huduma za mpakani na bomba la mafuta ghafi la Afrika Mashariki ambalo litatoa ajira na kuwezesha biashara na shughuli mbalimbali zitakazoambatana na ujenzi wa bomba hilo.

“Naomba niwahakikishie wananchi wa Uganda, nyinyi ni ndugu zetu na sisi Tanzania tupo pamoja na nyinyi, tumezindua kituo cha pamoja cha huduma za mpakani  na tumeweka jiwe la msingi ujenzi wa bomba la mafuta, naomba mchangamke, fanyeni biashara, wananchi wa Uganda nendeni Tanzania na Watanzania watakuja huku Uganda, hayo ndio manufaa ya uhusiano na undugu wetu” amesisitiza Mhe. Rais Magufuli.

Gerson Msigwa

Mkurugenzi wa Mawasiliano ya Rais, IKULU

Kyotera, Uganda

09 Novemba, 2017