Tovuti Rasmi ya Rais

Rais wa Jamhuri ya Muungano wa Tanzania Mhe. Samia Suluhu Hassan ametoa rai kwa Serikali ya Marekani kufanya marejeo ya mkataba wa Mpango wa Ukuzaji Fursa za Kiuchumi Afrika (African Growth and Opportunity Act - AGOA) na kuuhuisha hadi mwaka 2030.

Rais Samia ametoa rai hiyo leo wakati akizungumza na vyombo vya habari mara baada ya kumpokea mgeni wake Mhe. Kamala Harris, Makamu wa Rais wa Marekani ambae yuko katika ziara ya kikazi nchini.

Aidha, Rais Samia amesema mpango wa AGOA ambao unaisha mwaka 2025 ni muhimu kwa Tanzania kwa kuwa ni njia pekee ya biashara ambayo bara la Afrika linautegemea  kujikomboa kutoka lindi la umaskini.

Vile vile,  Rais Samia ametoa wito kwa  Marekani kufanya mapitio ya Mkataba wa Viza  ili kuwawezesha raia wa mataifa yote mawili kunufaika na viza ya muda mrefu kwa  kuongeza ukuaji  wa biashara, utalii na uwekezaji.

Rais Samia pia ameishukuru Marekani kwa msaada wanaoutoa  katika kuleta maendeleo nchini kwenye sekta za afya, elimu, maji, usafi wa mazingira, kilimo na usalama wa chakula, maliasili, maendeleo ya miundombinu, demokrasia, pamoja na utawala bora.

Rais Samia amesema ziara ya Mhe. Harris itatoa fursa kwa nchi hizi mbili kuimarisha mahusiano yaliyopo na kuwa jukwaa la kutafuta maeneo mapya ya ushirikiano zaidi.

Kwa upande wake, Mhe. Harris amemtaja Rais Samia kama kiongozi bingwa wa mageuzi ambapo pia amesisitiza nchi hizi zitaendelea na majadiliano juu ya ukuaji wa uchumi wa muda mrefu nchi Tanzania.

Rais wa Jamhuri ya Muungano wa Tanzania, Mhe. Samia Suluhu Hassan amewaagiza viongozi na watendaji wa Serikali kuzisoma na kuzielewa vyema taarifa za rushwa na za ukaguzi wa hesabu za Serikali ili ziwasaidie kujitathmini.

Rais Samia ametoa agizo hilo leo mara baada ya kupokea taarifa ya Taasisi ya Kuzuia na Kupambana na Rushwa (TAKUKURU) na Ofisi ya Mkaguzi Mkuu wa Hesabu za Serikali (CAG) katika hafla iliyofanyika Ikulu.

Aidha, Rais Samia amesema taarifa hizo hizo zinasaidia kusimamia na kuimarisha utawala bora na kuhakikisha udhibiti na usimamizi wa rasilimali za Serikali unafanywa kikamilifu.

Kwa upande mwingine, Rais Samia ameitaka Mamlaka ya Bandari kufanya kazi na sekta binafsi ili kuimarisha mifumo ya TEHAMA ya ukusanyaji fedha ambapo itasaidia kudhibiti upotevu mkubwa wa fedha unaotokea bandarini.

Rais Samia pia amegiza kufanyiwa tathmini kwa Mashirika ya Umma yaliyopata hasara na kuyafuta Mashirika ambayo hayana tija kwa taifa kwa kuwa Mashirika hayo yanatumia gharama kubwa lakini hayaleti faida kwa Serikali.

Katika ripoti ya CAG jumla ya Halmashauri 14 nchini zimepata hati zenye mashaka zikiwemo Halmashauri ya Jiji la Arusha, Babati, Bahi, Geita, Kilindi, Mbinga, Musoma, Nkasi, Nyasa, Simanjiro, Songwe, Sumbawanga Manispaa pamoja na Ushetu iliyopata hati mbaya.

Rais wa Jamhuri ya Muungano wa Tanzania, Mhe. Samia Suluhu Hassan ameunda Kamati kwa ajili ya kutathmini utendaji kazi wa Wizara ya Mambo ya Nje na Ushirikiano wa Afrika Mashariki ili kuiwezesha Wizara hiyo kutekeleza malengo ya Serikali katika kukuza diplomasia ya uchumi na ushirikiano wa kimataifa.

Ili kutekeleza azma hiyo amemteua Balozi Yahya Simba, aliyekuwa Balozi wa Tanzania nchini Zambia kuwa Mwenyekiti wa Kamati. Aidha, amewateua wafuatao kuwa wajumbe wa Kamati:

1. Balozi Ramadhan Mwombe Mwinyi, Katibu wa Baraza la Mapinduzi na Katibu Mkuu Kiongozi Zanzibar, Mstaafu;

1. Balozi Dkt. Mwanaidi Sinare Maajar, aliyekuwa Balozi wa Tanzania nchini Uingereza;

1. Balozi Peter Allan Kallaghe, aliyekuwa Balozi wa Tanzania nchini Uingereza;

1. Balozi Tovako Nathaniel Manongi, aliyekuwa Mwakilishi wa Kudumu wa Tanzania kwenye Umoja wa Mataifa New York, Marekani.

Kamati hiyo itazinduliwa rasmi tarehe 31 Machi, 2023 Ikulu Dar es Salaam, saa 08:30 mchana.

Rais wa Jamhuri ya Muungano wa Tanzania, Mhe. Samia Suluhu Hassan ametoa wito kwa wadau wa kilimo kushirikiana na Wizara ya Kilimo pamoja na wataalam wa kilimo kubuni mipango ya maendeleo  itakayoleta mageuzi katika sekta hii.

Rais Samia ametoa wito huo leo kwenye uzinduzi wa mashamba makubwa ya pamoja (block farming); utiaji saini mikataba ya utekelezaji wa miradi ya umwagiliaji; na kukabidhi mitambo na magari kwa Tume ya Taifa ya Umwagiliaji iliyofanyika Chinangali, wilayani Chamwino.

Aidha, Rais Samia amesema uzinduzi wa mashamba makubwa ya pamoja ni mwendelezo wa jitihada za Serikali katika kuimarisha upatikanaji wa ajira kwa vijana na wanawake kupitia programu ya Jenga Kesho Iliyo bora (Building a Better Tomorrow - BBT).

Vile vile, Rais Samia amesema Serikali kupitia Wizara ya Kilimo imejidhatiti kuhakikisha mpango huu unakuwa endelevu na unafikia mafanikio yaliyokusudiwa.

Rais Samia Pia amesema miongoni mwa malengo ya Serikali kwa upande wa kilimo cha mazao, uvuvi na ufugaji ni kuwa na kasi ya ukuaji wa sekta kufikia 10% katika pato la taifa ifikapo mwaka 2030 kutoka 3.6% ya hivi sasa.

Halikadhalika, Rais Samia amemtaka Waziri wa Kilimo Mhe. Hussein Bashe kuhakikisha anasimamia kikamilifu fedha zote zinazotolewa katika mradi huo ili iweze kuzalisha bila kufanyiwa ubadhirifu.

Utekelezaji wa Mpango wa Mashamba Makubwa ya Pamoja kupitia BBT umeanzia mkoa wa Dodoma katika Shamba la Chinangali II lenye ekari 400.  Hekta zaidi ya 47,000 zimeshapatikana katika mikoa mingine na upimaji udongo unaendelea ili kutambua mahitaji ya virutubisho.

Rais wa Jamhuri ya Muungano wa Tanzania, Mhe. Samia Suluhu Hassan ametoa wito kwa wanawake kupaza sauti kwa pamoja na kukemea changamoto zinazowakabili wanawake wa Tanzania katika nyanja mbalimbali bila kujali itikadi zao.

Rais Samia ametoa wito huo leo wakati akihutubia katika sherehe ya kilele cha miaka miwili ya uongozi wa Serikali ya Awamu ya Sita, iliyofanyika katika uwanja wa Uhuru.

Aidha, Rais Samia ameahidi kuendelea kutafuta suluhu za changamoto zinazowakabili wanawake na kuwafanya kukosa huduma ikiwemo kujenga shule za wasichana za sayansi na vyuo vya ufundi ili kuwainua wanawake katika masuala ya kiteknolojia.

Kwa upande wa miundombinu, Rais Samia amesema Serikali imeweka bajeti ya kutosha kuiwezesha Wakala wa Barabara Mijini na Vijijini (TARURA) kuendeleza miundombinu ya barabara vijijini.

Vile vile, Rais Samia amesema Serikali inaendelea kuimarisha Bandari za Dar es Salaam, Zanzibar, Tanga, Mtwara na Kigoma ili kuimarisha biashara nchini na ndani ya bara la Afrika kwa ujumla.

Halikadhalika, Rais Samia amesema Serikali itasimamia Tanzania kuwa kinara wa uchumi kwa kumsimamia mwanamke kuzalisha bidhaa mbalimbali zinazouzwa ndani na nje ya nchi kama ilivyopendekezwa na Jukwaa la Usawa wa Kijinsia.

Rais Samia pia ameeleza kuwa changamoto za mabadiliko ya tabia nchi zimesababisha kupanda kwa gharama za bidhaa hivyo, Serikali itaendelea kukabiliana na changamoto hizo kuhakikisha Watanzania wanakuwa na ustawi mzuri wa maisha.

Rais wa Jamhuri ya Muungano wa Tanzania, Mhe. Samia Suluhu Hassan amefanya mabadiliko ya baadhi ya viongozi kwa kuwateua Makatibu Tawala wa Mikoa watatu (3) na kuwahamisha vituo vya kazi wengine watatu (3).  Aidha, Mhe. Rais amefanya uteuzi wa Kamishna wa Mamlaka ya Kudhibiti Dawa za Kulevya.  Mabadiliko hayo ni kama ifuatavyo:-

A: Makatibu Tawala wa Mikoa walioteuliwa:

1. Bw. Ally Senga Gugu kuwa Katibu Tawala wa Mkoa wa Dodoma.  Kabla ya uteuzi huu, Bw. Gugu alikuwa Naibu Katibu Mkuu, Wizara ya Uwekezaji, Viwanda na Biashara.

1.  Bw. Tixon Tuyangine Nzunda kuwa Katibu Tawala Mkoa wa Kilimanjaro.  Bw. Nzunda anachukua nafasi ya Bw. Willy Machumu ambaye amestaafu.

1. Bw. Gerald Msabila Kusaya, kuwa Katibu Tawala wa Mkoa wa Rukwa.  Kabla ya uteuzi huu, Bw. Kusaya alikuwa Kamishna wa Mamlaka ya Kudhibiti Dawa za Kulevya.

1. Bw. Aretas James Lyimo kuwa Kamishna wa Mamlaka ya Kudhibiti Dawa za Kulevya.  Bw. Lyimo anachukua nafasi ya Bw. Gerald Kusaya ambaye ameteuliwa kuwa Katibu Tawala wa Mkoa wa Rukwa.

B: Makatibu Tawala wa Mikoa waliohamishwa vituo:

Mhe. Rais Samia amewahamisha vituo vya kazi Makatibu Tawala wa Mikoa wafuatao:-

1. Dkt. Fatuma Ramadhani Mganga, amehamishwa kutoka Mkoa wa Dodoma kwenda Mkoa wa Singida.  Dkt. Mganga anachukua nafasi ya Bi. Dorothy Aidan Mwaluko ambaye amestaafu.

1. Bw. Rashid Kassim Mchata, amehamishwa kutoka Mkoa wa Rukwa kwenda Mkoa wa Pwani.  Bw. Mchata anachukua nafasi ya Bi. Zuwena Omari Jiri ambaye amehamishiwa Mkoa wa Lindi.

1. Bi. Zuwena Omari Jiri amehamishwa kutoka Mkoa wa Pwani kwenda Mkoa wa Lindi.  Bi. Zuwena anachukua nafasi ya Bw. Ngussa Dismas Samike ambaye atapangiwa kazi nyingine.

Viongozi wote walioteuliwa katika nafasi mpya watajulishwa tarehe ya kuapishwa.

Katika kutekeleza azimio la Viongozi wa nchi za Afrika, kupitia Mkutano wa Utoshelevu na Ustahimilivu wa Chakula (Dakar 2 Summit on Feed Africa: Food Sovereignty and Resilience) uliofanyika Dakar, Senegal tarehe 25 - 27 Januari, 2023, waliazimia kila nchi kuunda Mabaraza ya kusimamia utekelezaji wa mikakati ya kukuza kilimo na kuongeza uzalishaji wa chakula (Presidential Food and Agriculture Delivery Council). Ili kufikia azma hiyo;

Rais wa Jamhuri ya Muungano wa Tanzania, Mhe. Samia Suluhu Hassan ameunda Baraza la Kumshauri Rais kuhusu Utekelezaji wa Masuala ya Kilimo na Chakula (Presidential Food and Agriculture Delivery Council); na amemteua Mhe. Mizengo Kayanza Pinda, Waziri Mkuu Mstaafu wa Jamhuri ya Muungano wa Tanzania, kuwa Mwenyekiti wa Baraza hilo. 

Aidha, Mhe. Rais amewateua Bw. Geoffrey Kirenga, Mkurugenzi Mtendaji wa SAGCOT na Bw. Andrew Masawe, Katibu Mkuu Mstaafu kuwa Wajumbe wa Baraza hilo.

Vile vile Mheshimiwa Rais, amewateua wafuatao kuwa Wajumbe wa Sekretarieti ya Baraza: -

1. Dkt. Florence Turuka, Katibu Mkuu Mstaafu na Mhadhiri wa Chuo Kikuu cha Sokoine cha Kilimo (SUA);  

1. Dkt. Jacqueline Mkindi, Mkurugenzi Mtendaji wa Tanzania Horticulture Association (TAHA); na

1. Dkt. Mwatima Juma, Mwenyekiti wa Tanzania Organic Agricultural Movement (TOAM).

Baraza hilo litazinduliwa tarehe 17 Machi, 2023 Ikulu, Dar es Salaam.

Rais wa Jamhuri ya Muungano wa Tanzania, Mhe. Samia Suluhu Hassan amemteua Bw. Sixtus Mapunda kuwa Mkuu wa Wilaya ya Sumbawanga.  Bw. Mapunda anachukua nafasi ya Bi. Jane Nyamsenda ambaye uteuzi wake umetenguliwa.

Uteuzi huu unaanza mara moja. 

Rais wa Jamhuri ya Muungano wa Tanzania, Mhe. Samia Suluhu Hassan ametoa wito kwa Baraza la Wanawake wa Chadema (BAWACHA) kutumia nguvu ya Chama chao kuungana na kila chama cha siasa kumkomboa mwanamke wa Tanzania.  

Rais Samia amesema hayo wakati akihutubia katika Kongamano la Siku ya Wanawake Duniani lilioandaliwa na BAWACHA katika Ukumbi wa Kuringe. 

Aidha, Rais Samia amesema lengo ni kuona mwanamke wa kitanzania anathaminiwa na kupewa haki kama mwingine yeyote duniani kwa kuwa changamoto hazichagui dini, kabila wala itikadi ya kisiasa.

Rais Samia pia amewataka wanawake kutumia siku hii kutathmini maendeleo ya wanawake na changamoto wanazokabiliana nazo kisiasa, kiuchumi na kijamii ili kupata maridhiano ya haki zao katika usawa wa kijinsia.

Vile vile, Rais Samia amevitaka vyama vya siasa kufanya kazi kwa pamoja na kushikamana ili kukuza siasa za kistaarabu na za kusikilizana zitakazoleta heshima kwa taifa na kustawisha uchumi.

Rais Samia pia amesema alitumia ubunifu kuunganisha taifa kwa kuhakikisha kunakuwa na maridhiano na uvumilivu ili kuleta mageuzi ambayo yameweka msingi mzuri katika mustakbali wa demokrasia na maendeleo ya taifa letu.

Kwa upande mwingine, Rais Samia alitembelea ofisi za Chama cha Mapinduzi (CCM) na kuzungumza na Uongozi wa Mkoa pamoja na wanachama wa mkoa wa Kilimanjaro.

Rais wa Jamhuri ya Muungano wa Tanzania, Mhe. Samia Suluhu Hassan amewataka Viongozi kukumbushana misingi ya uongozi na taratibu za utendaji kazi Serikalini kwa kuzingatia Sheria, Kanuni na Miongozo iliyopo.

Rais Samia amesema hayo leo wakati akifungua Mkutano wa Faragha (Retreat) wa Mawaziri na Makatibu Wakuu uliofanyika katika Ukumbi wa Mikutano wa Kimataifa (AICC).

Aidha, Rais Samia ametoa wito kwa Viongozi hao kuwa na uelewa wa pamoja wa mtazamo na mwelekeo wa Serikali juu ya masuala mbalimbali.

Vile vile, Rais Samia amewataka Viongozi hao kutumia Mkutano huo kukumbushana na kuelekezana juu ya kutimiza ipasavyo wajibu walionao na dhamana walioibeba ya kuwatumikia wananchi.

Rais Samia pia amesema umakini na umahiri unahitajika kwa Viongozi katika kutumia na kusimamia rasilimali watu, vifaa na fedha za umma pamoja na kuwa na mipango na mikakati thabiti ya kutekeleza na kusimamia majukumu yao.

Kwa upande mwingine, Rais Samia amewataka Viongozi hao kuyasemea mafanikio ya Serikali yaliyopatikana na kuwa wepesi kusahihisha kwa wakati upotoshaji unaofanywa dhidi ya Serikali kupitia watumishi na vitengo vya Habari vya wizarani.

Mkutano huo ambao unafanyika kwa mara ya kwanza tangu Rais Samia aingie madarakani, una lengo la kuwakumbusha Viongozi kuhusu dhana ya uongozi na sifa za kiongozi bora na utaratibu wa utoaji wa maamuzi ya kisera ndani ya Serikali.  

Rais wa Jamhuri ya Muungano wa Tanzania, Mhe. Samia Suluhu Hassan amemteua Mhandisi Yahya Ismail Samamba kuwa Katibu Mtendaji  wa Tume ya Madini.

Kabla ya uteuzi huu Mhandisi Yahya Ismail Samamba alikuwa akikaimu nafasi hiyo.

Uteuzi huu umeanza tarehe 27 Februari, 2023. 

Rais wa Jamhuri ya Muungano wa Tanzania, Mhe. Samia Suluhu Hassan amemteua Dkt. Said Ally Mohamed kuwa Katibu Mtendaji wa Baraza la Mitihani la Tanzania. 

Kabla ya uteuzi huu Dkt. Mohamed alikuwa ni Mkurugenzi wa Huduma za Ufundishaji, Mafunzo na Mitihani, Chuo Kikuu Huria cha Tanzania (OUT). 

Uteuzi huu umeanza tarehe 23 Februari, 2023. 

Rais wa Jamhuri ya Muungano wa Tanzania, Mhe. Dkt. Samia Suluhu Hassan, amefanya mabadiliko ya baadhi ya viongozi kwa kuwateua Waziri na Naibu Waziri, Wakuu wa Mikoa, Makatibu Wakuu na Naibu Makatibu Wakuu; kuwahamisha wizara baadhi ya Naibu Mawaziri, Makatibu Wakuu na Naibu Makatibu Wakuu pamoja na kumteua Mkurugenzi wa Uchaguzi. Aidha, Mheshimiwa Rais amefanya uhamisho wa Mkuu wa Mkoa mmoja. Katika mabadiliko hayo, Mheshimwa Rais pia amehamishia majukumu ya Uwekezaji katika Ofisi ya Rais. Vilevile, amefuta nafasi ya Katibu Mkuu (Uvuvi) na badala yake Wizara ya Mifugo na Uvuvi itakuwa na Katibu Mkuu mmoja na Naibu Makatibu Wakuu wawili. Mabadiliko hayo ni kama ifuatavyo:

A: Uteuzi wa Waziri na Naibu Waziri

Mheshimiwa Rais amewateua wafuatao:

1. Mhe. Abdallah Hamis Ulega kuwa Waziri wa Mifugo na Uvuvi. Mhe. Ulega anachukua nafasi ya Mhe. Mashimba Ndaki ambaye uteuzi wake umetenguliwa.

1. Mhe. Hamis Mohamed Mwinjuma kuwa Naibu Waziri wa Utamaduni, Sanaa na Michezo. Mhe. Mwinjuma anachukua nafasi ya Mhe. Pauline Philipo Gekul ambaye amehamishiwa Wizara ya Katiba na Sheria.

B: Uhamisho wa Naibu Mawaziri

Mheshimiwa Rais amewahamisha wizara Naibu Mawaziri wafuatao:

1. Mhe. Pauline Philipo Gekul amehamishwa kutoka Wizara ya Utamaduni, Sanaa na Michezo kwenda kuwa Naibu Waziri wa Katiba na Sheria.

1. Mhe. Geofrey Mizengo Pinda amehamishwa kutoka Wizara ya Katiba na Sheria kwenda kuwa Naibu Waziri wa Ardhi, Nyumba na Maendeleo ya Makazi.

1. Mhe. Ridhiwani Jakaya Kikwete amehamishwa kutoka Wizara ya Ardhi, Nyumba na Maendeleo ya Makazi kwenda kuwa Naibu Waziri wa Nchi Ofisi ya Rais Menejimenti ya Utumishi wa Umma na Utawala Bora.

1. Mhe. Deogratius John Ndejembi amehamishwa kutoka Ofisi ya Rais Menejimenti ya Utumishi wa Umma na Utawala Bora kwenda kuwa Naibu Waziri wa Nchi Ofisi ya Rais TAMISEMI.

1. Mhe. David Ernest Silinde amehamishwa kutoka Ofisi ya Rais TAMISEMI kwenda kuwa Naibu Waziri wa Mifugo na Uvuvi.

C: Uteuzi na Uhamisho wa Wakuu wa Mikoa

Mheshimiwa Rais amewateua Wakuu wa Mikoa wafuatao:

1. Bibi Christina Solomon Mndeme kuwa Mkuu wa Mkoa wa Shinyanga. Bibi Mndeme anachukua nafasi ya Bibi Sophia Edward Mjema ambaye hivi karibuni ameteuliwa kuwa Katibu wa Halmashauri Kuu ya Chama cha Mapinduzi – Itikadi na Uenezi.

1. Dkt. Francis Kasabubu Michael kuwa Mkuu wa Mkoa wa Songwe. Kabla ya uteuzi Dkt. Michael alikuwa Katibu Mkuu Wizara ya Elimu, Sayansi na Teknolojia.

1. Aidha, Mheshimiwa Rais amemhamisha Mhe. Wazir Kindamba kutoka Mkoa wa Songwe kwenda kuwa Mkuu wa Mkoa wa Tanga kuchua nafasi ya Bw. Omary Tebweta Mgumba ambaye uteuzi wake umetenguliwa.

D: Uteuzi na Uhamisho wa Makatibu Wakuu na Naibu Makatibu Wakuu

Mheshimiwa Rais amewateua Makatibu Wakuu wapya wafuatao:

1. Dkt. Tausi Mbaga Kida – Ofisi ya Rais (Uwekezaji)

1. Bw. Juma Selemani Mkomi - Ofisi ya Rais Menejimenti ya Utumishi wa Umma na Utawala Bora

1. Balozi Samwel William Shelukindo - Wizara ya Mambo ya Nje na Ushirikiano wa Afrika Mashariki

1. Prof. Carolyne Ignatius Nombo - Wizara ya Elimu, Sayansi na Teknolojia

1. Bw. Gerald Geofrey Mweli – Wizara ya Kilimo

1. Dkt. Seif Abdallah Shekalaghe – Wizara ya Afya

1. Mhandisi Nadhifa Sadiki Kemikimba – Wizara ya Maji

1. Bw. Kheri Abdul Mahimbali – Wizara ya Madini

1. Bw. Mohamed Abdulla Khamis - Wizara ya Habari, Mawasiliano na Teknolojia ya Habari

Aidha, Mheshimiwa Rais amewabadilisha wizara Makatibu Wakuu wafuatao:

1. Prof. Riziki Sailas Shemdoe kutoka Ofisi ya Rais Tawala za Mikoa na Serikali za Mitaa (TAMISEMI) kwenda Wizara ya Mifugo na Uvuvi

1. Dkt. John Anthony Jingu kutoka Ofisi ya Waziri Mkuu (Sera, Uratibu na Bunge) kwenda Wizara ya Maendeleo ya Jamii, Jinsia, Wanawake na Makundi Maalum

1. Dkt. Jim James Yonazi kutoka Wizara ya Habari, Mawasiliano na Teknolojia ya Habari kwenda Ofisi ya Waziri Mkuu (Sera, Uratibu na Bunge)

1. Bw. Adolf Hyasinth Ndunguru kutoka Wizara ya Madini kwenda Ofisi ya Rais Tawala za Mikoa na Serikali za Mitaa (TAMISEMI)

1. Mhandisi Anthony Damian Sanga kutoka Wizara ya Maji kwenda Wizara ya Ardhi, Nyumba na Maendeleo ya Makazi

Vilevile Mheshimiwa Rais amewateua Naibu Makatibu Wakuu wapya wafuatao:

1. Dkt. Wilson Mahera Charles - Ofisi ya Rais Tawala za Mikoa na Serikali za Mitaa (Afya). Kabla ya uteuzi, Dkt. Charles alikuwa Mkurugenzi wa Uchaguzi.

1. Bw. Sospeter Mambile Mtwale - Ofisi ya Rais Tawala za Mikoa na Serikali za Mitaa (TAMISEMI). Kabla ya uteuzi, Bw. Mtwale alikuwa Afisa Mwandamizi Ofisi ya Rais Ikulu.

1. Dkt. Franklin Jasson Rwezimula - Wizara ya Elimu, Sayansi na Teknolojia (Elimu ya Msingi na Sekondari). Kabla ya uteuzi, Dkt. Rwezimula alikuwa Meneja wa NEMC Kanda ya Kati.

1. Dkt. Hussein Mohamed Omar - Wizara ya Kilimo. Kabla ya uteuzi, Dkt. Omar alikuwa Afisa Mwandamizi Ofisi ya Makamu wa Rais.

1. Bw. Cyprian John Luhemeja - Wizara ya Maji. Kabla ya uteuzi, Bw. Luhemeja alikuwa Afisa Mtendaji Mkuu wa DAWASA.

1. Bi. Lucy Dominico Kabyemera - Wizara ya Ardhi, Nyumba na Maendeleo ya Makazi. Kabla ya uteuzi, Bi Kabyemera alikuwa Mkurugenzi katika Wizara ya Ardhi, Nyumba na Maendeleo ya Makazi.

1. Bw. Anderson Gukwi Mutatembwa - Wizara ya Maliasili na Utalii. Kabla ya uteuzi, Bw. Mutatembwa alikuwa Afisa Mwandamizi Ofisi ya Rais Ikulu.

1. Bw. Athuman Selemani Mbuttuka - Wizara ya Nishati. Kabla ya uteuzi, Bw. Mbuttuka alikuwa Mkaguzi Mkuu wa Ndani.

1. Dkt. Daniel Elius Mushi - Wizara ya Mifugo na Uvuvi (Mifugo). Kabla ya uteuzi, Dkt. Mushi alikuwa Msajili wa Bodi ya Nyama Tanzania.

1. Bibi Agnes Kisaka Meena - Wizara ya Mifugo na Uvuvi (Uvuvi). Kabla ya uteuzi, Bibi Meena alikuwa Mkurugenzi katika Ofisi ya Rais Menejimenti ya Utumishi wa Umma na Utawala Bora.

1. Bw. Selestine Gervas Kakele - Wizara ya Habari, Mawasiliano na Teknolojia ya Habari. Kabla ya uteuzi, Bw. Kakele alikuwa Afisa Mwandamizi Wizara ya Mambo ya Nje na Ushirikiano wa Afrika Mashariki.

Mheshimiwa Rais pia amewahamisha wizara Naibu Makatibu Wakuu wafuatao:

1. Dkt. Grace Elias Maghembe kutoka Ofisi ya Rais Tawala za Mikoa na Serikali za Mitaa (TAMISEMI) kwenda Wizara ya Afya.

1. Bw. Nicholas Merinyo Mkapa kutoka Wizara ya Ardhi, Nyumba na Maendeleo ya Makazi kwenda Wizara ya Utamaduni, Sanaa na Michezo.

E: Uteuzi wa Mkurugenzi wa Uchaguzi

Mheshimiwa Rais amemteua Bw. Ramadhani Kombwey Kailima kuwa Mkurugenzi wa Uchaguzi. Bw. Kailima, anachukua nafasi ya Dkt. Wilson Mahera Charles ambaye ameteuliwa kuwa Naibu Katibu Mkuu Ofisi ya Rais TAMISEMI.

Viongozi wote walioteuliwa katika nafasi mpya pamoja na Naibu Mawaziri waliohamishwa wizara wataapishwa Jumatatu, tarehe 27 Februari, 2023 Ikulu Chamwino, Dodoma.

Rais wa Jamhuri ya Muungano wa Tanzania, Mhe. Samia Suluhu Hassan amefanya uteuzi kama ifuatavyo:-

1. Amemteua Bw. Nehemia Kyando Mchechu, kuwa Msajili wa Hazina.  Kabla ya uteuzi huo Bw. Mchechu alikuwa Mkurugenzi Mkuu wa Shirika la Nyumba la Taifa (NHC).  Bw. Mchechu anachukua nafasi ya Bw. Mgonya Benedicto ambaye atapangiwa kazi nyingine.  

1. Amemteua Bw. Hamad Abdallah, kuwa Mkurugenzi Mkuu wa Shirika la Nyumba la Taifa (NHC). Kabla ya uteuzi huo, Bw. Abdallah alikuwa Mkurugenzi Mtendaji wa Gimcoafrica Limited na anachukua nafasi ya Bw. Mchechu ambaye ameteuliwa kuwa Msajili wa Hazina.

1. Amemteua Bw. Mussa Mohammed Makame, kuwa Mkurugenzi Mtendaji wa Shirika la Maendeleo ya Petroli Tanzania (TPDC).  Kabla ya uteuzi huo, Bw. Makame alikuwa Mjumbe wa Bodi ya Wakurugenzi wa Shirika la Maendeleo ya Petroli Tanzania (TPDC), na pia ni Mshauri Mwelekezi wa masuala ya mafuta na gesi nchini Tanzania. Bw Makame anachukua nafasi ya Dkt. James Mataragio ambaye atapangiwa kazi nyingine.

Uteuzi huu ni kuanzia tarehe 24 Februari, 2023.

Rais wa Jamhuri ya Muungano wa Tanzania, Mhe. Samia Suluhu Hassan amefanya uteuzi kama ifuatavyo:-

1. Amemteua Bw. Antony Diallo kuwa Mwenyekiti wa Bodi ya Wakurugenzi ya Mamlaka ya Udhibiti wa Mbolea Tanzania (TFRA). Bw. Diallo anachukua nafasi ya Prof. Anthony Mshandete ambaye amemaliza muda wake. 

Uteuzi huu umeanza tarehe 09 Februari, 2023.

1. Amemteua Mkuu wa Majeshi Mstaafu Jenerali George Marwa Waitara kwa kipindi kingine kuendelea kuwa Mwenyekiti wa Bodi ya Wadhamini wa Shirika la Hifadhi Tanzania (TANAPA). 

Uteuzi huu umeanza tarehe 13 Februari, 2023. 

Rais wa Jamhuri ya Muungano wa Tanzania, Mhe. Samia Suluhu Hassan amewataka Wakandarasi wazawa walioshinda zabuni kuhakikisha kufanya kazi zenye ubora kwa ufanisi, uaminifu na kufuata makubaliano yaliyofikiwa katika mikataba.

Rais Samia ametoa wito huo leo wakati akishuhudia utiaji saini mikataba ya kuimarisha gridi ya taifa na kusambaza umeme vijijini katika hafla iliyofanyika Ikulu.

Aidha, Rais Samia amewataka Wakandarasi waliokosa kandarasi kuridhika na maamuzi ya zabuni yaliyoamuliwa kwa kuwa kupinga maamuzi hayo kunachelewesha kuanza kwa miradi iliyopitishwa

Vile vile, Rais Samia amezitaka Wizara zinazohusika na malipo ya Wakandarasi wa miradi kuhakikisha wanawalipa kwa wakati pindi wanapokamilisha kazi zao.

Aidha, Rais Samia amesema miradi hii yenye thamani ya shilingi trilioni 1.9 ni ya muhimu kwa wananchi kwa kuwa itaimarisha huduma za maji, kilimo, afya na hivyo kuleta maendeleo.

Shirika la Umeme (TANESCO) limeweka saini mikataba 6 kwa ajili ya miradi 26 ya gridi imara na Wakala wa Umeme Vijijini (REA) imeweka saini mikataba 14 kwa ajili ya miradi ya kupeleka umeme kwenye migodi midogomidogo na maeneo ya kilimo.

Miradi hiyo itapeleka umeme katika maeneo 336 ya uzalishaji mali, vitongoji 1522, vituo vya afya 65 na maeneo 336 yenye vyanzo vya maji ili kujenga uchumi, kuongeza uwekezaji na utoaji huduma za jamii katika ngazi za chini.

Rais wa Jamhuri ya Muungano wa Tanzania, Mhe. Samia Suluhu Hassan ametoa wito kwa vijana kuwa tayari kulitumikia taifa ili kudumisha amani, mshikamano na kuleta maendeleo.

Rais Samia ametoa wito huo leo wakati akizungumza na wawakilishi wa Jumuiya ya Wanafunzi wa Taasisi za Elimu ya Juu Tanzania (TAHLISO) na Zanzibar (ZAHLIFE) katika viwanja vya Ikulu, Chamwino.

Aidha, Rais Samia amewataka wanafunzi kuwa na ufahamu kuhusu mwelekeo wa nchi na aina ya Taifa tunalotaka kulijenga ambalo linajitegemea kiuchumi.

Vile vile, Rais Samia amesema Wizara ya Elimu inapitia mitaala ambayo itaongeza ubora na kuzingatia ujuzi ili wahitimu waweze kujitegemea baada ya kuhitimu masomo yao.

Hali kadhalika, Rais Samia amewataka vijana wa vyuo vikuu kuelewa changamoto kubwa za kidunia zikiwemo mabadiliko ya tabianchi na usalama wa chakula na kutoa elimu kwa jamii kuhusu mikakati ya kukabiliana nazo.

Rais Samia pia amewataka vijana kuwa mstari wa mbele kuielimisha jamii umuhimu wa kuhifadhi mazingira na vyanzo vya maji na kuwahimiza wananchi kuongeza uzalishaji ili pia kunufaika na soko kubwa la bidhaa za chakula duniani.

Serikali inafanya jitihada mbalimbali ili kuinua elimu ya juu ambapo imekamilisha mkataba na Benki ya NMB wa thamani ya shilingi bilioni 200 ili wazazi ambao mishahara yao inapitia benki hiyo waweze kukopa kwa ajili ya vijana wao.

Rais wa Jamhuri ya Muungano wa Tanzania, Mhe. Samia Suluhu Hassan, amemteua Mhandisi Musa Ally Nyamsingwa kuwa Mwenyekiti wa Bodi ya Shirika la Kuhudumia Viwanda Vidogo (SIDO).

Mhandisi Nyamsingwa ni Mkurugenzi wa Idara ya Barabara Kuu na Usafirishaji, Kampuni ya NORPLAN Tanzania Limited.

Uteuzi huu umeanza tarehe 07 Februari, 2023.

Rais wa Jamhuri ya Muungano wa Tanzania, Mhe. Samia Suluhu Hassan amemteua Bw. Ephraim Balozi Mafuru kuwa Mtendaji Mkuu wa Kituo cha Kimataifa cha Mikutano Arusha (AICC).

Kabla ya uteuzi huo Bw. Mafuru alikuwa Mkuu wa Masuala ya Biashara katika kiwanda cha Sukari cha Kilombero, Morogoro.

Uteuzi huu umeanza tarehe 08 Februari, 2023.

Rais wa Jamhuri ya Muungano wa Tanzania, Mhe. Samia Suluhu Hassan amefanya uteuzi kama ifuatavyo:-

1. Amemteua Bi Janet Zebedayo Mbene kuwa Mwenyekiti wa Bodi ya Wakurugenzi wa Wakala wa Nishati Vijijini (REA).

1. Amemteua Bw. James Andilile Mwainyekule kuwa Mkurugenzi Mkuu wa Mamlaka ya Udhibiti wa Huduma za Nishati na Maji (EWURA).  Bw. Mwainyekule ni Mhasibu Mkuu, Tume ya Pamoja ya Fedha, Wizara ya Fedha na Mipango, Dodoma.

1. Amemteua Bw. Rashid Kassim Mchatta kuwa Skauti Mkuu Tanzania.  Bw. Mchatta anachukua nafasi ya Bi. Mwantumu Mahiza ambaye muda wa kutumikia nafasi hiyo umemalizika.

1. Amemteua Bw. Gilead John Teri kuwa Mtendaji Mkuu wa Kituo cha Uwekezaji Tanzania (TIC).  Bw. Teri ni Mshauri Mwandamizi, Umoja wa Ulaya (EU), Copenhagen, Denmark.

1. Amemteua Bw. Damasi Joseph Mfugale kuwa Mkurugenzi Mtendaji wa Bodi ya Utalii Tanzania (TTB). Bw Mfugale ni Mshauri Mwandamizi wa Kampuni ya Afrika Chapter EBI International Consulting Group, Canada.

1. Amewateua Makamishna wa Tume wawili (2) kama ifuatavyo:-

1. Bi. Caroline Joseph Mutahanamilwa kuwa Kamishna wa Tume ya Kurekebisha Sheria Tanzania; na

1. Bw. Idd Ramadhan Mandi kuwa Kamishna wa Tume ya Kurekebisha Sheria Tanzania.

Uteuzi huu umeanza tarehe 01 Februari, 2023.

Rais wa Jamhuri ya Muungano wa Tanzania, Mhe. Samia Suluhu Hassan ameiagiza Wizara ya Katiba na Sheria pamoja na Ofisi ya Mwanasheria Mkuu wa Serikali kushirikiana na Wizara za kisekta kuzifanyia marekebisho sheria zote zenye mizunguko inayochelewesha kesi na upatikanaji wa haki.

Rais Samia ametoa agizo hilo leo katika maadhimisho ya Siku ya Sheria yaliyofanyika katika viwanja vya Chinangali.

Aisha, Rais Samia amesema Sheria mbalimbali zimetoa nafasi ya usuluhishi katika Mabaraza ya Vijiji na Kata hivyo amewataka majaji na Mahakimu kutoa mafunzo kwa kutumia utaratibu wa usuluhishi wa migogoro.

Rais Samia amewaagiza wadau wote katika Sekta ya Sheria kupitia upya taratibu ambazo mashauri hupitia ili kuzifupisha kwa lengo la kuhakikisha upatikanaji wa haki kwa haraka.

Vile vile, Rais Samia amesema anatarajia kuona Watanzania wanatambua kwamba kufikishana mahakamani sio jambo la lazima na badala yake usuluhishi iwe ndio njia ya kwanza kutumika.

Rais Samia pia amesema ni lazima mfumo wa utoaji haki unaochukua muda mrefu kutatua migogoro urekebishwe kwa kuwa ni hatari, huongeza gharama na kuathiri mazingira ya uwekezaji na biashara.

Kwa upande mwingine, Rais Samia ameitaka Ofisi ya Mwanasheria Mkuu wa Serikali kuwachukulia hatua watumishi ambao wanachafua sura na taswira ya muhimili wa Mahakama kwa vitendo viovu vya rushwa, kauli mbaya na hata vitendo vya udhalilishaji kwa wanawake, watoto na wenye uhitaji maalum.

Rais wa Jamhuri ya Muungano wa Tanzania, Mhe. Samia Suluhu Hassan amezitaka Taasisi za Haki Jinai kuendesha na kusimamia haki jinai kwa kuzingatia misingi ya sheria, weledi, usawa, uadilifu pamoja na mila na desturi zetu.

Rais Samia amesema hayo leo wakati akizundua Tume ya Kuangalia Jinsi ya Kuimarisha Taasisi za Haki Jinai katika hafla iliyofanyika leo Ikulu Chamwino.

Aidha, Rais Samia amesema Tume hiyo imeundwa kutokana na kuvurugika kwa mifumo ya haki jinai ambayo inachangiwa na kupuuzwa kwa mifumo ya maadili na hivyo kusababisha baadhi ya wananchi wasio na uwezo kupoteza haki zao.

Taasisi zitakazofanyiwa tathmini na Tume hiyo ni Jeshi la Polisi, Ofisi ya Taifa ya Mashtaka, Taasisi ya Kuzuia na Kupambana na Rushwa (TAKUKURU), Jeshi la Magereza pamoja na Mamlaka ya Kudhibiti na Kupambana na Dawa za Kulevya.

Rais Samia pia ameiagiza Tume hiyo kupitia na kuangalia mifumo ya utendaji ya Taasisi hizo na kufanya mabadiliko ya mafunzo, mifumo ya ajira, matumizi ya TEHAMA pamoja na fikra za kiutendaji na mahusiano kati ya taasisi hizo na raia.

Vile vile, Rais Samia amezitaka taasisi hizo kutoa ushirikiano wa kutosha ili kuweza kufikia malengo yanayokusudiwa.

Tume hiyo yenye Wajumbe 12 itaanza kufanya kazi kuanzia tarehe 01 Februari hadi tarehe 31 Mei, 2023.

Rais wa Jamhuri ya Muungano wa Tanzania, Mhe. Samia Suluhu Hassan amesema Serikali imetenga hadi eka 10 kwa kila kijana mwenye sifa ambapo baadae watazimiliki. 

Rais Samia amesema Tanzania iko katika mchakato wa kupokea maombi kwa kundi la kwanza la vijana watakaopata fursa ya kupata mafunzo ya miezi mitatu kuanzia katikati ya mwezi Februari halafu wagaiwe ardhi. 

Hayo yamesemwa na Rais Samia akijibu swali kuhusu namna ya kuvutia vijana kwenye kilimo, upatikanaji wa ardhi, teknolojia na fedha wakati wa ufunguzi wa mkutano unaohusu Kilimo unaofanyika Dakar nchini Senegal.  

Pamoja na serikali kujidhatiti, Benki ya Maendeleo ya Afrika AfDB imetangaza kutoa mkopo wa dola za Kimarekani milioni 120 kwa ajili ya sekta ya kilimo ikiwemo umwagiliaji na kujenga kituo cha usafirishaji na usambazaji mbolea 

Mpango huo unaolenga vijana na wanawake ujulikanao kwa jina la BBT, ‘Ujenzi wa Kesho Bora’ umeanzisha mfuko wa dhamana kwa vijana na huduma za mikopo nafuu chini ya Mfuko wa Pembejeo. 

Rais Samia amesema Tanzania imeamua kuanzisha mpango huo kutokana na idadi kubwa ya vijana kukosa sifa zinazohitajika na taasisi za fedha wanapoomba mikopo. 

Tangu kuanzishwa kwa mpango huo wa BBT miezi sita iliyopita, tayari imeweza kutenga jumla ya eka 600,000  kwa nchi nzima na shughuli ya kusafisha mashamba hayo imeanza

Rais wa Jamhuri ya Muungano wa Tanzania, Mhe. Samia Suluhu Hassan amefanya uteuzi wa Wakuu wa Wilaya Wapya 37, kuwahamisha vituo vya Kazi Wakuu wa Wilaya 48 na wengine 55 kubakia kwenye vituo vyao.

Kati ya Wakuu wa Wilaya hao 139, Wanawake ni 40 na Wanaume ni 99 ambao ni kama ifuatavyo:

A) WAKUU WA WILAYA WAPYA:

1. Felician Gasper Mtahengerwa – Ameteuliwa kuwa Mkuu wa Wilaya ya Arusha

2. Marko Henry Ngu’mbi – Ameteuliwa kuwa Mkuu wa Wilaya ya Longido

3. Emmanuela Kaganda Mtatifikolo – Ameteuliwa kuwa Mkuu wa Wilaya ya Arumeru.

4. Gerald R. Mongella – Ameteuliwa kuwa Mkuu wa Wilaya ya Chemba

5. Kanali Boniphace Magembe – Ameteuliwa kuwa Mkuu wa Wilaya ya Geita

6. Leah Lucas Ulaya – Ameteuliwa kuwa Mkuu wa Wilaya ya Mbogwe

7. Deusdedith Josephat Katwale – Ameteuliwa kuwa Mkuu wa Wilaya Chato

8. Grace Henry Kingalame – Ameteuliwa kuwa Mkuu wa Wilaya ya Nyang’halwe

9. Dkt. Linda Peniel Salekwa – Ameteuliwa kuwa Mkuu wa Wilaya ya Mufindi

10. Dkt. Abel Mwendawile Nyamahanga – Ameteuliwa kuwa Mkuu wa Wilaya ya Muleba

11. Japhet Mosses Maganga – Ameteuliwa kuwa Mkuu wa Wilaya ya Kyerwa

12. Erasto Yohana Sima – Ameteuliwa kuwa Mkuu wa Wilaya ya Bukoba

13. Julius Kalanga Laiser – Ameteuliwa kuwa Mkuu wa Wilaya ya Karagwe

14. Dinah Elias Mathamani – Ameteuliwa kuwa Mkuu wa Wilaya ya Uvinza

15. Dkt. Christopher David Timbuka – Ameteuliwa kuwa Mkuu wa Wilaya ya Siha

16. Amir Mohamed Mkalipa – Ameteuliwa kuwa Mkuu wa Wilaya ya Hai

17. Kasilda Jeremia Mgeni – Ameteuliwa kuwa Mkuu wa Wilaya ya Same

18. Goodluck Asaph Mlinga – Ameteuliwa kuwa Mkuu wa Wilaya ya Liwale

19. Chistopher E. Ngubiagai – Ameteuliwa kuwa Mkuu wa Wilaya ya Kilwa

20. Beno Morris Malisa – Ameteuliwa kuwa Mkuu wa Wilaya ya Mbeya

21. Josephine Keenja Manase – Ameteuliwa kuwa Mkuu wa Wilaya ya Kyela

22. Jaffar Mohamed Haniu – Ameteuliwa kuwa Mkuu wa Wilaya ya Rungwe

23. Rebeca Sanga Msemwa – Ameteuliwa kuwa Mkuu wa Wilaya ya Morogoro

24. Shaka Hamdu Shaka – Ameteuliwa kuwa Mkuu wa Wilaya ya Kilosa

25. Rachel Stephen Kasanda – Ameteuliwa kuwa Mkuu wa Wilaya ya Magu

26. Hassan Omary Bomboko – Ameteuliwa kuwa Mkuu wa Wilaya ya Ukerewe

27. Victoria Charles Mwanziva – Ameteuliwa kuwa Mkuu wa Wilaya ya Ludewa

28. Kanali Joseph Samwel Kolombo – Ameteuliwa kuwa Mkuu wa Wilaya ya Kibiti

29. Zephania Stephan Sumaye – Ameteuliwa kuwa Mkuu wa Wilaya ya Mafia

30. Lazaro Killian Komba– Ameteuliwa kuwa Mkuu wa Wilaya ya Kalambo

31. Dkt. Jane Chacha Nyamsenda – Ameteuliwa kuwa Mkuu wa Wilaya ya Sumbawanga

32. Wilman Kapenjama Ndile – Ameteuliwa kuwa Mkuu wa Wilaya ya Songea

33. Mboni Mohamed Mhita – Ameteuliwa kuwa Mkuu wa Wilaya ya Kahama

34. Farida Salum Mgomi – Ameteuliwa kuwa Mkuu wa Wilaya ya Ileje

35. Solomon Jonas Itunda – Ameteuliwa kuwa Mkuu wa Wilaya ya Songwe

36. Zakaria Saili Mwansasu – Ameteuliwa kuwa Mkuu wa Wilaya ya Uyui

37. Naitapwaki Lumeya Tukai – Ameteuliwa kuwa Mkuu wa Wilaya ya Nzega

B) WAKUU WA WILAYA WALIOHAMISHWA VITUO VYA KAZI:

1. Suleiman Yusufu Mwenda – Amehamishwa kuwa Mkuu wa Wilaya ya Monduli. Alikuwa Mkuu wa Wilaya ya Iramba.

2. Edward Jonas Mpogolo – Amehamishwa kuwa Mkuu wa Wilaya ya Ilala. Alikuwa Mkuu wa Wilaya ya Same.

3. Halima Abdallah Bulembo – Amehamishwa kuwa Mkuu wa Wilaya ya Kigamboni. Alikuwa Mkuu wa Wilaya ya Muheza.

4. Hashim Abdallah Komba – Amehamishwa kuwa Mkuu wa Wilaya ya Ubungo. Alikuwa Mkuu wa Wilaya ya Nachingwea.

5. Mwanahamisi Athumani Mukunda – Amehamishwa kuwa Mkuu wa Wilaya ya Temeke. Alikuwa Mkuu wa Wilaya ya Bahi.

6. Saadi Ahmed Mtambule – Amehamishwa kuwa Mkuu wa Wilaya ya Kinondoni. Alikuwa Mkuu wa Wilaya ya Mufindi.

7. Sophia Mfaume Kizigo – Amehamishwa kuwa Mkuu wa Wilaya ya Mpwapwa. Alikuwa Mkuu wa Wilaya ya Mkalama.

8. Godwin Crydon Gondwe – Amehamishwa kuwa Mkuu wa Wilaya ya Bahi. Alikuwa Mkuu wa Wilaya ya Kinondoni.

9. Veronica Arbogast Kessy – Amehamishwa kuwa Mkuu wa Wilaya ya Iringa. Alikuwa Mkuu wa Wilaya ya Misungwi.

10. ACP Advera John Bulimba – Amehamishwa kuwa Mkuu wa Wilaya ya Biharamulo. Alikuwa Mkuu wa Wilaya ya Nzega.

11. Majid Hemed Mwanga – Amehamishwa kuwa Mkuu wa Wilaya ya Mlele. Alikuwa Mkuu wa Wilaya ya Kilosa.

12. Salum Hamis Kalli – Amehamishwa kuwa Mkuu wa Wilaya ya Kigoma. Alikuwa Mkuu wa Wilaya ya Magu.

13. Kisare Matiku Makori – Amehamishwa kuwa Mkuu wa Wilaya ya Moshi. Alikuwa Mkuu wa Wilaya ya Uyui.

14. Mohamed Hassan Moyo – Amehamishwa kuwa Mkuu wa Wilaya ya Nachingwea. Alikuwa Mkuu wa Wilaya ya Iringa.

15. Kherry Denis James – Amehamishwa kuwa Mkuu wa Wilaya ya Mbulu. Alikuwa Mkuu wa Wilaya ya Ubungo.

16. Dkt. Vicent Naano Anney – Amehamishwa kuwa Mkuu wa Wilaya ya Bunda. Alikuwa Mkuu wa Wilaya ya Rungwe.

17. Kanali Denis Filangali Mwila – Amehamishwa kuwa Mkuu wa Wilaya ya Mbarali. Alikuwa Mkuu wa Wilaya ya Ukerewe.

18. Sebastian Muungano Waryuba – Amehamishwa kuwa Mkuu wa Wilaya ya Malinyi. Alikuwa Mkuu wa Wilaya ya Sumbawanga.

19. Danstan Dominic Kyobya – Amehamishwa kuwa Mkuu wa Wilaya ya Kilombero. Alikuwa Mkuu wa Wilaya ya Mtwara.

20. Dkt. Julius Keneth Ningu – Amehamishwa kuwa Mkuu wa Wilaya ya Ulanga. Alikuwa Mkuu wa Wilaya ya Namtumbo.

21. Judith Martin Nguli – Amehamishwa kuwa Mkuu wa Wilaya ya Mvomero. Alikuwa Mkuu wa Wilaya ya Liwale.

22. Hanafi Hassan Msabaha – Amehamishwa kuwa Mkuu wa Wilaya ya Mtwara. Alikuwa Mkuu wa Wilaya Uvinza.

23. Lauter John Kanoni – Amehamishwa kuwa Mkuu wa Wilaya ya Masasi. Alikuwa Mkuu wa Wilaya ya Wanging’ombe.

24. Matiko Paul Chacha – Amehamishwa kuwa Mkuu wa Wilaya ya Misungwi. Alikuwa Mkuu wa Wilaya ya Kaliua.

25. Ng’wilabuzu Ndatwa Ludigija – Amehamishwa kuwa Mkuu wa Wilaya ya Kwimba. Alikuwa Mkuu wa Wilaya ya Ilala.

26. Claudia Undalusyege Kitta – Amehamishwa kuwa Mkuu wa Wilaya ya Wanging’ombe. Alikuwa Mkuu wa Wilaya ya Masasi.

27.  Fatma Almas Nyangasa – Amehamishwa kuwa Mkuu wa Wilaya ya Kisarawe. Alikuwa Mkuu wa Wilaya ya Kigamboni.

28. Nick Simon John – Amehamishwa kuwa Mkuu wa Wilaya ya Kibaha. Alikuwa Mkuu wa Wilaya ya Kisarawe.

29. Halima Habib Okash – Amehamishwa kuwa Mkuu wa Wilaya ya Bagamoyo. Alikuwa Mkuu wa Wilaya ya Mvomero.

30. Filberto Hassan Sanga – Amehamishwa kuwa Mkuu wa Wilaya ya Nyasa. Alikuwa Mkuu wa Wilaya ya Mlele.

31. Ngollo Ng’waniduhu Malenya – Amehamishwa kuwa Mkuu wa Wilaya ya Namtumbo. Alikuwa Mkuu wa Wilaya ya Ulanga.

32. Johari Musa Samizi – Amehamishwa kuwa Mkuu wa Wilaya ya Shinyanga. Alikuwa Mkuu wa Wilaya ya Kwimba.

33. Simon Peter Simalenga – Amehamishwa kuwa Mkuu wa Wilaya ya Bariadi. Alikuwa Mkuu wa Wilaya ya Songwe.

34. Anna Jerome Gidarya – Amehamishwa kuwa Mkuu wa Wilaya ya Busega. Alikuwa Mkuu wa Wilaya ya Ileje.

35. Moses Joseph Machali – Amehamishwa kuwa Mkuu wa Wilaya ya Mkalama. Alikuwa Mkuu wa Wilaya ya Bukoba.

36. Thomas Cornel Apson – Amehamishwa kuwa Mkuu wa Wilaya ya Ikungi. Alikuwa Mkuu wa Wilaya ya Siha.

37. Kemilembe Rose Lwota – Amehamishwa kuwa Mkuu wa Wilaya ya Manyoni. Alikuwa Mkuu wa Wilaya ya Biharamulo.

38. Joshua Samwel Nassari – Amehamishwa kuwa Mkuu wa Wilaya ya Iramba. Alikuwa Mkuu wa Wilaya ya Bunda.

39. Esther Alexander Mahawe – Amehamishwa kuwa Mkuu wa Wilaya ya Mbozi. Alikuwa Mkuu wa Wilaya ya Kigoma.

40. Simon Kemori Chacha – Amehamishwa kuwa Mkuu wa Wilaya ya Sikonge. Alikuwa Mkuu wa Wilaya ya Chemba.

41. Dkt. Mohamed Rashid Chuachua – Amehamishwa kuwa Mkuu wa Wilaya ya Kaliua. Alikuwa Mkuu wa Wilaya ya Mbeya.

42. Said Mohamed Mtanda – Amehamishwa kuwa Mkuu wa Wilaya ya Urambo. Alikuwa Mkuu wa Wilaya ya Arusha.

43. Louis Peter Bura – Amehamishwa kuwa Mkuu wa Wilaya ya Tabora. Alikuwa Mkuu wa Wilaya ya Urambo.

44. Jokate Urban Mwegelo – Amehamishwa kuwa Mkuu wa Wilaya ya Korogwe. Alikuwa Mkuu wa Wilaya ya Temeke.

45. Albert Gasper Msando – Amehamishwa kuwa Mkuu wa Wilaya ya Handeni. Alikuwa Mkuu wa Wilaya ya Morogoro.

46. Juma Said Irando – Amehamishwa kuwa Mkuu wa Wilaya ya Muheza. Alikuwa Mkuu wa Wilaya ya Hai.

47. Zainab Abdallah Issa – Amehamishwa kuwa Mkuu wa Wilaya ya Pangani. Alikuwa Mkuu wa Wilaya ya Bagamoyo.

C) WAKUU WA WILAYA WANAOENDELEA NA VITUO VYA KAZI:

1. Dadi Horace Kolimba – Anaendelea kuwa Mkuu wa Wilaya ya Karatu

2. Raymond Stephen Mangwala – Anaendelea kuwa Mkuu wa Wilaya ya Ngorongoro.

3. Dkt. Khamis Athumani Mkanachi – Anaendelea kuwa Mkuu wa Wilaya ya Kondoa.

4. Remedius Mwema Emmanuel – Anaendelea kuwa Mkuu wa Wilaya ya Kongwa.

5. Jabir Mussa Shekimweri– Anaendelea kuwa Mkuu wa Wilaya ya Dodoma

Rais wa Jamhuri ya Muungano wa Tanzania, Mhe.  Samia Suluhu Hassan amefanya utenguzi wa nafasi za Viongozi wafuatao:-

1. Bw. Reuben Ndiza Mfune, Mkuu wa Wilaya ya Mbarali;

1. Bw. Msongela Nitu Palela, Mkurugenzi Mtendaji wa Halmashauri ya Wilaya ya Musoma, Mara;

1. Bw. Michael Augustino Matomora, Mkurugenzi Mtendaji wa Halmashauri ya Wilaya ya Iramba, Singida;

1. Bw. Linno Pius Mwageni, Mkurugenzi Mtendaji wa Halmashauri ya Wilaya ya Ushetu, Shinyanga; na

1. Bw. Sunday Deogratius Ndori, Mkurugenzi Mtendaji wa Halmashauri ya Wilaya ya Ludewa, Njombe.

Utenguzi huu ulianza tarehe 22 Januari, 2023.

Rais wa Jamhuri ya Muungano wa Tanzania, Mhe. Samia Suluhu Hassan amesema sekta ya kilimo nchini inatarajiwa kukua kwa 10% ifikapo mwaka 2030 ukilinganisha na ukuaji wa sasa wa takriban 3.6%.  

Rais Samia amesema Tanzania imetengeneza fursa za kitaifa kwa ajili ya mabadiliko ya mfumo wa chakula unaotarajia kuongeza uzalishaji wa chakula, kuimarisha maisha ya watu na kusaidia kukabiliana na mabadiliko ya hali ya hewa. 

Akichangia kwenye mada inayohusu masuala ya chakula ‘Food Action Partnership: Investing in Greater Resilience’, ikiwa mkutano mwingine wakati wa Jukwaa la Uchumi Duniani, Uswizi Rais Samia alizungumzia dira ya mabadiliko ya kilimo Tanzania. 

Katika kudhibiti mfumo endelevu wa chakula nchini, Rais Samia amesema jitihada kadhaa zimefanyika, ikiwemo kuanzisha mradi kwa ajili ya vijana huku wakiendelea kuimarisha ukuaji wa shoroba za kilimo. 

Jitihada nyingine zilizofanyika kuanzia mwaka huu wa fedha ni pamoja na kuongeza bajeti ya kilimo mara 4 ukilinganisha na ile iliyopita. Aidha, Tanzania inatarajia kuwa mwenyeji wa Jukwaa la Mfumo wa Chakula Afrika mwezi Septemba kudhihirisha maendeleo hayo.  

Mdahalo huo ulihudhuriwa na zaidi ya Viongozi 50 kutoka Afrika, Asia, Ulaya na Marekani kwa nia ya kuongeza kasi ya ushirikiano na uwekezaji kwa ajili ya maendeleo ya kila nchi. 

Wachangiaji wakuu katika mdahalo huo mbali na Rais Samia walikuwa Rais Gustavo Petro wa Colombia, Tran Hong Ha, Naibu Waziri Mkuu wa Vietnam na Bw Alvaro Lario, Rais wa Wakfu wa Kimataifa wa Maendeleo ya Kilimo (IFAD), Roma.

Rais wa Jamhuri ya Muungano wa Tanzania, Mhe. Samia Suluhu Hassan amefanya uteuzi kama ifuatavyo:-

1. Amemteua Prof. Ahmed Mohamed Ame kuwa Mwenyekiti wa Bodi ya Wakurugenzi wa Mamlaka ya Udhibiti Usafiri Ardhini (LATRA).  Prof. Ame anachukua nafasi ya Mhandisi John S. Nduguru. Prof. Ame ni Mhadhiri, Chuo Kikuu cha Dar es Salaam.

1. Amemteua Bw. Eliud Betri Sanga kuwa Mwenyekiti wa Bodi ya Wakurugenzi ya Kampuni ya Airtel Tanzania.  Bw. Sanga anachukua  nafasi ya Gabriel Malata aliyeteuliwa kuwa Jaji. 

Bw. Sanga ni Mkurugenzi wa zamani wa Mfuko wa Hifadhi ya Jamii kwa Watumishi wa Umma (PSSF).

1. Amemteua Jaji (Mstaafu) Mathew Pauwa Mhina Mwaimu kuwa Mwenyekiti na Bw. Mohamed Khamis Hamadi kuwa Makamu Mwenyekiti wa Tume ya Haki za Binadamu na Utawala Bora kwa kipindi cha pili.

Aidha, Rais Samia amewateua Makamishna wa Tume kama ifuatavyo:-

1. Bw. Thomas Paulo Masanja, kuwa Kamishna wa Haki za Binadamu na Utawala Bora.

1. Bi. Amina Talib Ali, kuwa Kamishna wa Haki za Binadamu na Utawala Bora.

1. Bw. Khatibu Mwinyi Khatibu, kuwa Kamishna wa Haki za Binadamu na Utawala Bora.
2. Bw. Nyanda Josiah Shughuli, kuwa Kamishna wa Haki za Binadamu na Utawala Bora.

Utuezi huu ni kuanzia tarehe 15 Januari, 2023.

Rais wa Jamhuri ya Muungano wa Tanzania, Mhe. Samia Suluhu Hassan amesema Serikali imeendelea kutenga fedha kwa ajili ya ustawi wa jamii kama elimu, maji na afya ili wananchi waweze kunufaika na huduma hizo.

Rais Samia ameyasema hayo leo wakati akifungua Skuli ya Msingi ya Mwanakwerekwe katika kuadhimisha miaka 59 ya Mapinduzi Matukufu ya Zanzibar.

Aidha, Rais Samia amesema Serikali itahakikisha wananchi wote wanapata haki yao ya elimu kwa kuimarisha miundombinu ya Skuli ili kuendana na ongezeko la idadi ya watoto wanaohitaji kupatiwa elimu bora.

Rais Samia pia amesema Serikali ya Mapinduzi Zanzibar pamoja na ya Muungano zitahakikisha kunakuwepo mazingira bora ya kujifunza na kufundishia kwa kupunguza msongamano wa wanafunzi darasani ili kufikia lengo la wanafunzi 45 kwa darasa.

Kwa upande mwingine, Rais Samia ameipongeza Wizara ya Elimu Zanzibar kwa kuunda Kikosi Kazi cha kuishauri Serikali mageuzi muhimu ya elimu ambayo yatakidhi mahitaji ya ulimwengu wa sayansi na teknolojia katika karne ya 21.

Vile vile, Rais Samia amesema utekelezaji wa Dira ya Zanzibar ya 2050 pamoja na Mpango wa Maendeleo ya Taifa (Zanzibar Development Plan) unategemea upatikanaji wa wataalamu kupitia sekta ya elimu.

Hivyo, Rais Samia amesema Serikali haina budi kuimarisha wataalamu kwa kuwapatia fani zinazoendana na mahitaji ili kuiwezesha Zanzibar kufaidika na matumizi ya rasilimali ya bahari kupitia mkakati wa kuimarisha Uchumi wa Buluu.

Rais wa Jamhuri ya Muungano wa Tanzania, Mhe.  Samia Suluhu Hassan amefanya uteuzi wa viongozi kama ifuatavyo:-

1. Amemteua Bw. Emmanuel Mpawe Tutuba, Katibu Mkuu Wizara ya Fedha na Mipango kuwa Gavana wa Benki Kuu ya Tanzania (BoT).

Bw. Tutuba anachukua nafasi ya Prof. Florens Luoga ambaye amemaliza kipindi chake.

1. Aidha, amemteua Dkt. Natu El- Maamry Mwamba kuwa Katibu Mkuu Wizara ya Fedha na Mipango.

Dkt. Mwamba alikuwa Mhadhiri Mwandamizi wa Chuo Kikuu cha Dar es Salaam na Mwenyekiti wa Bodi ya Kampuni ya Uendeshaji wa Kiwanja cha Ndege cha Kilimanjaro (KADCO).

Dkt. Mwamba anachukua nafasi ya Bw. Emmanuel M. Tutuba ambaye ameteuliwa kuwa Gavana wa Benki Kuu.

Rais wa Jamhuri ya Muungano wa Tanzania, Mhe. Samia Suluhu Hassan ameteua Wajumbe wa Tume ya Kuangalia Jinsi ya Kuboresha Taasisi za Haki Jinai nchini inayoongozwa na Mwenyekiti Mhe. Jaji Mohamed Othman Chande na Makamu Mwenyekiti, Katibu Mkuu Kiongozi Mstaafu Balozi Ombeni Yohana Sefue kama ifuatavyo:-

1. Jaji Dkt. Eliezer Mbuki Feleshi, Mwanasheria Mkuu wa Serikali;
2. Dkt. Laurean Philomena Ndumbaro, Katibu Mkuu, UTUMISHI;
3. Bw. Said Ally Mwema, Mkuu wa Jeshi la Polisi Mstaafu;
4. Balozi Ernest Jumbe Mangu, Mkuu wa Jeshi la Polisi Mstaafu;
5. Dkt. Edward Gamaya Hoseah, Rais wa Chama cha Wanasheria Tanganyika;
6. Bi. Saada Ibrahim Makungu, Askari Polisi Mstaafu;
7. Bw. Omar Issa, Mwenyekiti wa Bodi ya TANESCO;
8. Bw. Baraka Leonard, Afisa Mwandamizi, Ofisi ya Rais; na
9. Bw. Yahya Khamis Hamad, Mkurugenzi wa Utafiti katika Chuo Kikuu cha Zanzibar na Rais Mstaafu wa Chama cha Wanasheria Zanzibar.