Tovuti Rasmi ya Rais

Rais wa Jamhuri ya Muungano wa Tanzania, Mhe. Samia Suluhu Hassan amewataka Watanzania na mashabiki wa michezo kuweka mbele uzalendo katika michezo kwa maslahi ya taifa.

Rais Samia amesema hayo wakati wa hafla ya chakula cha usiku ya kuipongeza Timu ya Yanga kwa hatua waliyofikia ya kucheza Fainali ya Kombe la Shirikisho Afrika (CAF) iliyofanyika ukumbi wa Jakaya Kikwete, Ikulu.

Aidha, Rais Samia amesema timu yoyote itakayowakilisha Tanzania katika mashindano ya michezo ya kimataifa ichukuliwe kama timu ya taifa na utani wa jadi ufanyike katika mechi za nyumbani pekee.

Vile vile, Rais Samia amesema hatua ya Timu ya Yanga kufika kwenye mashindano ya CAF imeleta heshima na kurejesha nchi katika ramani ya kisoka na michezo kwa ujumla.

Hali kadhalika, Rais Samia amesema Serikali itaendelea kufanya jitihada katika michezo ili kuiwezesha nchi kukaa kwenye ramani ya michezo duniani.

Rais Samia pia amewapongeza wapenzi na mashabiki wa Timu ya Yanga kwa hamasa waliyokuwa wakiitoa kwa wachezaji wa Yanga wakati wa mashindano hayo.

Kwa upande mwingine, Rais Samia ametoa wito kwa Serikali za Mitaa nchini kuweka mkazo katika michezo kwa kuwa na viwanja katika maeneo yao.  

Rais wa Jamhuri ya Muungano wa Tanzania, Mhe. Samia Suluhu Hassan amesema Serikali imeanza kutekeleza mpango wa kukifanya Chuo cha Utumishi wa Umma Kampasi ya Tabora kiweze kutumika kuwanoa Makatibu Mahsusi na Watunza Kumbukumbu kwenye ngazi ya Shahada.

Rais Samia amesema hayo leo wakati wa kufunga mafunzo ya pamoja ya Chama cha Watunza Kumbukumbu na Nyaraka (TRAMPA) na Chama cha Makatibu Mahsusi Tanzania (TAPSEA) katika viwanja vya Fumba.

Aidha, Rais Samia amesema lengo la kupandisha hadhi Chuo hicho ni kuandaa watendaji wenye weledi na viwango vya juu kwa kutumia mitaala mipya.

Rais Samia pia amewasisitiza Watunza Kumbukumbu na Nyaraka na Makatibu Mahsusi kufanya kazi kwa nidhamu, uadilifu na kuzingatia misingi ya utunzaji siri, miongozo na kuheshimu mipaka ya kiutendaji.

Vile vile, Rais Samia amewahimiza kufanya kazi kwa weledi katika taaluma zao na kushirikiana katika utekelezaji wa majukumu yao.

Kwa upande mwingine, Rais Samia amewaelekeza Mawaziri wenye dhamana ya Utumishi wa Umma na Utawala Bora kuzungumza na waajiri katika sekta binafsi ili kuwaruhusu na kuwasaidia wanataaluma kushiriki mafunzo hayo.

Hii ni mara ya kwanza kwa Mkutano huo kuwaleta pamoja Makatibu Mahsusi na Watunza Kumbukumbu na Nyaraka kwa ajili ya kupata mafunzo maalum yenye kuwaongezea tija na ufanisi.

Rais wa Jamhuri ya Muungano wa Tanzania, Mhe. Samia Suluhu Hassan kwa kushirikiana na Kenya na Uganda kupitia Pamoja Bid wamedhamiria kuwa mwenyeji wa michuano ya Fainali za Kombe la Mataifa ya Afrika (African Cup of Nations) 2027.

Rais Samia amesema nchi hizo zinawania nafasi hiyo kwa kutambua mafanikio makubwa ambayo Sekta ya Michezo imepata, hivyo kuwa wenyeji wa AFCON 2027 kutaongeza hamasa zaidi kwa ukuaji wa michezo hususan soka.

Aidha, Rais Samia amesema michuano hii itachangia katika ukuaji wa utalii kwa kuwa ni mashindano ambayo hutazamwa na zaidi ya watu bilioni moja Barani Afrika na maeneo mengi duniani kwa ujumla.

Vile vile, Rais Samia amesema mashindano hayo yataleta watu mashuhuri nchini wenye ushawishi duniani hivyo huwezesha na kunufaisha sekta nyingi za uchumi ambapo huchangia ajira, mapato kwa wafanyabiashara na serikali.  

Kwa upande mwingine Rais Samia amesema Serikali kupitia Wizara ya Utamaduni Sanaa na Michezo kwa kushirikiana na Shirikisho la Mpira wa Miguu Tanzania, imeshafanya utafiti na kuandaa mpango mkakati wa utekelezaji wa maandalizi ya kuwa mwenyeji wa mashindano hayo.

Mashindano ya AFCON yataweka rekodi kwa mara ya kwanza kufanyika katika Ukanda wa Afrika Mashariki tangu yalipoanzishwa rasmi mwaka 1957.

Rais wa Jamhuri ya Muungano wa Tanzania, Mhe. Samia Suluhu Hassan amefanya mabadiliko madogo ya baadhi ya Wakuu wa Mikoa, uteuzi wa Mkuu wa Mkoa, uhamisho wa Wakuu wa Mikoa na uteuzi wa Mkuu wa Wilaya kama ifuatavyo:

1. Amemteua Mhe. Said Mohamed Mtanda kuwa Mkuu wa Mkoa wa Mara. Mhe. Mtanda ni Mkuu wa Wilaya ya Urambo mkoani Tabora. Anachukua nafasi ya Meja Jenerali Suleiman Mungiya Mzee. Meja Jenerali Mzee atapangiwa majukumu mengine.

1. Mhe. Queen Cuthbert Sendiga amehamishiwa kuwa Mkuu wa Mkoa wa Manyara. Mhe. Sendiga ni Mkuu wa Mkoa wa Rukwa, anachukua nafasi ya Mhe. Nyerere ambaye amehamishiwa mkoa wa Rukwa.

1. Mhe. Charles Makongoro Nyerere amehamishiwa kuwa Mkuu wa Mkoa wa Rukwa. Mhe. Nyerere ni Mkuu wa Mkoa wa Manyara, anachukua nafasi ya Mhe. Sendiga ambaye amehamishiwa mkoa wa Manyara.

1. Amemteua Bw. Kenani Kihongosi kuwa Mkuu wa Wilaya ya Urambo. Anachukua nafasi ya Mhe. Mtanda ambaye ameteuliwa kuwa Mkuu wa Mkoa wa Mara.

Mabadiliko, uhamisho na uteuzi huu unaanza mara moja.

Uapisho wa Mkuu wa Mkoa mpya utafanyika tarehe 24 Mei, 2023 saa 10:00 jioni, Ikulu Chamwino.

Rais wa Jamhuri ya Muungano wa Tanzania, Mhe. Samia Suluhu Hassan amefanya uteuzi wa Mabalozi kama ifuatavyo:

1. Amemteua Meja Jenerali Ramson Godwin Mwaisaka kuwa Balozi. Kabla ya uteuzi huo, Meja Jenerali Mwaisaka alikuwa Mkuu wa Kamandi ya Jeshi la Wanamaji (JWTZ).

1. Amemteua Meja Jenerali Paul Kisesa Simuli kuwa Balozi. Kabla ya uteuzi huo Meja Jenerali Simuli alikuwa Mkuu wa Utumishi Jeshini (JWTZ).

1. Amemteua Bw. Mohamed Awesu kuwa Balozi. Kabla ya uteuzi huo Bw. Awesu alikuwa Konseli Mkuu, Konseli ya Tanzania, Jeddah Saudia Arabia.

1. Amemteua Bw. Gelasius Byakanwa kuwa Balozi. Kabla ya uteuzi huo Bw. Byakanwa alikuwa Afisa Mkuu Ubalozi wa Tanzania, Korea ya Kusini.

1. Amemteua Dkt. Mohamed Juma Abdallah kuwa Balozi. Kabla ya uteuzi huo Dkt. Abdallah alikuwa Katibu Tawala Mkoa wa Kaskazini Unguja.

1. Amemteua Bw. Hassan Mwamweta kuwa Balozi. Kabla ya uteuzi huo Bw. Mwamweta alikuwa Afisa Mambo ya Nje Mwandamizi na Mkuu wa Utawala, Ubalozi wa Tanzania, Uturuki.

1. Amemteua Bw. Imani Salum Njalikai kuwa Balozi. Kabla ya uteuzi huo Bw. Njalikai alikuwa Afisa wa Mambo ya Nje Mkuu na Msaidizi wa Waziri Mkuu – Hotuba

1. Amemteua Bw. Khamis Mussa Omar kuwa Balozi. Kabla ya uteuzi huo Bw. Mussa alikuwa Kaimu Mwakilishi wa Kudumu, Ubalozi wa Tanzania Ufaransa.

Uteuzi huu wa Mabalozi umeanza tarehe 10 Mei, 2023 na wataapishwa kwa tarehe        itakayopangwa baadae.

Rais wa Jamhuri ya Muungano wa Tanzania, Mhe. Samia Suluhu Hassan, amemteua Bw. Moremi Marwa kuwa Mwenyekiti wa Bodi ya Wakurugenzi wa Mamlaka ya Usimamizi wa Bima (TIRA). 

Bw. Marwa ni Mtendaji Mkuu wa Shirika la Uzalishaji Mali la Magereza (SHIMA). 

Uteuzi huu umeanza tarehe 14 Mei, 2023.

Rais wa Jamhuri ya Muungano wa Tanzania, Mhe. Samia Suluhu Hassan ametuma salamu za rambirambi kwa Mkuu wa Mkoa wa Morogoro, Mhe. Adam Kighoma Malima kutokana na vifo vya watu wawili katika ajali ya ndege.

Ajali hiyo imetokea leo saa 5:30 asubuhi katika kiwanja cha ndege cha Matambwe kwenye Hifadhi ya Taifa ya Nyerere  mkoani humo na kusababisha vifo vya watu wawili na majeruhi wawili.

Kwa mujibu wa Wizara ya Maliasili na Utalii, ndege aina ya Cessina 192 5H-FZS ikiwa na abiria watatu (3) na rubani 1 ilipata ajali wakati ikiruka katika kiwanja hicho.

Katika ajali hiyo askari wawili wamejeruhiwa na hali zao sio nzuri ambapo baada ya kuokolewa walikimbizwa zahanati kwa ajili ya kupata huduma ya kwanza huku wakisubiri ndege ya kuwapeleka Hospitali ya Taifa ya Muhimbili kwa ajili ya matibabu zaidi.

Aidha, miili ya marehemu imehifadhiwa kwa muda katika zahanati ya hifadhi hiyo.

Rais Samia anawapa pole wafiwa wote na anaungana na familia hizo katika kipindi hiki kigumu cha majonzi.

Mungu azilaze roho za marehemu wote mahali pema peponi. Amina.

Rais wa Jamhuri ya Muungano wa Tanzania, Mhe. Samia Suluhu Hassan, amewateua Majaji wa Mahakama ya Rufaa wafuatao:- 

1. Amemteua Jaji Zainab Goronya Muruke kuwa Jaji wa Mahakama ya Rufani. Kabla ya uteuzi huo, Jaji Muruke alikuwa Jaji Mfawidhi, Kituo Jumuishi cha Mashauri ya Ndoa, Talaka na Mirathi – Temeke, Dar es Salaam;

1. Amemteua Jaji Dkt. Benhajj Shaaban Masoud kuwa Jaji wa Mahakama ya Rufani.  Kabla ya uteuzi huo, Jaji Masoud alikuwa Mkuu wa Shule ya Sheria Tanzania;

1. Amemteua Jaji Amour Said Khamis kuwa Jaji wa Mahakama ya Rufani. Kabla ya uteuzi huo, Jaji Khamis alikuwa Jaji Mfawidhi, Mahakama Kuu, Kanda ya Tabora;

1. Amemteua Jaji Leila Edith Mgonya kuwa Jaji wa Mahakama ya Rufani.  Kabla ya uteuzi huo, Jaji Mgonya alikuwa Jaji wa Mahakama Kuu, Masijala Kuu Dar es Salaam;

1. Amemteua Jaji Gerson John Mdemu kuwa Jaji wa Mahakama ya Rufani. Kabla ya uteuzi huo, Jaji Mdemu alikuwa Jaji Mfawidhi, Mahakama Kuu Kanda ya Dodoma; na

1. Amemteua Jaji Agnes Zephania Mgeyekwa kuwa Jaji wa Mahakama ya Rufani. Kabla ya uteuzi huo, Jaji Mgeyekwa alikuwa Jaji Mfawidhi, Mahakama Kuu Divisheni ya Ardhi.

Uteuzi huu wa Majaji wa Mahakama ya Rufani umeanza tarehe 28 Aprili, 2023 na wataapishwa kwa tarehe itakayopangwa baadae.

Rais wa Jamhuri ya Muungano wa Tanzania, Mhe. Samia Suluhu Hassan amefanya uhamisho wa baadhi ya Wakuu wa Mikoa kama ifuatavyo:

1. Bw. Amos Gabriel Makalla amehamishiwa kuwa Mkuu wa Mkoa wa Mwanza. Alikuwa Mkuu wa Mkoa wa Dar es Salaam.

1. Bw. Adam Kighoma Malima amehamishiwa kuwa Mkuu wa Mkoa wa Morogoro. Alikuwa Mkuu wa Mkoa wa Mwanza.

1. Bi Fatma Abubakar Mwassa amehamishiwa kuwa Mkuu wa Mkoa wa Kagera. Alikuwa Mkuu wa Mkoa wa Morogoro.

1. Bw. Albert John Chalamila amehamishiwa kuwa Mkuu wa Mkoa wa Dar es Salaam. Alikuwa Mkuu wa Mkoa wa Kagera.

Uhamisho huu wa Wakuu wa Mikoa unaanza mara moja.

Rais wa Jamhuri ya Muungano wa Tanzania, Mhe. Samia Suluhu Hassan ametoa wito kwa Makampuni ya simu kubuni teknolojia ya gharama nafuu itakayowezesha kila Mtanzania kupata huduma ya mawasiliano popote alipo nchini.

Rais Samia ametoa wito huo leo wakati wa utiaji saini mikataba ya upelekaji huduma za mawasiliano nchini kati ya Mfuko wa Mawasiliano kwa Wote (UCSAF) na watoa huduma za mawasiliano uliofanyika katika ukumbi wa Jakaya Kikwete.

Aidha, Rais Samia ameyataka Makampuni hayo kuleta teknolojia inayoendana na mazingira ya Tanzania kwa kuwa zipo changamoto zinazotokana na hali ya kijiografia na kipato kidogo cha wananchi katika baadhi ya maeneo.

Rais Samia pia amewataka Wakala wa Barabara Mijini na Vijijini (TARURA) kushirikiana na UCSAF na wakandarasi kuhakikisha njia zinapitika katika maeneo ya vijijini inapokwenda kujengwa minara hiyo.

Hali kadhalika, Rais Samia amewataka Wakala wa Nishati Vijijini (REA) kuhakikisha kuwa minara inayokwenda kujengwa vijijini inapelekewa umeme ili faida inayokusudiwa ipatikane haraka.

Kwa upande mwingine, Rais Samia amesema kuwepo kwa huduma bora za mawasiliano hususan katika maeneo ya vijijini ni muhimu sana kiuchumi, kisiasa, kijamii, kiutamaduni na hata katika masuala ya ulinzi na usalama wa nchi yetu.

Miradi miwili iliyotiwa saini ni ya ujenzi wa minara 758 katika Kata 713 wenye gharama ya Shilingi bilioni 265.3 pamoja na mradi wa kuongeza uwezo wa minara 304 ya mawasiliano utakaogharimu kiasi cha Shilingi bilioni 10.2.

Rais wa Jamhuri ya Muungano wa Tanzania, Mhe. Samia Suluhu Hassan, amemteua Bw. Mussa Mohamed Makame, Mkurugenzi Mtendaji, Shirika la Maendeleo ya Petroli Tanzania (TPDC) kuwa Mwenyekiti wa Bodi ya Ushauri na Uwekezaji wa Mfuko wa Mafuta na Gesi (Portfolio Investment Advisory Board).  Aidha, Mheshimiwa Rais amewateua Wajumbe wa Bodi hiyo kama ifuatavyo:-: 

1. Dkt. Suleiman Magema Missango – Mkurugenzi, Kurugenzi ya Utafiti na Sera, Benki Kuu ya Tanzania (BoT);

1. Bw. Safiel Fahamuel Msovu – Afisa Fedha Mwandamizi, Shirika la Maendeleo ya Petroli Tanzania (TPDC);

1. Bw. Shogholo Charles Msangi – Mkurugenzi wa Kampuni ya Express Microfinance Company Ltd; na

1. Bi. Mwanaidi Athuman Mtanda – alikuwa Mhasibu Mkuu wa Serikali.

Uteuzi huu umeanza tarehe 11 Mei, 2023

Rais wa Jamhuri ya Muungano wa Tanzania, Mhe. Samia Suluhu Hassan amefanya uteuzi kama ifuatavyo:-

1. Amemteua Prof. Elifas Tozo Bisanda kuwa Mwenyekiti wa Tume ya Taifa ya UNESCO ya Jamhuri ya Muungano wa Tanzania.  Prof. Bisanda ameteuliwa kuwa Mwenyekiti wa Tume hiyo kwa kipindi cha pili.

1. Amemteua Mhandisi Abdallah Mohamed Mkufunzi kuwa Mwenyekiti wa Bodi ya Wakurugenzi ya Mfuko wa Maji.

Uteuzi wa Wenyeviti hao umeanza tarehe 05 Mei, 2023.

Rais wa Jamhuri ya Muungano wa Tanzania, Mhe. Samia Suluhu Hassan amehudhuria Mkutano wa kujadili hali ya Usalama wa Mashariki mwa nchi ya Jamhuri ya Kidemokrasia ya Kongo (DRC).

Mkutano huo wa dharura wa Wakuu wa Nchi na Serikali wa Jumuiya ya Maendeleo Kusini mwa Afrika (SADC) Troika na Nchi zinazochangia Vikosi vya Jeshi vya Force Intervention Brigade (FIB) umefanyika leo mjini Windhoek nchini Namibia.

Aidha, mkutano huo umetoa tena wito kwa vikundi vyenye silaha kusitisha uhasama na kujiondoa bila masharti katika maeneo wanayoyashikilia nchini humo.

Mkutano huo pia umewasihi wanachama wa SADC kuunga mkono Serikali ya DRC na kushughulikia hali ya usalama ya Mashariki mwa nchi hiyo kabla ya Uchaguzi Mkuu unaotarajiwa kufanyika mwezi Desemba 2023.

Vile vile mkutano huo umesisitiza uungwaji mkono wa DRC katika mapambano dhidi ya makundi ya kijeshi Mashariki mwa nchi hiyo ili kuleta amani endelevu, usalama na ustawi kwa wananchi  wa Kongo na Jumuiya ya SADC kwa ujumla.

Kwa upande mwingine, mkutano huo umeidhinisha kupeleka Kikosi cha Jeshi la SADC kutoka katika Kikosi cha Kudumu cha Jumuiya hiyo ili kuiunga mkono DRC iweze kurejesha amani na usalama.  

Mkutano huo pia umehudhuriwa na viongozi mbalimbali wakiwemo Rais wa Namibia Mhe. Dkt. Hage Geingo; Rais wa Afrika Kusini Mhe. Cyril Ramaphosa; Rais wa DRC Mhe. Félix Antoine Tshisekedi;  Waziri wa Mahusiano ya Mambo ya Nje wa Jamhuri ya Angola Mhe. Balozi Téte António; Waziri wa Ulinzi wa Jamhuri ya Malawi Mhe. Harry Mkandawire; pamoja na  Balozi wa Zambia nchini Namibia Mhe. Stephen Katuka.

Rais wa Jamhuri wa Muungano wa Tanzania, Mhes. Samia Suluhu Hassan amemuagiza Msajili wa Vyama vya Siasa Jaji Francis Mutungi, kuitisha kikao maalum cha Baraza la Vyama vya Siasa.

Lengo ni kuwashirikisha wadau katika kutathmini utekelezaji wa mapendekezo ya Kikosi Kazi kilichokuwa kikiratibu maoni ya watu kuhusu demokrasia ya vyama vingi vya siasa nchini.

Rais Samia ametoa maelekezo hayo wakati wa kikao kilichofanyika Ikulu ya Chamwino, kilichohudhuriwa na viongozi mbalimbali wa serikali kuhusu kuanza kwa mchakato wa Katiba mpya.

Kikao hicho kimejadili namna ya kushirikisha wadau mbalimbali na hasa ushirikishwaji wa wananchi katika mchakato huo kutoka pande zote mbili Tanzania Bara na Zanzibar.

Mbali na mchakato huo wa Katiba mpya, masuala mengine yanayotarajiwa kushughulikiwa ni marekebisho ya sheria mbalimbali zinazohusiana na uchaguzi; zikiwemo Sheria ya Tume ya Taifa ya Uchaguzi na Sheria ya Vyama vya Siasa.

Miongoni mwa viongozi waliohudhuria kikao hicho ni pamoja na Waziri wa Nchi, Ofisi ya Waziri Mkuu (Sera, Uratibu na Bunge) Mhe. Jenista Mhagama, Waziri wa Katiba na Sheria Mhe. Dkt. Damas Ndumbaro na watendaji wa taasisi mbalimbali.

Rais wa Jamhuri ya Muungano wa Tanzania, Mhe. Samia Suluhu Hassan, amefanya uteuzi wa Mwenyekiti wa Baraza la Maadili, ambapo amemteua Jaji Mstaafu Rose Teemba kuwa Mwenyekiti wa Baraza hilo kuanzia tarehe 24 Aprili, 2023.

Jaji Mstaafu Teemba anachukua nafasi ya Jaji Mstaafu Ibrahim Mipawa

ambaye amemaliza muda wake.

Rais wa Jamhuri ya Muungano wa Tanzania, Mhe. Samia Suluhu Hassan amesema Tanzania itaendelea kuweka miundombinu ya kukuza biashara na Rwanda ili kuinua kiwango cha biashara kilichopo.

Rais Samia amesema hayo leo wakati yeye pamoja na mgeni wake Rais wa Jamhuri ya Rwanda, Mhe. Paul Kagame wakizungumza na vyombo vya habari Ikulu Jijini Dar es Salaam.

Aidha, Rais Samia amesema kulingana na uhusiano uliopo kati ya Tanzania na Rwanda kiwango cha biashara kilichopo hakiendani na rasilimali zilizopo katika nchi hizo mbili.  

Rais Samia pia amesema kwa hivi sasa Tanzania inafanya kazi ya kuimarisha bandari za Dar es Salaam na Tanga na kuimarisha njia nyingine za mawasiliano ili iweze kutoa huduma kwa ufanisi kwa Rwanda pamoja na nchi nyingine zinazoizunguka.

Kwa upande wake Rais Kagame amesema nchi hizo mbili zimejidhatiti kuendeleza ushirikiano na uhusiano wa kiuchumi na kihistoria uliopo ili kuimarisha maisha ya wananchi wake.

Vile vile, Rais Kagame amemshukuru Rais Samia kwa Uongozi wake na kujitoa kwake katika kutafuta suluhu ya changamoto zinazozikabili nchi za ukanda wa Afrika Mashariki ikiwemo Mashariki mwa Jamhuri ya Kidemokrasia ya Kongo (DRC).

Rais Kagame yuko nchini Tanzania kwa ziara ya kikazi ya siku mbili ambapo amejadili na Rais Samia masuala ya biashara, nishati na miundombinu, ulinzi na usalama pamoja na kukuza na kuimarisha uhusiano na ushirikiano wa mataifa hayo mawili.

Rais wa Jamhuri ya Muungano wa Tanzania, Mhe. Samia Suluhu Hassan amefanya uteuzi kama ifuatavyo:-

1. Amemteua Jaji George Masaju kuwa Mshauri wa Rais, Masuala ya Sheria (Advisor to the President – Legal Affairs).  Jaji Masaju ni Jaji wa Mahakama Kuu Kanda ya Dodoma.  Uteuzi huu umeanza tarehe 20 Aprili, 2023; na

1. Dkt. Richard Stanslaus Muyungi kuwa Mshauri wa Rais, Masuala ya Mabadiliko ya Tabianchi na Mazingira (Advisor to the President – Climate Change and Environment).  Kabla ya uteuzi huu Dkt. Muyungi alikuwa Meneja wa Mazingira, katika Shirika la Umeme Tanzania (TANESCO).  Uteuzi huu umeanza tarehe 19 Aprili, 2023.

Rais wa Jamhuri ya Muungano wa Tanzania, Mhe. Samia Suluhu Hassan amemteua Balozi Khamis Sued Kagasheki kuwa Mwenyekiti wa Bodi ya Parole kuanzia tarehe 18 Aprili, 2023.

Rais wa Jamhuri ya Muungano wa Tanzania, Mhe. Samia Suluhu Hassan ametengua uteuzi wa Bw. Sekiete Yahaya Selemani, Mkurugenzi wa Halmashauri ya Jiji la Mwanza kuanzia tarehe 16 Aprili, 2023.

Rais wa Jamhuri ya Muungano wa Tanzania, Mhe. Samia Suluhu Hassan amewataka Viongozi katika maeneo yaliyogunduliwa madini kusimamia vyema miradi hiyo ili itekelezwe ipasavyo na kulinufaisha taifa.

Rais Samia ametoa tamko hilo leo Ikulu, Chamwino wakati wa utiaji saini ya makubaliano baina ya Serikali na kampuni za uchimbaji madini za Evolution Energy Minerals Limited, EcoGraf Limited, na Peak Rare Earth Limited zote kutoka Perth Australia.

Aidha, Rais Samia amewataka Viongozi na taasisi za Serikali kushirikisha wananchi katika maeneo ya migodi ili waweze kutoa huduma mbalimbali.

Rais Samia pia amesema madini ya Kinywe na adimu yaliyogunduliwa ni madini muhimu ya kimkakati duniani ambapo yanahitajika katika teknolojia mpya za kukabiliana na mabadiliko ya tabia nchi.  

Vile vile, Rais Samia amesema katika siku zijazo Tanzania itakuwa kitovu cha uzalishaji na usafishaji wa madini hayo na hivyo kuweza kuvutia uwekezaji mahiri na kuendelea kunufaika na fursa zilizojitokeza.  

Hali kadhalika, Rais Samia amesema kutokana na juhudi zilizofanywa na Serikali, ukuaji wa Sekta ya Madini na mchango wake katika pato la taifa umeendelea kuimarika na unatarajia kuwa zaidi ya 10% kama inavyoainishwa kwenye Dira ya Taifa ya Maendeleo 2025.

Madini hayo ya kipekee na adimu kupatikana yamegundulika katika maeneo ya Chilalo Wilayani Lindi, Epanko Wilayani Ulanga, na Nguala Wilayani Songwe.