Rais wa Jamhuri ya Muungano wa Tanzania Mhe. Samia Suluhu Hassan, tarehe 28 Desemba, 2021 ameshuhudia utiaji Saini Mkataba wa Ujenzi wa Reli ya Kisasa (SGR) kwa kipande cha tatu kutoka Makutupora (Singida) hadi Tabora chenye urefu wa kilometa 368.

Utiaji Saini Mkataba huo umefanywa kati ya Serikali kupitia kwa Mkurugenzi Mkuu wa Shirika la Reli nchini (TRC) Bw. Masanja Kadogosa Pamoja na Makamu Mwenyekiti wa Kampuni ya Ujenzi ya Yapi Merkezi Bw. Erdem Arioglu kutoka Uturuki katika hafla iliyofanyika Ikulu, Jijini Dar es Salaam.

Ujenzi wa kipande hicho cha kutoka Makutupora (Singida) hadi Tabora utagharimu kiasi cha shilingi trilioni 4.41 ikujumuisha Kodi ya Ongezeko la Thamani (VAT) na kufanya uwekezaji wa ujenzi wa vipande vinne kati ya vitano vya ujenzi wa reli ya kisasa unaoendelea kutoka Dar es Salaam hadi Mwanza kufikia kiasi cha shilingi trilioni 14.7.

Mhe. Rais Samia amesema Serikali itahakikisha inaangalia namna yoyote na njia rahisi kwa ajilli ya kuchukua mikopo ya masharti nafuu itakayotufaa ili iweze kukamilisha miradi mbalimbali mikubwa ya maendeleo ukiwemo ujenzi wa Reli ya Kisasa (SGR).

Aidha, Mhe. Rais Samia amebainisha kuwa fedha zinazokusanywa za tozo au kodi za ndani haziwezi kugharamia miradi mikubwa hivyo suala la kukopa litasaidia kumaliza hata miradi mbalimbali ikiwemo ujenzi huo wa Reli ya Kisasa kutoka Makutupora hadi Tabora.

Amesema kwa sasa Serikali imewekeza kiasi cha shilingi trilioni 14.7 hivyo tusipoendelea na ujenzi wa Miradi hiyo ya reli ya SGR fedha zilizokwishawekezwa zitakua hazina maana iwapo Serikali haitakopa ili kukamilisha miradi huo.

Mhe. Rais Samia amesema miradi yote mikubwa ikiwemo Ujenzi wa Bwawa la kufua umeme la Mwalimu Nyerere unaendelea vizuri na mpaka sasa Serikali haidaiwi fedha zozozte na Makandarasi katika miradi hiyo mikubwa.

Aidha, Mhe. Rais Samia ameiagiza Wizara ya Ujenzi na Uchukuzi kupitia Shirika la Reli Nchini (TRC) kukamilisha taratibu za manunuzi kwa ajili ya kumpata mkandarasi wa ujenzi wa kipande kilichobaki cha Tabora hadi Isaka na kipande kipya cha Awamu ya Pili ya ujenzi wa reli ya SGR kutoka Tabora hadi Kigoma.

Mhe. Rais Samia amesema pia Serikali imepanga kuendelea na ujenzi wa reli ya kisasa (SGR) kwa kipande cha kutoka sehemu ya Kaliua, Mpanda hadi Bandari kubwa ya Karema kuwa kiunganishi na bandari ya Kalemie kwa upande wa nchi ya Jamhuri ya Kidemokrasia ya Kongo (DRC).

Pia, Mhe. Rais Samia amesema Serikali imepanga kujenga vipande vya reli vya kutoka Uvinza hadi Musongati (Burundi) na kuelekea hadi DRC, Isaka hadi Kigali (Rwanda), ambapo vipande hivyo vya reli vitajengwa kwa ushirikiano na nchi za Burundi, DRC na Rwanda ambapo kwa sasa mazungumzo ya namna ya kuchangia ujenzi yanaendelea.

Vile vile, Mhe. Rais Samia ameziomba Taasisi mbalimbali za fedha ulimwenguni kushiriki katika kugharamia ujenzi huo kwa kuwa utasaidia kuunganisha Tanzania na nchi jirani zinazotumia Bandari ya Dar es Salaam kusafirisha mizigo yao.

Mhe. Rais Samia amesema kukamilika kwa miradi hiyo kutaifanya Tanzania kuweka misingi mizuri katika ukuaji wa uchumi wake kwasababu miundombinu ya reli na bandari itadumu kwa muda mrefu.

Rais wa Jamhuri ya Muungano wa Tanzania Mhe. Samia Suluhu Hassan, amesema ameamua kuiondoa Idara Kuu ya Maendeleo ya Jamii kutoka Wizara ya Afya ili iweze kufanyakazi kwa ufanisi zaidi.

Mhe. Rais Samia amesema hayo leo tarehe 16 Desemba, 2021 wakati wa uzinduzi wa Kamati ya Ushauri ya Kitaifa ya Utekelezaji wa Ahadi za Nchi kuhusu Kizazi chenye Usawa, Jijini Dodoma.

Pia, Mhe. Rais Samia amesema Wizara ya Afya ina mambo mengi hivyo ni muhimu kuitenga kwasababu sekta ya afya peke yake inachukua sura kubwa ya wizara, hivyo ikitenganishwa itafanya kazi zake vizuri na kupitia hilo atamshauri Rais wa Zanzibar naye afanye mabadiliko hayo.

Akizungumza kuhusu Jukwaa la sasa la Kizazi chenye Usawa, Mhe. Rais Samia amesema kuwa huo ni mwendelezo wa jitihada mbalimbali zinazofanywa na Umoja wa Mataifa katika kuhakikisha hakuna mtu anayeachwa nyuma kimaendeleo pamoja na kuhakikisha lengo namba 5 la Malengo ya Maendeleo Endelevu (Usawa wa Jinsia na Uwezeshaji wa Wanawake na Wasichana).

Mhe. Rais Samia amesema wanawake ambao wanafikia asilimia 50 ya nguvu kazi ya taifa bado ni waathirika wakuu wa mabadiliko ya kiuchumi na kisiasa yanayoendelea katika maeneo mbalimbali.

Aidha, Mhe. Rais Samia amesema licha ya kuwa Wanawake ni washirika muhimu katika kufanikisha Malengo ya dunia kama vile kutokomeza njaa, afya na elimu bora, maji safi na salama, usafi wa mazingira na ukuaji wa uchumi bado kwa kiasi kikubwa ukuaji wao kiuchumi, kijamii na kisiasa haujawekwa vyema kwenye mipango mbalimbali ya Maendeleo na inapowekwa haitekelezwi ipasavyo.

Pia, Mhe. Rais Samia amesema pamoja na kuwa nusu ya sehemu ya watu duniani ni wanawake, lakini bado sehemu kubwa ya dunia haijatoa nafasi stahiki kuitumia ipaswavyo nguvu kazi ya wanawake. Pia amebainisha kuwa iwapo wanawake watatumiwa kikamilifu wana uwezo wa kuchangia uchumi wa dunia kwa takriban dola trilioni 28 kwa mwaka.

Mhe. Rais amesema Serikali imeridhia na inatekeleza Mikataba na Maazimio ya Kikanda na Kimataifa ikiwemo Mkataba wa kutokomeza aina zote za ubaguzi kwa wanawake wa mwaka 1978, Azimio la Beijing la mwaka 1995, Mkataba wa Kimataifa wa Haki za Mtoto wa mwaka 1989, Malengo ya Maendeleo Endelevu ya 2030, Ajenda ya Maendeleo ya Afrika Tuitakayo ya 2063 ili kuleta ustawi wa wanawake na watoto na kuweza kunyanyua hadhi ya uchumi wa taifa letu.

Aidha, Mhe. Rais Samia ameziagiza sekta zote kupitia Wizara, Taasisi, Mashirika, Wakala na Halmashauri kulipa kipaumbele suala la utekelezaji wa ahadi zilizowekwa katika utekelezaji wa Jukwaa la usawa wa kijinsia kwa kuweka mikakati na bajeti ili kuweza kutekeleza na kufikia ahadi hizo.

Mhe. Rais Samia ametoa wito kwa kila Wizara, Taasisi na Wakala wa Serikali kuhakikisha kuwa Maafisa wa jinsia wanajengewa uwezo na kupatiwa rasilimali zitakazowawezesha kutekeleza majukumu yao na kutekeleza ahadi za nchi.

Vile vile, Mhe. Rais Samia amewataka wadau wa maendeleo, sekta binafsi, asasi za kiraia, UN Women pamoja na Balozi za hapa nchini ambazo zilishiriki Mkutano wa Paris na kuweka ahadi zao kidunia kutekeleza ahadi ya haki za usawa ikiwemo Canada, Ufaransa, Finland, na Taasisi mbalimbali kuisaidia Tanzania na kuiunga mkono katika kutoa rasilimali fedha na utaalamu katika utekelezaji wa Mpango huu ili kuhakikisha ahadi tulizozitoa zinafikiwa.

Rais wa Jamhuri ya Muungano wa Tanzania Mhe. Samia Suluhu Hassan, amesema malengo makuu ya kuwepo kwa mfumo wa Demokrasia ya vyama vingi vya siasa nchini ni kuongeza kasi ya kuleta maendeleo kwa wananchi.

Mhe. Rais Samia amesema hayo tarehe 15 Desemba, 2021 wakati akifungua mkutano wa wadau wa siasa unao jadili hali ya demokrasia ya vyama vingi vya siasa nchini Tanzania, unaofanyika Jijini Dodoma.

Mhe. Rais Samia amesema fursa ya kuwa na jukwaa la kutoa mawazo mbadala lisiwe kibali cha kuendesha siasa za chuki, uhasama, na zinazokwamisha maendeleo ya wananchi.

Amesema tukiendesha siasa za namna hiyo itakuwa ni kinyume na malengo ya kuanzishwa kwa mfumo wa demokrasia ya vyama vingi vya siasa, kwasababu hata katika nchi za ambazo ndio waasisi wa mfumo huo wanazipa kipaumbele shughuli za maendeleo kuliko malumbano ya kisiasa.

Aidha, amesema siasa za maneno yasiyo na staha, kusema uongo, lugha za dhihaka, maneno ya kashfa, kuchochea watu wasishiriki katika shughuli za Maendeleo, kutotii sheria, uchonganishi baina ya wananchi hazina tija yoyote bali ni ukiukwaji wa kanuni za ushindani.

Mhe. Rais Samia amewakumbusha wadau wa siasa kwamba Tanzania ni moja tu duniani ambayo ni taifa huru lililojengwa katika misingi ya amani, upendo na mshikamano na linaloongozwa kwa misingi ya Katiba na Sheria zilizotungwa na Bunge na sio utashi wa mataifa ya nje.

Pia, Mhe. Rais Samia amesema demokrasia ya vyama vingi vya siasa nchini itakuwa na maana kama amani, utulivu na umoja wa kitaifa utadumishwa na kuwaletea maendeleo wananchi.

Vile vile, Mhe. Rais Samia ameviasa vyama vya siasa na taasisi za kiraia kuheshimu sheria, kanuni na taratibu ili uhuru uwe na maana iliyokusuiwa na amani iweze kutamalaki.

Mhe. Rais Samia amevishauri vyama vya siasa na taasisi za kiraia nchini kuwa kunapotokea tatizo lolote katika mfumo, kasoro au mambo kutokwenda sawa, njia nzuri ni kufanya majadiliano yatakayokuja na majawabu na sio malumbano.

Akijibu ombi la Mwenyekiti wa Kituo cha Demokrasia Tanzania (TCD) Mhe. Zitto Kabwe kuhusu kutoa msamaha kwa Kiongozi mmoja wa Kisiasa, Mhe. Rais Samia amesema demokrasia ni kuheshimu sheria, unapoheshimu sheria ndipo demokrasia inapokua, lakini pia ndipo inapoleta heshima, heshima ya mtu inakuja kwa kuheshimu sheria za nchi, unapovunja sheria za nchi heshima yako haitaheshimiwa, Serikali haitakuheshimu lakini lazima ujue kwamba unapotumia uhuru wako mwisho wa uhuru wako huanza heshima ya mtu mwingine.

Aidha, Mhe. Rais Samia amewaomba viongozi wa Vyama vya Siasa, kuacha kufikiria mambo yaliyopita, bali watazame mbele kwa matumaini, waweke nguvu zao pamoja kuijenga Tanzania mpya na amesisitiza kuwa kama mkuu wa Nchi ana jukumu na wajibu wa ulezi na kama mlezi anatakiwa kuwa mvumilivu, msikivu na mwenye kusamehe.

Amesema yupo tayari kusikiliza viongozi wenzake, washawishiane kusameheana, kwa kuwa anajua kuna mengi ya kusikiliza, madukuduku, hasira, malalamiko, nongwa, yanayotokana na uchanga wa demokrasia.

Mhe. Rais Samia amesema wanachama wa vyama vya siasa na viongozi wao wana uhuru wa kufanya kazi zao za kichama na kisiasa, huku wakitumia Vyombo vya habari vilivyo huru kujitangaza na kunadi sera zao, ispokuwa suala la msingi ni kufuata sheria za nchi na kuhakikisha wanafanya siasa ambazo hazicheleweshi ama kuvuruga maendeleo ya nchi.

Pia, Mhe. Rais amemtaka Msajili wa Vyama vya Siasa pamoja na Vyama vya Siasa kukaa na kujadiliana katika Mkutano huo namna bora ya kufanya shughuli zao za mikutano ya kisiasa bila kuvunja sheria za nchini.

Rais wa Jamhuri ya Muungano wa Tanzania Mhe. Samia Suluhu Hassan, ameiagiza Wizara ya Madini na Vyombo vya Ulinzi na Usalama kuongeza nguvu katika kudhibiti wizi na utoroshaji wa madini hasa katika maeneo ya bandari, viwanja vya ndege na mipakani ili kuhakikisha kuwa rasilimali za madini zinaleta manufaa kwa taifa.

Mhe. Rais Samia amesema hayo tarehe 13 Desemba, 2021 katika hafla ya Uwekaji Saini Makubaliano kati ya Serikali na kampuni 4 za uchimbaji madini, iliyofanyika katika Ukumbi wa Mikutano wa Kimataifa wa Julius Nyerere (JNICC), Jijini Dar es Salaam.

Aidha, Mhe. Rais Samia amesema kuwa ni lazima nchi yetu inufaike na rasilimali hizo za madini na kuhakikisha vitendo hivyo vya utoroshwaji na wizi vinakomeshwa mara moja na kuwafikisha wahusika kwenye vyombo vya sheria ili iwe fundisho kwa wengine wenye nia ovu.

Mhe. Rais Samia amebainisha kuwa Serikali iliamua kufanya mabadiliko makubwa ya Sheria zinazosimamia sekta ya madini ili kuipa nguvu Serikali kumiliki rasilimali hizo kwa niaba ya wananchi kwa nia ya kuleta manufaa zaidi kwa watanzania.

Vile vile, Mhe. Rais Samia amesema kutokana na maboresho yaliyofanywa katika sekta ya madini, anatarajia mchango wa sekta hiyo kufikia asilimia 10 kwenye pato la taifa hadi kufikia mwaka 2025.

Mhe. Rais Samia amesema kampuni hizo za ubia ndizo zitakazosimamia uchimbaji madini katika maeneo mbalimbali yaliyotolewa leseni za uchimbaji ili kuhakikisha maslahi ya nchi yanasimamiwa ipasavyo.

Pia, Mhe. Rais Samia amesema kupitia miradi hiyo, Serikali itapata manufaa mbalimbali ikiwemo kodi, tozo, ajira, huduma kwa jamii, ununuzi wa bidhaa na huduma zinazopatikana hapa nchini.

Mhe. Rais Samia pia ameitaka Wizara ya Madini isimamie kikamilifu suala la uongezaji thamani ya Madini nchini na kubainisha kuwa uchenjuaji wa madini utafanyika Tanzania na sio nchi nyingine.

Aidha, Mhe. Rais Samia amesisitiza kuwa madini yetu yatachimbwa, kuchenjuliwa na kuongezwa thamani hapa nchini ili kuweza kupata faida tofauti na hali ilivyokuwa hapo awali.

Kampuni hizo zinatarajiwa kuwekeza shilingi Trilioni 1.75, ambapo miradi hiyo pamoja na kuipatia mapato Serikali pia itatoa fursa za ajira, gawio na biashara kupitia huduma zitakazotolewa katika maeneo ya uchimbaji, uchenjuaji na usafirishaji wa madini yatakayozalishwa.

Aidha, Mhe. Rais Samia ametoa wito kwa viongozi wa Serikali kuwashirikisha wananchi wakati wa kupanga utekelezaji wa miradi mbalimbali ya maendeleo kwa kuwapatia elimu ili waweze kuelewa umuhimu wake na kuondoka migogoro isiyo kuwa na ulazima.

Mhe. Rais Samia amewataka wawekezaji kuzingatia Sheria, Kanuni, Taratibu na Miongozo inayosimamia sekta hiyo na kuagiza Baraza la Mazingira nchini (NEMC), Serikali za Mitaa pamoja na wawekezaji kusimamia utunzwaji wa mazingira kama Sheria ya Mazingira inavyobainisha na kuhakikisha kuwa miradi hiyo haileti athari katika maeneo mbalimbali.

Katika hafla hiyo, Mhe. Rais Samia ameshuhudia utiaji Saini ya Makubaliano kati ya Serikali na Kampuni ya Nyanzaga Mining Ltd itakayochimba madini ya Dhahabu Jijini Mwanza, Kampuni ya Petra Diamond Ltd inayoendelea na uchimbaji madini ya Almasi Mkoani Shinyanga, Kampuni ya Black Rock Mining Ltd (Mahenge Resources) itakayochimba madini ya Kinywe (Graphite) Mkoani Morogoro na Kampuni ya Strandline Resources Ltd itakayochimba madini ya Heavy Mineral Sand katika Mkoa wa Dar es Salaam.

Rais wa Jamhuri ya Muungano wa Tanzania na Amiri Jeshi Mkuu Mhe. Samia Suluhu Hassan amelitaka Jeshi la Polisi nchini kubadilika na kuzingatia taratibu na maadili ya Jeshi hilo katika utekelezaji wa majukumu yao ili kuondoa malalamiko kutoka kwa wananchi.

Mhe. Rais Samia ametoa maagizo hayo tarehe 12 Desemba, 2021 wakati akifunga Mafunzo ya Uofisa Kozi Na. 01/2020/2021 (Warakibu Wasaidizi wa Polisi – ASP) katika Chuo cha Taaluma ya Polisi Kurasini, Jijini Dar es Salaam.

Mhe. Rais Samia amesema vitendo vya rushwa na askari kujiona kuwa na nguvu isiyohojiwa kwa wananchi huliondolea Jeshi hilo uaminifu kwa wananchi wanyonge.

Aidha, Mhe. Rais Samia ametolea mfano wa matukio kadhaa aliyokumbana nayo kipindi cha nyuma wakati akiwa Kiongozi Serikalini na kuhoji namna hali ilivyo kwa wananchi wa kawaida ikiwa yeye kiongozi alikutana na vitendo hivyo vya rushwa. Amesema vitendo hivyo vinashusha imani kwa wananchi, hivyo Jeshi la Polisi wanatakiwa kurekebisha hali hiyo ili kurudisha imani kwa wananchi.

Kuhusu kuwapandisha vyeo askari wa Jeshi hilo, amesema Serikali imepandisha vyeo maafisa, wakaguzi na askari polisi, kuajiri askari mbadala na askari wapya wapatao 4103, kuipandisha hadhi Hospitali ya Polisi iliyopo barabara ya Kilwa Jijini Dar es Salaam kuwa Hospitali ya Rufaa ya Mkoa.

Mhe. Rais Samia amesema ni matumaini yake kuwa maboresho hayo yataleta matokeo chanya katika utendaji kazi wa Jeshi la Polisi na kutoa huduma zenye ubora na weledi kwa wananchi.

Aidha, Mhe. Rais Samia amesema amefurahishwa na ongezeko la idadi ya wahitimu ambao wamefikia 749 ikilinganishwa na idadi ya wanafunzi 370 mwaka 2009.

Mhe. Rais Samia ameliagiza Jeshi la Polisi kuimarisha doria kwenye maeneo yenye mikusanyiko ya watu wengi ili kuhakikisha vitendo vya kihalifu kipindi hiki cha kuelekea sikukuu za mwisho wa mwaka vinadhibitiwa.

Vilevile, Mhe. Rais Samia amelitaka Jeshi la Polisi kuendelea kutoa elimu kwa umma kuhusu madhara ya uhalifu ili wananchi wachukie vitendo vya uhalifu na wahalifu.

Mhe. Rais Samia amesema amani na usalama ndio misingi ya maendeleo katika nchi, hivyo amelitaka Jeshi la Polisi kushirikiana na vyombo vingine vya ulinzi na usalama ili kuhakikisha shughuli zote za maendeleo, kiuchumi, kisiasa, kijamii na uzalishaji zinafanyika bila hofu wala bughudha.

Kuhusu suala la silaha, Mhe. Rais Samia amempongeza Waziri wa Mambo ya Ndani ya Nchi, kulipa kipaumbele kwa kuwataka wananchi kurudisha silaha wanazomiliki kinyume na sheria.

Mhe. Rais Samia amesema hatua hiyo itasaidia kupunguza uhalifu mitaani na kuitaka polisi kuendelea kuwachukulia hatua wananchi wachache ambao hawataki kubadilika.

Amewataka wahitimu wote kutambua kuwa kazi kubwa mbele yao ni utendaji kazi wenye matokeo chanya kwao, Serikali na jamii kwa ujumla.

Rais wa Jamhuri ya Muungano wa Tanzania Mhe. Samia Suluhu Hassan, tarehe 11 Desemba, 2021 amekutana na kuzungumza na Mwenyekiti wa Kamisheni ya Umoja wa Afrika Mhe. Moussa Faki Mahamat, Ikulu Jijini Dar es Salaam.

Katika mzungumzo hayo, Mhe. Faki amemshukuru Mhe. Rais Samia kwa mualiko wa kuhudhuria sherehe za Maadhimisho ya Miaka 60 ya Uhuru.

Mhe. Faki amesema anategemea kuwa kama Tanzania ilivyokuwa kinara kwenye ukombozi wa Afrika basi itakuwa kinara pia katika kuchangamkia fursa ya Eneo Huru la Biashara Afrika (AfCFTA) katika kukuza biashara ikizingatiwa kuwa Tanzania kupitia miundombinu yake ya bandari imeweza kurahisisha biashara kwa nchi jirani zinazotumia bandari hiyo.

Amesema Tanzania ni kitovu muhimu cha kuunganisha nchi jirani kibiashara na usafirishaji wa bidhaa mbalimbali katika nchi hizo kutokana na jiografia yake.

Pia, Mhe. Faki amempongeza Mhe. Rais Samia kwa uongozi wake tangu aingie madarakani na jitihada zake za kuwaletea wananchi wa Tanzania maendeleo.

Kwa upande wake, Mhe. Rais Samia amemshukuru Mhe. Faki kwa kuhudhuria sherehe za Maadhimisho ya Miaka 60 ya Uhuru na kukutana nae kumueleza mambo mbalimbali yanayoendelea Barani Afrika na changamoto zake.

Mhe. Rais Samia amempongeza Mhe. Faki kwa kuchaguliwa kwa muhula wa pili kuendelea kuwa Mwenyekiti wa Kamisheni ya Umoja wa Afrika.

Aidha, Mhe. Rais Samia amemueleza Mhe. Faki kuwa Tanzania haikuachwa nyuma na athari za UVIKO 19 kiuchumi, lakini inajitahidi kukabiliana na athari hizo kupitia njia mbalimbali ili kuhakikisha uchumi wake unaimarika.

Mhe. Rais Samia amesema ni wakati sasa kwa nchi za Afrika kutumia fursa zilizopo baada ya athari za UVIKO 19 kujiimarisha kiuchumi kwasababu nchi hizo zina fursa nyingi kiuchumi.

Rais wa Jamhuri ya Kenya Mhe. Uhuru Muigai Kenyatta ameendelea na Ziara yake ya Kiserikali ya siku mbili hapa nchini, ambapo tarehe 10 Desemba, 2021 amepokelewa rasmi na mwenyeji wake Rais wa Jamhuri ya Muungano wa Tanzania Mhe. Samia Suluhu Hassan katika viwanja vya Ikulu, Jijini Dar es Salaam.

Mara baada ya kuwasili, Mhe. Rais Kenyatta amekagua gwaride lililoandaliwa kwa heshma yake na Jeshi la Ulinzi la Wananchi wa Tanzania (JWTZ) na kupigiwa mizinga 21.

Mhe. Rais Kenyatta na Mwenyeji wake Mhe. Rais Samia wamefanya mazungumzo rasmi yaliyohusu kuimarisha zaidi uhusiano na ushirikiano kati ya Tanzania na Kenya.

Wakizungumza na vyombo vya habari kuhusu ziara hiyo, Mhe. Rais Samia amesema ziara ya Mhe. Rais Uhuru Kenyatta inafuatia mualiko wake aliompa wakati wa ziara ya Mhe. Rais Samia nchini Kenya mwezi Mei mwaka huu.

Mhe. Rais Samia amesema katika mazungumzo yao pia wamekubaliana kuimarisha ushirikiano katika biashara kwa kuwa kiwango cha biashara kati ya Tanzania na Kenya kimezidi kuongezeka kutoka shilingi bilioni 885.4 mwaka 2013 hadi kufikia shilingi Trilioni 1.1 mwaka 2020.

Mhe. Rais Samia amesema wakati wa ziara yake nchini Kenya walikubaliana na Mhe. Rais Kenyatta kuondoa vikwazo visivyokuwa vya kikodi ambapo hadi sasa jumla ya vikwazo 46 kati ya 64 vilivyokuwepo vimeondolewa.

Kuhusu zoezi la kuimarishwa mpaka kati ya Tanzania na Kenya, Mhe. Rais Samia amewataka Mawaziri wanaohusika kufanyia kazi suala hilo ili liweze kukamilika.

Mhe. Rais Samia amezungumzia makubaliano ya pamoja katika kukabiliana na UVIKO 19 kwa kuwataka Mawaziri husika kushirikiana kwa pamoja katika kukabiliana na tatizo hilo.

Marais hao pia wamezungumzia kushirikiana katika sekta ya utalii kwa kuungana katika kuuza vivutio vya utalii katika nchi zao kwa manufaa ya pande zote mbili na kukabiliana kwa pamoja kutatua changamoto zinazojitokeza.

Mhe. Rais Samia amemkabidhi Mhe. Rais Kenyatta cheti cha umiliki wa wanyama pori 20 aina ya Korongo ambapo Rais huyo wa Kenya nae ameridhia ombi la Tanzania kuipatia majike ya Faru weusi.

Mhe. Rais Samia na Mhe. Rais Kenyatta wameshuhudia utiaji saini wa Hati ya Makubaliano kuhusu masuala ya Uhamiaji, Hati ya Makubaliano kuhusu masuala ya Magereza, Hati ya Makubaliano kuhusu udhibiti wa magonjwa ya mifugo mipakani, Hati ya Makubaliano kuhusu masuala ya afya, Hati ya Makubaliano kuhusu masuala ya Nyumba na Maendeleo ya Makazi, Mkataba wa kubadilishana wafungwa na Hati ya Makubaliano ya masuala ya Uwekezaji.

Kuhusu Ujenzi wa barabara katika ukanda wa Pwani ya Tanzania na Kenya (Bagamoyo-Malindi), Mhe. Rais Samia na Mhe. Rais Kenyatta wamekubaliana kufungua ukanda huo kwa kuunganisha kwa ujenzi wa barabara ya lami ili wananchi wa pande husika waweze kufaidi matunda ya maendeleo kama sehemu nyingine.

Kwa upande wake Mhe. Rais Uhuru Kenyatta amemshukuru Mhe. Rais Samia pamoja na watanzania kwa kumualika kuwa Mgeni Rasmi katika Maadhimisho ya Miaka 60 ya Uhuru ambayo yana historia kubwa kwake.

Mhe. Rais Kenyatta amesisitiza kuendelea kushirikiana na kutafuta mbinu mbalimbali ambazo zitawezesha nchi zetu mbili kuwa karibu kindugu, kibiashara na kiutalii kwa manufaa ya wananchi wa nchi zote.

Kuhusu ujenzi wa bomba la kusafirisha gesi asilia kutoka Dar es Salaam hadi Mombasa nchini Kenya, Mhe Rais Samia amesema suala hilo wamewaachia Mawaziri wa Nishati walishughulikie ili kusaidia mradi huo uanze mara moja.

Mhe. Rais Samia ameagana na mgeni wake Mhe. Kenyatta katika Uwanja wa Ndege wa Kimataifa wa Julius Nyerere Jijini Dar es Salaam.

Rais wa Jamhuri ya Muungano wa Tanzania na Amiri Jeshi Mkuu Mhe. Samia Suluhu Hassan, tarehe 09 Desemba, 2021 ameongoza watanzania katika Sherehe za Maadhimisho ya Miaka 60 ya Uhuru wa Tanzania Bara zilizofanyika Uwanja wa Uhuru Jijini Dar es Salaam.

Katika Sherehe hizo, Mhe. Rais Samia amekagua gwaride lililoandaliwa na Jeshi la Ulinzi la Wananchi wa Tanzania kwa kushirikiana na vikundi vya Ulinzi na usalama. Pia alipokea salamu za utii, kisha gwaride hilo kupita kwa heshima mbele yake kwa mwendo wa pole na mwendo wa haraka.

Aidha, katika sherehe hizo JWTZ lilionyesha baadhi ya zana vita zinazotumika katika medani za vita pamoja na shughuli mbalimbali za kijamii.

Sherehe hizo zimehudhuriwa na Rais wa Kenya Mhe. Uhuru Kenyatta ambaye alikuwa mgeni rasmi, Rais wa Rwanda Mhe. Paul Kagame, Rais wa Msumbiji Mhe. Philepe Nyusi, Rais wa Visiwa vya Comoro Mhe. Azali Assoumani, wawakilishi wa Viongozi kutoka nchi za Jamhuri ya Demokrasia ya Kongo (DRC), Burundi, Oman na Uswatini pamoja na Mabalozi wanaoziwakilisha nchi zao hapa nchini.

Katika hatua nyingine, Rais na Amiri Jeshi Mkuu Mhe. Samia Suluhu Hassan, ametunuku Nishani 14 ikiwa ni sehemu ya Nishani 893 alizozitunuku kwa Wakuu wa Vyombo vya Ulinzi na Usalama nchini.

Waliotunukiwa Nishani ya Miaka 60 ya Uhuru ni Mkuu wa Majeshi ya Ulinzi Jenerali Venance Salvatory Mabeyo, Mkuu wa Jeshi la Polisi Inspekta Jenerali Simon Nyakoro Sirro, Mkurugenzi Mkuu wa Idara ya Usalama wa Taifa Kamishna Diwani Athumani Msuya, Mkuu wa Jeshi la Magereza Meja Jenerali Suleiman Mungiya Mzee, Mkuu wa Jeshi la Zimamoto na Uokoaji Kamishna Jenerali John William Masunga na Mkuu wa Jeshi la Uhamiaji Kamishna Jenerali Dkt. Anna Peter Makakala.

Waliotunukiwa Nishani ya Utumishi Uliotukuka ni Meja Jenerali Hawa Issa Kodi, Kamishna wa Polisi Shaban Mrai Hiki na Kamishna Msaidizi wa Magereza Mkwanda Hasseid Mkwanda.

Vile vile, Afisa Mteule Daraja la I Martin Peter Kazilo kutoka JWTZ, Mkaguzi wa Polisi Stahmil Herman Lusatila, Mkaguzi wa Magereza Nicerosiana Elisa Malisa, Mkaguzi Msaidizi wa Jeshi la Zimamoto na Uokoaji Ishima Shomari Seif na Mkaguzi wa Idara ya Uhamiaji Abubakary Muhonzi Yunusu walitunukiwa Nishani ya Utumishi Mrefu na Tabia Njema.

Rais wa Jamhuri ya Muungano wa Tanzania Mhe. Samia Suluhu Hassan, amesema ulemevu hauzuii kufanya mambo makubwa duniani kwasababu binadamu tunatofautiana umbo lakini maumbile sote tupo sawa hivyo hali hiyo sio kikwazo cha msingi bali inapaswa kutayarisha mazingira, kutoa uwezo wa kuelimisha ili kila mtu aweze kufanya kila kitu.

Mhe. Rais Samia amesema hayo tarehe 07 Desemba, 2021 katika hafla iliyofanyika viwanja vya Ikulu Jijini Dar es Salaam kuipongeza Timu ya Taifa ya Mpira wa Miguu kwa Watu wenye Ulemavu (Tembo Warriors) baada ya kufuzu kwenda kushiriki mashindano ya Kombe la Dunia yatakayo fanyika nchini Uturuki mwaka 2022.

Aidha, Mhe. Rais ametolea mfano washiriki wa mashindano ya urembo kwa viziwi na watanashati barani Afrika ambao walifanya vizuri na kusema Serikali haitaacha mtu yeyote nyuma katika maendeleo bila kujali hali yake ya maumbile au ulemavu wa viungo.

Mhe. Rais Samia pia amekipongeza Chama cha Mpira wa Miguu wa Watu Wenye Ulemavu (TAFF), Kamati ya Maandalizi na Wachezaji wa timu hiyo pamoja na Wizara ya Utamaduni, Sanaa na Michezo kwa mafanikio mbalimbali yaliyopatikana.

Mhe. Rais amewataka wachezaji wa Tembo Warriors kutobweteka na hatua waliyofikia bali waongeze bidiii ili wapate ushindi zaidi katika michuano ijayo ya Kombe la Dunia nchini Uturuki.

Vilevile, Mhe. Rais Samia amesema mafanikio ya timu ya Tembo Warriors ni ushuhuda wa utekelezaji wa Ilani ya Uchaguzi ya Chama cha Mapinduzi ya mwaka 2020-2025 ambayo inaitaka sekta ya michezo kuwa miongoni mwa sekta itakayotoa ajira kwa vijana.

Mhe. Rais Samia ameitaka Wizara ya Utamaduni Sanaa na Michezo kuangalia namna bora ya wachezaji wa timu hiyo kukaa pamoja kwa ajili ya maandalizi ya muda mrefu ili kufikia malengo yaliyokusudiwa katika michuano hiyo ya kombe la dunia.

Wakati huo huo, Mhe. Rais Samia amemkabidhi Waziri Mkuu Mstaafu Mhe. Dkt. Salim Ahmed Salim Tuzo ya Heshima ya Utatuzi wa Migogoro, Demokrasia na haki za Binadamu aliyotunukiwa na Taasisi ya Kemet Butros Ghali (KBG) ya nchini Misri.

Mhe. Rais Samia amebainisha kuwa Taasisi hiyo iliamua kumpatia Dkt. Salim Tuzo hiyo ili kuenzi mchango wake katika Uongozi wa Umoja wa Afrika (OAU) kuanzia mwaka 1989 – 2001. Pia kwa kuonyesha jitihada kubwa za kusaidia ukombozi wa nchi za Kusini mwa Afrika, kupigania haki, usawa, umoja, kudumisha ulinzi na usalama katika kuleta maendeleo ya Afrika na dunia kwa ujumla.

Taasisi ya KBG imekuwa na utaratibu wa kutoa tuzo mbalimbali kila mwaka na kutambua michango ya watu katika tafiti, elimu, amani, demokrasia pamoja na kujishughulisha na masuala ya kuleta amani na ujuzi.

Rais wa Jamhuri ya Muungano wa Tanzania Mhe. Samia Suluhu Hassan, tarehe 06 Desemba, 2021 amezindua kiwanda cha kutengeneza vifaa vya umeme cha Elsewedy (Elsewedy Electric East Africa Ltd), kilichopo Kigamboni Jijini Dar es Salaam.

Ufunguzi wa Kiwanda hicho ni Sehemu ya maadhimisho ya Miaka 60 ya Uhuru ambapo Mhe. Rais anaweka Mawe ya Msingi na kufungua Miradi mbalimbali ya Maendeleo.

Mhe. Rais Samia amesema uwekezaji wa Kiwanda hicho ni kielelezo kuwa nchi ipo katika njia sahihi ya kujikomboa kiuchumi, kuondoka katika utegemezi wa kuagiza bidhaa kutoka nje kama ilivyodhamiria wakati nchi ikipata uhuru miaka 60 iliyopita.

Aidha, Mhe. Rais Samia amesema Kiwanda hicho ambacho kitakuwa na uwezo kwa kuzalisha tani 15,000 za nyaya za umeme, transfoma 1,500 na mita 100,000 za umeme kwa mwaka zitakazotumika nchini na kuondoa utegemezi wa kununua bidhaa hizo nje ya nchi na nusu ya bidhaa hizo zitauzwa katika masoko ya nje na kuongeza fedha za kigeni.

Mhe. Rais Samia ameziagiza Wizara na Taasisi zinazohusika na masuala ya uwekezaji kuhakikisha zina wawezesha na kuweka mazingira mazuri katika sekta hiyo badala ya kuwawekea vikwazo na kuwakatisha tamaa.

Pia, Mhe. Rais Samia amewahakikishia wawekezaji zaidi ya 100 kutoka nchini Misri kuwa Serikali itaendelea kuboresha mazingira ya uwekezaji nchini pamoja na mitaji na soko kwa bidhaa watakazozalisha ikiwemo uwepo wa rasilimali watu wenye uzoefu kwa ajili ya kutumika kwenye uwekezaji wao.

Mhe. Rais Samia ameagiza Kituo cha Uwekezaji nchini (TIC) kujenga ushirikiano na Kituo cha Uwekezaji cha Misri ili kujifunza mazuri kutoka kwao kwa lengo la kuboresha kama alivyojionea utendaji kazi wa Kituo hicho cha nchini Misri wakati alipofanya ziara nchini humo.

Vilevile, Mhe. Rais amewataka watendaji wa Serikali wanaohusika kuhakikisha wanakamilisha taratibu za upatikanaji wa ardhi katika eneo hilo kwa kuzingatia sheria ili wawekezaji hao waendelee na ujenzi wa mji wa viwanda ambao unatarajiwa kutoa ajira na kuchangia uchumi wa nchi.

Akiwa njiani kuelekea kiwandani hapo, Mhe. Rais Samia alipata fursa ya kuwasalimia wananchi wa Kibada Wilayani Kigamboni na kuwaahidi kutatua changamoto mbalimbali zinazowakabili ikiwemo changamoto ya maji, umeme na barabara.

Wakati huo huo, Mhe. Rais Samia amemuapisha Profesa Adelardus Lubango Kilangi kuwa Balozi wa Tanzania nchini Brazil na kumtaka kutumia fursa za uwekezaji zilizopo nchini humo katika sekta za kilimo, utalii na michezo ili kuinufaisha Tanzania kupiga hatua zaidi katika maendeleo.

Rais wa Jamhuri ya Muungano wa Tanzania Mhe. Samia Suluhu Hassan, tarehe 05 Desemba, 2021 amefungua rasmi Barabara ya New Bagamoyo sehemu ya Morocco hadi Mwenge yenye urefu wa Kilomita 4.3 kwa ufadhili wa Serikali ya Japani kupitia Shirika lake la Maendeleo la (JICA).

Sherehe za ufunguzi wa barabara hiyo zilizofanyika Kijitonyama ni sehemu ya Wiki ya Maadhimisho ya Miaka 60 ya Uhuru ambapo Mhe. Rais Samia anakagua, kuweka Mawe ya Msingi na kufungua baadhi ya Miradi mbalimbali ya maendeleo katika Jiji la Dar es Salaam.

Mhe. Rais Samia amesema ufunguzi wa barabara hiyo ni juhudi za Serikali katika kuboresha na kujenga miundombinu ya barabara katika Jiji la Dar es Salaam, ikiwa ni sehemu ya kupunguza kero ya msongamano wa magari na ajali za barabarani katika Jiji hilo.

Aidha, Mhe. Rais Samia amewataka wananchi kuzingatia sheria ili kupata manufaa yaliyokusudiwa katika kujenga barabara na miundombinu kwa kuepuka kufanya vitendo vitakavyopelekea uharibifu wa miundombinu hiyo.

Pia, Mhe. Rais ameitaka Wizara ya Ujenzi na Uchukuzi pamoja na Wakala wa Barabara Tanzania (TANROADS) kuhakikisha ujenzi na ukarabati wa barabara na madaraja unafanyika kwa viwango vilivyokubaliwa kimkataba ili zidumu kwa muda uliokusudiwa.

Kuhusu Jiji la Dar es Salaam, Mhe. Rais Samia amesema kuwa sura ya Jiji imebadilika kwa kiasi kikubwa ndani ya miaka mitano iliyopita hasa katika miundombinu ya barabara kupitia Mradi wa Uendelezaji wa Jiji la Dar es Salaam (DMDP) kuwezesha mitaa mingi kuwa na barabara za lami huku akitolea mfano Magomeni na Kinondoni.

Mhe. Rais Samia amesema Serikali inaendelea na kuboresha miundombinu mbalimbali ya Jiji la Dar es Salaam na kwa sasa inaangalia uwezekano wa kuboresha eneo la Jangwani ambalo limekuwa kero kwa wananchi hususan kipindi cha mvua.

Vilevile, Mhe. Rais Samia amewakumbusha wananchi kuendelea kupata chanjo dhidi ya UVIKO 19 kutokana na tishio la wimbi la nne la ugonjwa huo ambalo limezikumba nchi mbalimbali duniani.

Kuhusu fedha za mkopo wa Shirika la Fedha la Kimataifa (IMF), Mhe. Rais Samia amesema matumizi ya fedha hizo yanahitaji ufuatiliaji makini na kupitia Wizara ya Fedha na Mipango wameanzisha kitengo cha tathmini na ufatiliaji ili kuhakikisha zinafanya kazi iliyokusudiwa.

Wakati huohuo, Mhe. Rais Samia amewatembelea Mjane wa Baba wa Taifa Mama Maria Nyerere na Mjane wa Hayati Rais Benjamin Mkapa Mama Anna Mkapa, kuwasalimia na kuwajulia hali ikiwa ni sehemu ya Maadhimisho ya Miaka 60 ya Uhuru.

Rais wa Jamhuri ya Muungano wa Tanzania Mhe. Samia Suluhu Hassan amevunja Bodi ya Wakurugenzi ya Mamlaka ya Bandari Tanzania (TPA) na Bodi ya Kampuni ya Huduma za Meli (MSCL) kufuatia ubadhirifu unaofanywa katika Taasisi zao na kuisababishia hasara Serikali.

Mhe. Rais Samia amesema hayo leo tarehe 04 Desemba, 2021 katika hafla ya uzinduzi rasmi wa matumizi ya Mradi wa Maboresho ya Miundombinu ya Gati namba 0 hadi 7 pamoja na uongezaji wa kina cha bahari katika lango kuu la bandari katika hafla iliyofanyika katika Bandari ya Dar es Salaam.

Amesema pamoja na makusanyo yanayofanywa na TPA, bado zipo changamoto za upotevu wa mapato unaochangiwa na kutokuwepo kwa mfumo madhubuti, na hivyo kuwepo kwa mianya mingi ya upotevu wa mapato.

Mhe. Rais Samia amesema Taarifa ya Ukaguzi Maalum wa Kiuchunguzi wa Mfumo wa Enterprise Resource Planning (ERP) katika Mamlaka hiyo ya Bandari uliofanyika kuanzia Juni, 2020 na Ripoti yake kutolewa Machi, 2021 imeonesha upotevu wa fedha nyingi zilizotumika kuajiri Makampuni mbalimbali ya kuanzisha mifumo ya kielekroniki ya ukusanyaji wa mapato ambayo haikutoa tija iliyokusudiwa.

Aidha, Mhe. Rais Samia amezitaja Kampuni hizo kuwa ni Soft Tech Consultant Ltd ambayo ilipewa zabuni ya shilingi milioni 694 na kulipwa shilingi milioni 600, Kampuni ya Twenty Third Centuary System ilipewa kazi ya Dola za Marekani milioni 6.6 na kulipwa Dola milioni 4.6 na mkataba kuvunjwa na Kampuni ya SAP – East Africa Ltd iliyopewa Dola za Marekani 433,000 Mshauri Mwelekezi binafsi alilipwa Dola za Marekani 31,920.

Vilevile, Mhe. Rais Samia amesema anazo taarifa kwamba kupitia mifumo hiyo mibovu, Watumishi wa kitengo cha Hesabu wanashirikiana kuchezea mifumo na kudanganya kwamba mizigo imelipiwa na mifumo magetini kusoma malipo yamefanyika na kuruhusu kutoka ilhali mizigo hiyo ikiwa haijalipiwa.

Kufuatia ubadhirifu huo, Mhe. Rais Samia amemuagiza Waziri wa Ujenzi na Uchukuzi, Mkurugenzi Mkuu wa Mamlaka ya Bandari kwa kushirikiana na Taasisi ya Kupambana na Kuzuia Rushwa (TAKUKURU) kupitia ripoti hiyo na kuchukua hatua stahiki kwa waliohusika.

Mhe. Rais Samia pia amezungumzia ubadhirifu katika mradi wa ujenzi wa Meli tano za Kampuni ya huduma za Meli (MSCL) zinazojengwa na kuwataka wahusika kuchukua hatua haraka .

Katika hatua nyingine Mhe. Rais Samia ameweka Jiwe la Msingi la Ujenzi wa Miundombinu ya Mabasi yaendayo Haraka awamu ya pili (BRT II) katika Barabara ya Kilwa-Chango’mbe na Kawawa yenye urefu wa kilomita 20.3.

Katika hafla hiyo, Mhe. Rais Samia amesema kukamilikika kwa ujenzi wa Mradi huo kutasaidia kupunguza msongamano na ajali za barabarani na kuwa kichocheo kikubwa cha maendeleo kwa ukanda huo wa kuelekea mikoa ya Kusini mwa nchi yetu.

Mhe. Rais Samia amesema mbali na ujenzi wa mfumo wa mabasi yaendayo haraka (BRT), Serikali inaendelea na jitihada za kufanya maboresho mbalimbali kama vile upanuzi wa barabara na ujenzi wa barabara za juu (flyovers) ili kukabiliana na kero ya msongamano wa magari.

Pia Mhe. Rais Samia amebainisha kuwa tayari Serikali imepata mkopo kutoka Benki ya Dunia utakaowezesha kuendelea na ujenzi wa mfumo wa mabasi yaendayo haraka kutoka katikati ya jiji hadi Gongo la Mboto.

Aidha, Mhe. Rais Samia amekemea vitendo vya kihalifu vinavyofanywa na baadhi ya watu na kuwataka wananchi kuwafichua wale wote wanaofanya vitendo hivyo ambavyo ni sawa na uhujumu na vinachelewesha ukamilishaji wa miradi hiyo.

Mhe. Rais Samia amesema wapo baadhi ya wananchi wanaovamia maeneo ya ujenzi ya hifadhi ya barabara na kujenga vibanda vya biashara bila kujali maelekezo yanayotolewa hivyo kuhatarisha usalama wao na watumiaji wengine wa barabara.

Pia, amesema kuna vitendo vinafanywa na baadhi ya watumiaji wa barabara kama vile kuzidisha uzito wa magari, kumwaga mafuta barabarani, kuziba mifereji ya maji, uegeshaji holela wa magari ambavyo vinachangia kuharibu mazingira kwa ujumla.

Kufuatia vitendo hivyo, Mhe. Rais Samia ameagiza kufanyika kwa doria za mara kwa mara katika maeneo hayo na hatua kali zichukuliwe kwa wote wanaokiuka maelekezo hayo.

Mhe. Rais amewaasa wananchi kuendelea kuchukua tahadhari dhidi ya UVIKO 19 katika wimbi la nne ambalo tayari limezikumba nchi kadhaa Barani Afrika.

Rais wa Jamhuri ya Muungano wa Tanzania Mhe. Samia Suluhu Hassan, leo tarehe 03 Desemba, 2021 amezindua Kiwanda cha kutengeneza Nyaya za Mawasiliano cha Raddy Fiber Manufacturing Ltd kilichopo katika Wilaya ya Mkuranga mkoani Pwani.

Akizungumza katika hafla ya uzinduzi wa kiwanda hicho, Mhe. Rais Samia amesema hafla hiyo ni sehemu ya Maadhimisho ya miaka 60 ya Uhuru wa Tanzania Bara ambapo ameanza kuzindua na kuweka mawe ya msingi katika baadhi ya miradi mbalimbali ya maendeleo.

Mhe. Rais Samia amesema uzinduzi wa kiwanda hicho unathibitisha uwezo na fursa nyingi ambazo nchi imejaliwa kuwa nazo na ziweze kutumika ili kukuza uchumi wa nchi, kuleta ajira kwa wananchi hususan vijana na kuzalisha bidhaa ambazo sio lazima kuagizwa kutoka nje.

Aidha, Mhe. Rais Samia amemshukuru na kumpongeza mwekezaji wa kiwanda hicho Bw. Ramadhani Hassani Mlanzi ambaye ni mzawa kwa kuona kuwa Tanzania ni sehemu salama ya kuwekeza na kumhakikishia kuwa Serikali itampa ushirikiano wa kutosha.

Mhe. Rais Samia amewakaribisha wawekezaji wengine kutoka ndani na nje ya nchi kuwekeza Tanzania na kuwahakikishia usalama wa mitaji yao pamoja na uhakika wa kutengeneza faida.

Pia, Mhe. Rais Samia amesema Serikali inatambua mchango wa sekta binafsi nchini katika kuleta mageuzi makubwa ya kiuchumi hivyo inaendelea kuweka mazingira wezeshi na rafiki ya ufanyaji biashara na uwekezaji.

Mhe. Rais Samia ameagiza taasisi zote za Serikali zinazotoa huduma katika sekta ya Uwekezaji kuondoa urasimu ambao umesababisha kupoteza baadhi ya wawekezaji waliokuwa wanataka kuwekeza nchini kwa kuwa wawekezaji wana mchango mkubwa katika kujenga uchumi wa nchi yetu.

Vilevile, Mhe. Rais Samia amesema Serikali itaimarisha jitihada za mageuzi ya kisera na kisheria ikiwemo utekelezaji wa Mpango wa Kuboresha Mfumo wa Udhibiti wa Biashara nchini ujulikanao kama The Blueprint for Regulatory Reforms to Improve Business Enviroment.

Mhe. Rais Samia amesema Serikali ina lengo la kuhakikisha kuwa wananchi wote wanafikiwa na huduma za mawasiliano ili kuwawezesha kutumia huduma zitonakazo na TEHAMA katika kukuza uchumi nchini.

Aidha, Mhe. Rais Samia amemtaka Mtendaji Mkuu wa Kiwanda cha Raddy Fiber Manufacturing Ltd kuhakikisha kuwa anakamilisha azma yake ya kujenga kiwanda cha kuzalisha simu janja (smart phone) hapa nchini ambacho pia kitachangia utoaji ajira kwa vijana.

Kiwanda cha Raddy Fiber Manufacturing Ltd kina uwezo wa kuzalisha kiasi cha kilomita 24,000 za optic fiber kwa mwaka na kinatarajiwa kutoa ajira zipatazo 670 kitakapokamilika katika awamu zote na hivyo kukifanya kuwa kiwanda cha tatu kwa ukubwa barani Afrika na cha kwanza kwa Afrika Mashariki na Kati.

Awali akiwa njiani kuelekea Mkuranga, Mhe. Rais Samia alipata fursa ya kuwasalimia wananchi wa Mbagala Zakhem na Vikindu mkoani Pwani ambapo amewahakikishia wafanyabiashara ndogondogo maarufu kama wamachinga kuwa kwa sasa Serikali inajenga mazingira bora zaidi ambayo yatawawezesha kufanya biashara kwa uhuru na katika msimu wote wa mwaka.

Rais wa Jamhuri ya Muungano wa Tanzania Mhe. Samia Suluhu Hassan amesema Serikali imeamua kuruhusu wanafunzi wote walioacha shule kutokana na sababu mbalimbali zikiwemo utoro, sababu za kisheria au walioshindwa kufaulu darasa la saba kupewa nafasi nyingine ya kuendelea na masomo.

Amesema lengo la maamuzi hayo ya Serikali ni kutoa fursa pana kwa watoto wa kitanzania kuweza kuendelea na elimu ili iweze kuwasaidia katika maisha.

Mhe. Rais Samia amesema hayo tarehe 29 Novemba, 2021 katika hafla ya makabidhiano ya Shule ya Awali na Msingi Museveni iliyokabidhiwa kwakwe na Rais wa Jamhuri ya Uganda Mhe. Yoweri Kaguta Museveni, katika kijiji cha Nyabilezi, Chato Mkoani Geita.

Aidha, Mhe. Rais Samia amesema kwa wanafunzi watakaoshindwa kuendelea na mfumo wa masomo wa kawaida wanaweza kujiunga na Elimu Mbadala ambayo itawezesha kujitegemea kimaisha kwa kuwa inatoa stadi mbalimbali za maisha kama ilivyo katika baadhi ya nchi.

Pia, Mhe. Rais Samia amesema makabidhiano ya Shule hiyo iliyogharimu jumla ya Dola za Marekani Milioni 1.67, yamefanyika wakati muafaka ambapo itaongeza fursa kwa wanafunzi wote kupata elimu hata kwa wale wenye mahitaji maalum.

Mhe. Rais Samia amemshukuru Rais Museveni kwa wema na utu wake na kujitoa kuhakikisha kuwa elimu bora sio suala la mipaka ila ni jukumu la viongozi wote wa Afrika katika kusaidia bara letu kutoa elimu bora na yenye viwango ili kuweza kukidhi soko la ajira.

Mhe. Rais Samia ameongeza kuwa jukumu hilo kwa viongozi wa Afrika litasaidia bara letu kutoa elimu bora na yenye viwango ili kuweza kukidhi soko la ajira.

Aidha, Mhe. Rais Samia amesema majengo ya shule hiyo yatabaki kama alama ya kipekee katika kumbukumbu za watanzania na wanachato kwa ujumla na ndio maana Serikali ikaamua kuisajili shule hiyo kwa jina la Mhe. Rais Museveni na itajulikana kama Shule ya Msingi Museveni na itafundisha kwa mtaala wa Kingereza.

Vilevile, Mhe. Rais Samia amewataka wanafunzi watakaopata nafasi ya kujiunga na Shule hiyo kutumia fursa wanayoipata kujifunza kwa bidii ili waweze kufanya vizuri kwenye masomo yao na elimu watakayoipata iweze kuwasaidia katika maisha yao ya baadae.

Katika kuenzi mchango wa Rais Museveni na Hayati Rais Dkt. John Pombe Magufuli, Mhe. Rais Samia ameiagiza Wizara ya Elimu Sayansi na Teknolojia kuweka historia ya Marais hao kwenye Maktaba yake ili kusaidia wanafunzi watakaosoma shuleni hapo kujifunza uzalendo, umajumui na falsafa za Marais hao ili kuhakikisha waafrika wanajitegemea kwenye sekta za kiuchumi, kijamii na kisiasa.

Kwa upande wake Mhe. Rais Museveni amesema, uamuzi wa kujenga Shule hiyo sio kwasababu Serikali ya Tanzania haina fedha bali ni kutokana na udugu, uhusiano na ushirikiano wa Tanzania na Uganda.

Serikali ya Tanzania imetoa Shilingi milioni 705,000,000 kwa ajili ya ununuzi wa samani na ukamilishaji wa kazi za nje ambazo hazikuwa sehemu ya mkataba wa ujenzi wa Shule hiyo na inatarajiwa kuchukua wanafunzi 630 wa Bweni itakapokamilika.

Shule hiyo ya Awali na Msingi ina vyumba vya madarasa ya Shule ya Msingi 17, Maktaba 1, vyumba vya madarasa ya Elimu ya Awali 3, Jengo la Utawala 1, Ofisi kwa ajili ya Elimu ya Awali 2, Matundu ya vyoo 37 na Nyumba ya Walimu.

Mhe. Rais Museveni amemaliza ziara yake ya Kitaifa ya siku tatu hapa nchini ambapo ameagwa rasmi na Mhe. Rais Samia katika Uwanja wa Ndege wa Geita uliopo wilayani Chato mkoani humo.

Rais wa Jamhuri ya Muungano wa Tanzania Mhe. Samia Suluhu Hassan na Rais wa Jamhuri ya Uganda Mhe. Yoweri Kaguta Museveni, wameshiriki Kongamano la Wafanyabishara wa Tanzania na Uganda, lililofanyika tarehe 28 Novemba, 2021 katika viwanja vya Ikulu Jijini Dar es Salaam.

Kongamano hilo lililojikita katika kuzungumzia fursa za biashara ya mafuta na gesi hususan maendeleo ya mradi wa Bomba la kusafirisha mafuta ghafi kutoka Hoima nchini Uganda hadi Tanga nchini Tanzania.

Aidha, Mhe. Rais Samia amemshukuru Rais wa Uganda Mhe. Museveni kwa jitihada zake zilizowezesha kupatikana kwa mafanikio kuelekea utekelezaji wa mradi huo wa ushirikiano tangu alipofanya ziara ya mwisho Jijini Dar es Salaam tarehe 20 Mei, 2020.

Mhe. Rais amesisitiza kuwa ushirikiano kati ya Tanzania na Uganda umezidi kuimarika hata katika kipindi hiki cha changamoto ya UVIKO 19 hivyo ni ishara nzuri katika kutatua changamoto zinazojitokeza kwenye utekelezaji wa miradi ya ushirikiano.

Mhe. Rais Samia amesema kuwa Serikali ya Uganda imeiunga mkono Serikali ya Tanzania katika mambo muhimu ambayo yamesaidia katika maendeleo ya mradi wa Bomba la kusafirisha mafuta. Kufuatia hatua hiyo, Mhe. Rais Samia ametoa wito kwa wataalamu wa Tanzania na Uganda kuangalia masuala muhimu yatakayowezesha kuleta ushirikiano katika sekta ya mradi huo.

Kwa upande mwingine, Mhe. Rais Samia amewataka wadau kutoka Sekta binafsi kutumia fursa zinazopatikana kutokana na utekelezaji wa mradi huo kwa kuwa Serikali za nchi hizo mbili zinafanya jitihada kuhakikisha Sekta hiyo na jamii za nchi zote mbili zinanufaika na mradi huo.

Mhe. Rais Samia amewaeleza wawekezaji na wafanyabiashara kutoka Uganda kuwa Wizara ya Viwanda na Biashara kupitia Taasisi yake ya Utafiti na Maendeleo ya Viwanda (TIRDO) ina uwezo wa kutoa huduma za kibobezi ikiwemo kufanya ukaguzi katika mabomba ya kuhifadhi na kusafisha mafuta na gesi.

Mhe. Rais Samia amehimiza nchi zote mbili kuendelea kuvutia uwekezaji katika nyanja mbalimbali ikiwemo viwanda vinavyotumia malighafi za ndani hususan katika sekta za kilimo na maliasili. Hivyo, Mhe. Rais Samia ametoa wito kwa wawekezaji wa Tanzania kuwekeza Uganda na Uganda kuwekeza nchini Tanzania.

Kwa upande wa Rais wa Jamhuri ya Uganda Mhe. Yoweri Museveni pamoja na mambo mengine, amesema kuwa mradi wa Bomba la Mafuta ghafi utakuwa na manufaa kwa pande zote mbili na kusaidia kutoa ajira kwa wananchi wa nchi hizo.

Rais wa Jamhuri ya Uganda Mhe. Yoweri Kaguta Museveni amewasili nchini kwa Ziara ya Kitaifa ya siku 3 yenye lengo la kuimarisha uhusiano baina ya nchi yake na Tanzania kufuatia mualiko wa Rais wa Jamhuri ya Muungano wa Tanzania Mhe. Samia Suluhu Hassan.

Mara baada ya kuwasili katika Uwanja wa Ndege wa Kimataifa wa Julius Nyerere (JNIA) Jijini Dar es Salaam, Mhe. Rais Museveni amekagua gwaride la heshima lililoandaliwa na Jeshi la Ulinzi la Wananchi wa Tanzania (JWTZ) kwa ajili yake pamoja na kupigiwa mizinga 21.

Mhe. Rais Museveni alipowasili Ikulu Jijini Dar es Salaam amefanya mazungumzo na mwenyeji wake Mhe. Rais Samia pamoja na kuzungumza na vyombo vya habari kuhusu masuala mbalimbali ya uhusiano na ushirikiano wa nchi hizi mbili.

Katika mazungumzo yake na vyombo vya habari, Mhe. Rais Samia amesema Tanzania inaridhishwa na uhusiano mzuri na wa kindugu uliopo kati yake na Uganda na kusisitiza kuwa uhusiano huo utaendelea kudumishwa.

Mhe. Rais Samia amesema yeye na Rais Museveni wamewaelekeza Mawaziri wa Kisekta kukutana mara kwa mara kwa ajili ya kutatua changamoto mbalimbali zinazojitokeza katika maeneo yao ili kuendelea kuimarisha ushirikiano huo.

Pia, Mhe. Rais Samia amesema Uganda ni nchi ya pili kwa uwekezaji hapa nchini kwa nchi za Jumuiya ya Afrika Mashariki, ambapo Uganda imetoa ajira 2,150 kwa watanzania. Mhe. Rais Samia ameahidi kwamba Tanzania itaendelea kuwekeza zaidi nchini Uganda ili kukuza zaidi kiwango cha biashara.

Mhe. Rais Samia amesema kwa lengo la kuimarisha biashara kati ya nchi mbili hizo, wamekubaliana kushughulikia kwa pamoja vikwazo visivyokuwa vya kikodi na kuviondoa.

Amesema, katika mazungumzo yake na Mhe. Rais Museveni wamekubaliana kukuza biashara na uwekezaji kati ya nchi hizo mbili kwa kuwa bado kuna fursa nyingi za kibiashara hususan katika sekta za viwanda, kilimo, uvuvi, huduma za kijamii, utalii pamoja na usafirishaji.

Vilevile, Mhe. Rais Samia amemshukuru Mhe. Rais Museveni pamoja na Serikali ya Uganda kwa uamuzi wa kuendelea kutumia Bandari ya Dar es Salaam kupitisha shehena mbalimbali za mizigo ikiwemo itakayotumika katika ujenzi wa bomba la mafuta kutoka Hoima nchini Uganda hadi mkoani Tanga nchini Tanzania.

Mhe. Rais Samia pia amemuomba Mhe. Rais Museveni kuridhia Mamlaka ya Bandari nchini kufungua ofisi yake ya uratibu Jijini Kampala, Uganda kwa ajili ya kusogeza karibu huduma za Bandari kwa wateja waliopo Uganda.

Aidha, Mhe. Rais Samia amesema Serikali ya Tanzania na Uganda zimekubaliana kujenga viwanda vya kutengeneza chanjo ya UVIKO 19 pamoja na magonjwa mengine ikiwa ni jitihada za kupambana na kuenea kwa magonjwa hayo.

Mhe. Rais Samia amemshukuru Mhe. Rais Museveni kwa uamuzi wa kujenga Shule ya Msingi Museveni yenye Mtaala wa Kiingereza wilayani Chato mkoani Geita na kueleza kuwa hatua hiyo ni ishara ya upendo, undugu na uhusiano mzuri kati ya nchi hizo mbili.

Kwa upande wake Mhe. Rais Museveni amemshukuru Mhe. Rais Samia kwa mualiko wa kuja kutembelea Tanzania katika ziara hiyo ambayo amesema inazidi kuimarisha uhusiano wa kindugu baina ya mataifa hayo uliokuwepo kwa muda mrefu.

Mhe. Rais Museveni amesema wamekubaliana kuwa Serikali zote mbili zitaendelea kusimamia mradi wa ujenzi wa Bomba la kusafirisha mafuta ghafi la Afrika Mashariki kutoka Hoima Uganda hadi Tanga nchini Tanzania na kuhakikisha unakamilika kwa wakati na kuleta manufaa yaliyokusudiwa.

Rais wa Jamhuri ya Muungano wa Tanzania, Mhe. Samia Suluhu Hassan, tarehe 25 Novemba, 2021 amefungua Mkutano wa 20 wa Taasisi za Fedha nchini na kueleza kuridhishwa kwake na ukuaji wa sekta ya fedha na nafasi yake katika uchumi wa Tanzania.

Mhe. Rais Samia ameeleza kuwa nchi yetu ikielekea kutimiza miaka 60 ya uhuru mafanikio mbalimbali yamepatikana katika sekta ya fedha na kupelekea Tanzania kuwa miongoni mwa nchi 10 barani Afrika ambazo uchumi wake unakuwa kwa kasi.

Katika mafaniko hayo ndani ya miaka 60, Mhe. Rais Samia amesema mafanikio mengine ni ukuaji endelevu wa uchumi , utulivu wa bei za bidhaa na huduma pamoja na utulivu katika mwenendo wa thamani ya fedha yetu dhidi ya fedha za kigeni

Aidha, Mhe. Rais amesema Tanzania imepiga hatua kubwa katika sekta ya fedha na uchumi kwa ujumla ambapo hivi sasa mauzo ya Dhamana za Serikali yamekuwa na uhitaji mkubwa kuliko upatikanaji wake na hicho ni kiashiria kikubwa cha muamko wa sekta binafsi katika kushirikiana na Serikali kutekeleza wajibu wake.

Mhe. Rais Samia amesema hali ya umasikini imepungua kutoka asilimia 28.2 mwaka 2015 hadi asilimia 26.2 kwa mwaka 2020 na umri wa kuishi kuongezeka kutoka miaka 50 hadi miaka 66.

Mhe. Rais Samia amesema pia nchi yetu imepiga hatua kubwa kimaendeleo na kufikia kuwa nchi ya kipato cha kati mwezi Julai 2020 hivyo tutahakikisha sera zetu zinakwenda kukuza uchumi ili tusirudi nyuma.

Aidha. Mhe. Rais Samia amesema licha ya UVIKO 19 kuathiri uchumi wetu hasa katika sekta ya utalii, Serikali imejitahidi kupambana na athari hizo na kuhakikisha uchumi wetu hauathiriki kwa kiasi kikubwa na kuwapa nafasi wananchi kufanya kazi za uzalishaji tofauti na nchi nyingine zilizoweka zuio la kutoka nje.

Vilevile, Mhe. Rais Samia amesema Serikali imechukua hatua mbalimbali za kupambana na kuzuia athari za janga la UVIKO 19 zisitupate kwa kiwango kikubwa kwa kuleta chanjo ambayo mpaka hivi sasa wananchi wanaendelea kupatiwa.

Mhe. Rais Samia amesema ana matumaini kuwa kutokana na athari mbalimbali za ugonjwa huo kwenye uchumi mkutano huo utakuja na suluhisho yatakayoweza kusaidia uchumi wa Tanzania kuzidi kukuwa.

Aidha, Mhe. Rais Samia amebainisha kuwa Serikali iliwasiliana na Taasisi mbalimbali za fedha duniani kuhusu msamaha wa madeni au kurefusha muda wa ulipaji wa madeni hayo kutokana na UVIKO 19 kuathiri uchumi wetu. Pia, Serikali ilipata mkopo ambao umesaidia kwa kiasi kikubwa katika kukabiliana na athari hizo.

Aidha, Mhe. Rais Samia amewataka washiriki wa Mkutano huo kuja na mapendekezo ya namna bora ambayo teknolojia inaweza kusaidia ukuaji wa sekta ya fedha na pia kutathmini matumizi ya sarafu za mtandaoni (crypto currencies) ambazo zinaendelea kuenea duniani ili Tanzania iwe mshiriki mzuri katika nyanja hizo.

Mhe. Rais Samia ametoa wito pia kwa Taasisi za fedha nchini kupunguza kiwango cha riba wanachotoza katika mikopo ili watu wengi zaidi waweze kupata mikopo himilivu kwa ustawi wa uchumi wa

Taifa na kutoa fursa bora zaidi kwa sekta binafsi kuweza kufanya biashara.

Rais wa Jamhuri ya Muungano wa Tanzania Mhe. Samia Suluhu Hassan, leo tarehe 23 Novemba, 2021 amezindua Maadhimisho ya Wiki ya Nenda kwa Usalama Barabarani kitaifa iliyofanyika katika Uwanja wa Sheikh Amri Abeid Jijini Arusha.

Mhe. Rais Samia amesema jukumu la usalama barabarani sio la Askari wa barabarani peke yao bali ni la kila mwananchi katika jamii na hivyo kumtaka kila mwananchi kuwa makini na kuhakikisha matumizi sahihi ya barabara.

Aidha, Mhe. Rais Samia amesema suala la usalama barabarani lipewe uzito wa kuwa ajenda ya kitaifa katika majukwaa pamoja na kuwahusisha kikamilifu washirika wa maendeleo hasa wale ambao wamepiga hatua kubwa katika maendeleo ya nyanja ya usalama barabarani.

Mhe. Rais Samia amesema ni jambo la kusikitisha kuona kuwa ajali za barabarani bado zimekuwa zikigharimu maisha ya watanzania wengi mbali na juhudi zinazofanywa na Serikali katika kuwekeza kwenye miundombinu bora ya barabara.

Vilevile, Mhe. Rais amesema vijana wengi ambao ndio nguvu kazi ya taifa wamekuwa wahanga wakubwa wa ajali za barabarani ambapo asilimia kubwa za ajali hizo husababishwa na waendesha pikipiki maarufu kama bodaboda.

Mhe. Rais Samia amesema takwimu zinaonesha kuwa katika kipindi cha miaka mitano jumla ya wapanda pikipiki 2,220 wamepoteza maisha kutokana na ajali za barabarani na kusababisha majeruhi 4,202.

Mhe. Rais Samia amelitaka Jeshi la Polisi kuwa na msaada kwa wananchi na sio kero kwao ili kujenga mahusiano mazuri katika jamii hali itakayopelekea kutatuliwa kwa changamoto mbalimbali kwa wakati.

Ametaja baadhi ya kero zinazofanywa na Askari wa usalama barabarani kuwa ni pamoja na kushikilia leseni za madereva kwa muda mrefu, kulazimisha madereva kulipa faini za papo kwa papo kinyume na ilivyo Sheria ya Usalama Barabarani, hivyo kuwataka wahusika kubalika mara moja.

Aidha, Mhe. Rais Samia ameliagiza Jeshi la Polisi Kikosi cha Usalama Barabarani kwa kushirikianana na vyuo vikuu, vyuo vya ufundi na chuo cha Usafirishaji (NIT) kuwekeza katika utafiti wa suala la usalama barabarani ili kupata suluhu ya kisayansi na kimfumo ya namna ya kupunguza ajali za barabarani.

Vilevile, Mhe. Rais Samia amelitaka Baraza la Usalama Barabarani kutumia mitandao ya kijamii kutoa elimu ya usalama barabarani kwasababu kwa hivi sasa dunia ni ya kidijitali na taarifa nyingi zipo kiganjani ambapo vijana wengi hutumia mitandao hiyo.

Pia, Mhe. Rais Samia ameelekeza kufanyika kwa ukaguzi wa kina wa magari kabla ya kutoa stika za usalama barabarani na kutaka Taasisi zinazohusika kukaa na wadau na Sekta binafsi kujadiliana jinsi ya kuendesha zoezi hilo kwa pamoja kwa kutumia vifaa vya kisasa.

Katika Maadhimisho hayo ya Wiki ya Nenda kwa Usalama Barabarani, Mhe. Rais Samia amekabidhi vitendea kazi kwa Jeshi la Polisi Kikosi cha Usalama Barabarani vilivyotolewa na wadau mbalimbali. Pia, Mhe. Rais alitembelea mabanda mbalimbali pamoja na kupata maelezo kuhusu shughuli zinazofanywa na wadau mbalimbali kuhusu usalama barabarani.

Rais wa Jamhuri ya Muungano wa Tanzania Mhe. Samia Suluhu Hassan, tarehe 22 Novemba, 2021 amefungua Hoteli ya Gran Meliá yenye hadhi ya Nyota Tano iliyopo Jijini Arusha.

Akizungumza katika hafla ya ufunguzi wa Hoteli hiyo, Mhe. Rais Samia amemshukuru Mwanzilishi na Mwenyekiti wa Hoteli hiyo Bw. Ali Saeed Albwardy kwa uamuzi wake wa kuwekeza nchini kwa kujenga hoteli hiyo ambayo ni moja ya hoteli zenye hadhi kubwa duniani.

Mhe. Rais amesema uwekezaji huo ni ishara ya kuwepo kwa mazingira bora ya utalii nchini na kuwa uzinduzi wa Hoteli hiyo utaiweka Tanzania katika ramani za Hoteli za Gran Meliá, ambapo duniani zipo 350 katika nchi 40.

Ameeleza kuwa vivutio vya watalii nchini vimekuwa vikitambuliwa kimataifa ambapo Tanzania ilitajwa na tovuti ya SafariBookings.com kuwa sehemu salama ya kufikia Afrika ambapo Mlima Kilimanjaro, Bonde la Ngorongoro na Hifadhi ya Taifa ya Serengeti kuwa miongoni mwa hifadhi zilizopendekezwa katika orodha ya maajabu Saba ya Afrika.

Pia, Mhe. Rais Samia amesema Tanzania imetajwa na majarida ya New York Times na Lonely Planet kama sehemu bora za kutembelea na Bonde la Ngorongoro kutajwa na mtandao wa Fox News.com kama moja ya Bonde linalovutia duniani na jarida la The World Travel Award kuitaja Serengeti kama Mbuga ya Wanyama inayoongoza Afrika.

Mhe. Rais Samia amesema Serikali ya Tanzania inatambua umuhimu wa Uchumi wa Utalii kwa nchi yetu hivyo inafanya jitihada kuimarisha mazingira ya kibiashara kwa kuendeleza na kuboresha miundombinu ikiwemo barabara, reli, anga na usafiri wa maji ili kuweka mazingira mazuri kwa utalii na kuwezesha uwekezaji.

Aidha, Mhe. Rais Samia ameeleza kuwa, kutokana na dunia kukumbwa na UVIKO 19 mwezi Desemba, 2019 nchi nyingi ikiwemo Tanzania zilichukua hatua mbalimbali ili kukabiliana na ugonjwa huo lakini hata hivyo uliathiri safari za kimataifa pamoja na sekta ya utalii na uchumi.

Mhe. Rais Samia amesema katika kuhakikisha sekta ya utalii inakidhi matakwa ya kujikinga na UVIKO 19, Serikali kupitia Mwongozo wa Shirika la Afya Duniani (WHO) na Baraza la Kusafiri na Utalii Duniani (WTTC) zilianzisha utaratibu wa viwango vya Kitaifa vya Uendeshaji ili kuzuia maambukizi ya UVIKO 19 katika shughuli zinazohusiana na utalii nchini.

Utekelezaji wa utaratibu huo uliwezesha Tanzania kutunukiwa Muhuri wa Usafiri Salama na kuifanya Tanzania kuwa miongoni mwa nchi chache ambazo zinaendelea kupokea watalii hata kipindi cha janga la UVIKO 19.

Kwa upande mwingine Mhe. Rais Samia amesema kwa kuwa Utalii una athari chanya na unagusa kila sekta ya uchumi hivyo ni matarajio yake kuwa Hoteli ya Gran Melia itakuwa na mchango katika kutokomeza umasikini kwa wakulima na wavuvi kwa kutumia bidhaa za vyakula na vinywaji vinavyozalishwa nchini Tanzania.

Mhe. Rais Samia amezitaka Hoteli zote hapa nchini kudumisha utamduni wa kitanzania kwa kuandaa vyakula vyenye asili ya kitanzania katika migahawa ya Hoteli hizo.

Rais wa Jamhuri ya Muungano wa Tanzania na Amiri Jeshi Mkuu Mhe. Samia Suluhu Hassan, tarehe 22 Novemba, 2021 amewatunuku Kamisheni Maafisa Wanafunzi 118 wa Jeshi la Ulinzi la Wananchi wa Tanzania (JWTZ) kundi la 02/18 wa Shahada ya Sayansi ya Kijeshi na kundi la 08/18 Jeshi la Anga, katika sherehe zilizofanyika katika Chuo cha Mafunzo ya Jeshi (TMA) Monduli, mkoani Arusha.

Akitoa maelezo ya sherehe hizo, Mkuu wa Chuo cha Mafunzo ya Kijeshi Monduli (TMA) Brig. Jen. Jackson Mwaseba amesema kati ya Maafisa hao wanafunzi waliohitimu 62 ni wa shahada ya Sayansi ya Kijeshi inayotolewa na Chuo cha Uhasibu Arusha (IAA) kwa kushirikiana na Chuo cha TMA na 56 ni wahitimu wa mafunzo ya Urubani.

Mkuu wa Majeshi ya Ulinzi Jen. Venance Mabeyo amemshukuru Mhe. Rais Samia na Serikali kwa jitihada anazozifanya kuliwezesha Jeshi la Ulinzi la Wananchi wa Tanzania kutekeleza kwa ukamilifu majukumu yake.

Aidha, Jen. Mabeyo amewapongeza Maafisa hao wapya kwa kuhitimu mafunzo yao kwa viwango vinavyokubalika na kuwakumbusha kuheshimu, kuthamini, kuzingatia na kutunza kiapo cha Utii walichoapa mbele ya Rais na Amiri Jeshi Mkuu.

Jen. Mabeyo amewataka Maafisa hao wapya kuwafundisha wafuasi wao maadili mema na kuwa macho na matishio ya ndani na nje ya nchi.

Akizungumza na Majenerali, Maafisa, Askari na Wageni waalikwa Mhe. Rais Samia amekipongeza Chuo cha Mafunzo ya Kijeshi Monduli (TMA) na Chuo cha Uhasibu Arusha kwa ubunifu walionyesha katika kutoa mafunzo hayo kwa Maafisa hao wapya wa JWTZ.

Aidha, Mhe. Rais Samia amewapongeza pia Wahitimu wote wa mafunzo hayo ya Shahada ya Sayansi ya Kijeshi kwa kufuzu mafunzo yao.

Pamoja na kutunuku Kamisheni, Mhe. Rais Samia ametoa zawadi kwa Maafisa wanafunzi waliofanya vizuri zaidi na kuwavisha mabawa Maafisa wapya wawili kwa niaba ya wenzao ikiwa ni ishara ya kuhitimu mafunzo yao ya urubani.

Kwa upande wake Waziri wa Fedha na Mipango Mhe. Dkt. Mwigulu Nchemba amempongeza Mhe. Rais Samia kwa kazi kubwa anayoifanya ikiwa ni pamoja na kukiwezesha Chuo cha Uhasibu Arusha kutoa mafunzo ya Shahada ya Usalama wa Kimtandao (Cyber Security).

Sherehe za kuwatunuku Kamisheni Maafisa hao zimehudhuriwa na viongozi mbalimbali akiwemo Katibu Mkuu Kiongozi Balozi Hussein Katanga, Waziri wa Ulinzi na Jeshi la Kujenga Taifa Mhe. Dkt. Stergomena Tax, Waziri wa Fedha pamoja na Mipango Mhe. Dkt. Mwigulu Nchemba. Wengine ni Waziri wa Elimu, Sayansi na Teknolojia Mhe. Prof. Joyce Ndalichako, Waziri wa Mambo ya Ndani ya Nchi Mhe. George Simbachawene, Makatibu Wakuu na Wakuu wa Vyombo vya Ulinzi na Usalama pamoja na wananchi kutoka mikoa mbalimbali.

Jamhuri ya Muungano wa Tanzania

Tovuti Rasmi ya Rais

Taarifa kwa Vyombo vya Habari

MHE. DKT. SAMIA SULUHU HASSAN

Rais wa Jamhuri ya Muungano wa Tanzania