President's Official Website

Rais wa Jamhuri ya Muungano wa Tanzani, Mhe. Samia Suluhu Hassan leo tarehe 04 Juni, 2021 ameagana na aliyekuwa Balozi wa China hapa nchini Mhe. Wang Ke ambaye amemaliza kipindi chake. Katika mazungumzo yaliyofanyika Ikulu Chamwino Mkoani Dodoma, Mhe. Rais Samia amemshukuru Mhe. Wang Ke kwa jitihada zake za kuendeleza na kukuza uhusiano wa Tanzania na China ambao umewezesha kutekelezwa kwa miradi mbalimbali iliyofadhiliwa na China hapa nchini ikiwemo maktaba ya Chuo Kikuu cha Dar es Salaam, jengo la Wizara ya Mambo ya Nje na Ushirikiano wa Afrika Mashariki lililopo Jijini Dar es Salaam na msaada wa shilingi Bilioni 35 zilizoelekezwa katika miradi ya maendeleo. Mhe. Rais Samia pia amemshukuru kwa ufadhili wa China katika miradi mbalimbali ya ujenzi wa miundombinu na uboreshaji wa huduma za kijamii pamoja na ushirikiano wa kibiashara na uwekezaji ambao pamoja na kukuza pato la nchi umesaidia Watanzania wengi kupata ajira. Mhe. Rais Samia amepokea salamu za Rais wa China Mhe. Rais Xi Jinping na amemtakia yeye na Wachina wote maadhimisho mema ya miaka 100 ya Chama cha Kikomunisti cha China (CPC) itakayotimia tarehe 01 Julai, 2021 na shukrani kwa uhusiano na ushirikiano mzuri kati ya Chama Cha Mapinduzi (CCM) na CPC, na uhusiano na ushirikiano kati ya Tanzania na China uliodumu kwa miaka 56. Ameeleza kuwa anatambua kazi kubwa iliyofanywa na CPC katika kuijenga China, kujenga na kuimarisha uhusiano wake na Mataifa mbalimbali ikiwemo Tanzania na amemhakikishia kuwa Tanzania itaendeleza na kukuza zaidi uhusiano na ushirikiano huo. Kwa upande wake Mhe. Wang Ke amemshukuru Mhe. Rais Samia kwa ushirikiano mkubwa alioupata kutoka Serikalini wakati wote wa kipindi chake cha Ubalozi na amempongeza kwa kupokea kijiti cha Urais kutoka kwa aliyekuwa Rais wa Jamhuri ya Muungano wa Tanzania Hayati Dkt. John Pombe Magufuli. Amewasilisha salamu za Rais wa China Mhe. Xi Jinping ambaye amesema ana imani kubwa kuwa Mhe. Rais Samia atafanya mazuri na makubwa kwa Tanzania kutokana na dhamira yake ya kuendeleza kazi nzuri iliyofanywa na Hayati Dkt. Magufuli hususani uendelezaji wa miradi ya kimkakati, kuchukua hatua madhubuti za kuboresha mazingira ya kufanya biashara na kuchukua hatua za kisayansi za kukabiliana na janga la ugonjwa wa Korona (Covid-19). Amesema China itaunga mkono juhudi zinazofanywa na Mhe. Rais Samia na ameshukuru kwa salamu za heri na pongezi kwa chama cha CPC kutimiza miaka 100 ambapo pamoja na kufanya mageuzi na kuleta maendeleo makubwa kwa China kimekua kutoka wanachama 50 hadi wanachama Milioni 92 na kwa sasa kipo katika mchakato wa mageuzi mengine ya mfumo wake wa ujamaa wenye misingi ya Kichina utakaojenga nchi ya kisasa zaidi na kutoa elimu ya historia ya China kwa vijana wake. Aidha, Mhe. Wang Ke amesema China ipo tayari kushirikiana na Tanzania katika kukabiliana na ugonjwa wa Korona. Mazungumzo hayo yamehudhuriwa na Naibu Waziri wa Mambo ya Nje na Ushirikiano wa Afrika Mashariki Mhe. Mbarouk Nassor Mbarouk.

Rais wa Jamhuri ya Muungano wa Tanzania, Mhe. Samia Suluhu Hassan tarehe 01 Juni, 2021 amefanya ziara ya kushtukiza kwa kutembelea masoko ya Kariakoo na Kisutu, mradi wa ujenzi wa miundombinu ya mabasi yaendayo haraka (BRT) awamu ya pili na Hospitali ya Rufaa ya Mkoa Mwananyamala Mkoani Dar es Salaam. Katika Soko la Kariakoo, Mhe. Rais Samia amewatembelea wafanyabiashara wanaouza bidhaa zao hasa vyakula ndani ya soko kuu na kujionea msongamano mkubwa wa bidhaa, wafanyabiashara na wananchi wanaokwenda kununua bidhaa. Wafanyabiashara hao wamelalamikia tatizo la ugumu wa uingizaji wa bidhaa kutokana na njia za kuingia sokoni kufungwa na wafanyabiashara wengine ambao wamepanga bidhaa zao njiani, tozo kubwa za vizimba, ushuru wa bidhaa zinazoingia sokoni na gharama za usafishaji wa bidhaa kutoka masoko mengine. Baada ya kujionea hali halisi, Mhe. Rais Samia ameelezea kusikitishwa kwake na hali hiyo na amesema Serikali itafanya tathmini ya uendeshaji wa soko hilo ili kurekebisha dosari zilizopo ikiwemo kuratibu uingizaji wa mizigo, mpangilio wa bidhaa sokoni na kuboresha usafi. Ameagiza kusimamishwa mara moja kwa uongozi wa Shirika la Masoko Kariakoo ili kupisha uchunguzi kufuatia malalamiko mbalimbali yaliyotolewa na wafanyabiashara dhidi ya viongozi hao, lakini wakati hatua hizo zinachukuliwa amewataka wafanyabiashara kuendelea kufanya kazi kwa kuzingatia taratibu na sheria. Katika soko la Kisutu, Mhe. Rais Samia amejionea kazi za ukamilishaji wa soko hilo ambalo linatarajiwa kukamilika wiki ijayo na kuwarejesha wafanyabiashara waliokuwa wameondolewa kupisha ujenzi wake. Mhe. Rais Samia amekagua maendeleo ya ujenzi wa miundombinu ya mabasi yaendayo haraka (BRT) awamu ya pili kwa kutembelea maeneo ya Mbagala Rangi Tatu na Mbagala Zakhem ambapo kazi za ujenzi zimefikia asilimia 16 badala ya asilimia 60 iliyotarajiwa. Akiwasalimu wananchi wa Mbagala, Mhe. Rais Samia ameeleza kutoridhishwa na kasi ndogo ya ujenzi wa mradi huo, na amemtaka mkandarasi kuongeza kasi na kuacha visingizio. Amewahakikishia wananchi kuwa mradi huo pamoja na miradi mingine inayotekelezwa na Serikali katika maeneo mbalimbali nchini itakamilishwa kama ilivyopangwa na pale ambapo mkandarasi atachelewesha hatua zitachukuliwa kwa mujibu wa sheria. Mhe. Rais Samia pia amefanya ziara ya kushtukiza katika Hospitali ya Rufaa ya Mkoa Mwananyamala Wilayani Kinondoni ambapo pamoja na kupokea maelezo ya Mganga Mfawidhi wa hospitali hiyo Dkt. Zavery Peter Benela amewatembelea wagonjwa wanaopatiwa matibabu ya nje na waliolazwa wodini. Mhe. Rais Samia ametoa msaada wa shuka 200 kwa ajili ya wagonjwa na amewahakikishia wananchi kuwa Serikali itachukua hatua zaidi kutatua tatizo la upatikanaji wa dawa, kuboresha maslahi ya Madaktari na Wauguzi na kuboresha mazingira ya hospitali hiyo. Aidha, Mhe. Rais Samia amewataka Watanzania wote kuendelea kuchukua tahadhari zinazoshauriwa na wataalamu kwa ajili ya kujikinga na maambukizi ya ugonjwa wa Korona (Covid-19).

Rais wa Jamhuri ya Muungano wa Tanzania, Mhe. Samia Suluhu Hassan tarehe 24 Mei, 2021 amekutana na kufanya mazungumzo na mfanyabiashara Alhaji Aliko Dangote ambaye amewekeza katika kiwanda kikubwa cha uzalishaji wa saruji Mkoani Mtwara. Baada ya mazungumzo hayo, Alhaji Dangote amempongeza Mhe. Rais Samia kwa kuchukua hatua mbalimbali za kuboresha mazingira ya biashara nchini Tanzania na amemuahidi kuwa kampuni yake ambayo imewekeza hapa nchini kiasi cha Dola za Marekani Milioni 770 (sawa na shilingi Trilioni 1.761) itaendelea kuwekeza katika maeneo mengine ikiwemo mpango wake wa kujenga kiwanda cha kuzalisha mbolea. “Tutaendelea kuwekeza Tanzania ili kuzalisha ajira, mapato ya nchi na kuinua ustawi wa wananchi wa Tanzania, nadhani anahitaji kuungwa mkono katika hili na tumemuahidi kuwa tutaendelea kuwekeza kwa kiasi kikubwa hapa Tanzania ili kuunga mkono anachokifanya, sisi tutazalisha ajira” amesema Alhaji Dangote. Amesema kutokana na kubadilika na kuimarika kwa mazingira ya biashara nchini Tanzania atawahimiza wafanyabiashara na wawekezaji wenzake kuwekeza Tanzania kwa kuwa Serikali ipo tayari kushirikiana nao. Kwa upande wake, Mhe. Rais Samia amempongeza Alhaji Dangote kwa uwekezaji alioufanya hapa nchini na amemhakikishia kuwa Serikali itahakikisha uwekezaji wake na wawekezaji wengine unalindwa kwa manufaa ya pande zote mbili. Mhe. Rais Samia amemuagiza Waziri wa Uwekezaji Mhe. Geoffrey Mwambe, Waziri wa Viwanda na Biashara Mhe. Prof. Kitila Mkumbo na Naibu Waziri wa Fedha na Mipango Mhe. Hamad Masauni ambao wamehudhuria mazungumzo hayo kufanyia kazi changamoto zote zinazokikabili kiwanda cha Dangote ili kiendelee kuzalisha inavyotakikana na kuleta manufaa yaliyokusudiwa.

Rais wa Jamhuri ya Muungano wa Tanzania, Mhe. Samia Suluhu Hassan tarehe 25 Mei, 2021 amekutana na kufanya mazungumzo na Waziri wa Mambo ya Nje wa Saudi Arabia Mwana wa Kifalme Faisal bin Farhan Al Saud. Mhe. Rais Samia amemshukuru Mwana wa Kifalme Faisal kwa kufanya ziara hiyo hapa nchini na kwa uhusiano na ushirikiano mzuri uliopo kati ya Tanzania na Saudi Arabia ambayo inatoa ufadhili katika kuboresha huduma za afya, elimu, maji na miundombinu hapa nchini. Amemtaka kufikisha salamu zake kwa Mfalme wa Saudi Arabia Mtukufu Salman bin Abdulaziz Al Saud na kumhakikishia kuwa Tanzania ipo tayari kuendeleza na kukuza zaidi uhusiano na ushirikiano wake na Saudi Arabia katika Nyanja mbalimbali za kiuchumi na ustawi wa jamii. Baadhi ya maeneo ambayo Mhe. Rais Samia ameomba kukuza zaidi uhusiano na ushirikiano na Saudi Arabia ni kuimarisha biashara ya mazao ya mifugo na uvuvi, mazao ya kilimo, kutumia fursa mbalimbali za uwekezaji zilizopo Tanzania na kuanzisha ofisi ya Ubalozi Mdogo wa Saudi Arabia Visiwani Zanzibar. Kwa upande wake, Mwana wa Kifalme Faisal amemshukuru Mhe. Rais Samia kwa uhusiano na ushirikiano mzuri wa Saudi Arabia na Tanzania na amemhakikishia kuwa Saudi Arabia ipo tayari kuuimarisha zaidi uhusiano huo katika maeneo mbalimbali yakiwemo biashara na uwekezaji, na ameeleza kuwa Saudi Arabia inahitaji kupata mazao mengi ya chakula. Amebainisha kuwa ni muhimu kwa wafanyabiashara wa Tanzania na Saudi Arabia kushirikiana ili kukuza biashara kati ya nchi hizi mbili ikiwa ni pamoja kuwa safari za ndege za moja kwa moja kati ya Tanzania na Saudi Arabia ili kukuza utalii na biashara. Mazungumzo hayo yamehudhuriwa na Waziri wa Mambo ya Nje na Ushirikiano wa Afrika Mashariki Mhe. Balozi Liberata Mulamula, Waziri wa Uwekezaji Mhe. Geoffrey Mwambe, Waziri wa Ujenzi, Mawasiliano na Uchukuzi wa Zanzibar Mhe. Rahma Kassim Ali na Naibu Waziri wa Fedha na Mipango Mhe. Hamad Masauni.

Rais wa Jamhuri ya Muungano wa Tanzania, Mhe. Samia Suluhu Hassan na Rais wa Jamhuri ya Uganda, Mhe. Yoweri Kaguta Museveni leo tarehe 20 Mei, 2021 wameshuhudia utiaji saini wa mkataba hodhi wa ujenzi wa bomba la mafuta ghafi la Afrika Mashariki litakalojengwa kuanzia Hoima nchini Uganda hadi Bandari ya Tanga nchini Tanzania kati ya Serikali ya Tanzania na Kampuni ya Mafuta Ghafi ya Afrika Mashariki (EACOP). Hafla ya utiaji saini mkataba huo imefanyika katika viwanja vya Ikulu Jijini Dar es Salaam na kuhudhuriwa na Makamu wa Rais wa Jamhuri ya Muungano wa Tanzania Mhe. Dkt. Philip Isdor Mpango, Mawaziri, viongozi wakuu wa Vyombo vya Ulinzi na Usalama Wabunge, Makatibu Wakuu, wawakilishi kutoka kampuni za uwekezaji wa CNOCC ya China na Total ya Ufaransa na wawakilishi kutoka Sekta binafsi. Kwa upande wa Tanzania mkataba huo umetiwa saini na Waziri wa Nishati Mhe. Dkt. Medard Matogolo Kalemani na kushuhudiwa na Mwanasheria Mkuu wa Serikali Prof. Adelardus Kilangi wakati upande wa kampuni ya EACOP umetiwa saini na Mkurugenzi Mtendaji wa kampuni hiyo Bw. Martin John Tiffen na kushuhudiwa na Rais wa Utafiti na Uzalishaji wa Total Afrika Bw. Nicolas Terraz. Mhe. Waziri Kalemani amesema utiaji saini wa mkataba huu umekamilisha hatua zote za majadiliano na sasa kinachoendelea ni kuanza kwa kazi za ujenzi wa bomba litakalokuwa na urefu wa kilometa 1,443 ambapo kati yake kilometa 1,147 zitajengwa katika ardhi ya Tanzania. Ujenzi wa mradi huu unaotarajiwa kugharimu Dola za Marekani Bilioni 4.16 utakamilika katika kipindi cha miaka 3 ambapo utakuwa na uwezo wa kusafirisha mapipa 216,000 ya mafuta ghafi kwa siku, utahusisha ujenzi wa vituo 8, ujenzi wa vituo vya kulainisha mabomba ya chuma 29, ujenzi wa valvu 76 na ujenzi wa matanki 5 yenye uwezo wa kuhifadhi mapipa laki 5 ya mafuta kila moja katika Bandari ya Tanga. Tanzania na Uganda kila moja inamiliki asilimia 15 ya hisa zote za kampuni hiyo, na kutokana na umiliki huo Tanzania itapata asilimia 60 ya mapato na Uganda itapata asilimia 40 na kutokana na mapato ya Dola za Marekani Milioni 290 zinazotarajiwa katika kipindi cha miaka 25 ya uhai wa mradi, Tanzania itapata mapato ya Dola za Marekani Milioni 59, itapata kodi ya kiasi cha Dola za Marekani Milioni 73, fedha za kigeni zitaongezeka kwa asilimia 53 na ajira zaidi ya 10,000 katika Mikoa 8, Wilaya 24, Kata 134, Vijiji 257 na Vitongoji 527 ambako bomba litapita. Katika hotuba yake, Mhe. Rais Samia amemshukuru aliyekuwa Rais wa Jamhuri ya Muungano wa Tanzania Hayati Dkt. John Pombe Magufuli aliyeanza mchakato wa mradi huu pamoja na Mhe. Rais Museveni, amewapongeza Mawaziri, Makatibu Wakuu na kamati za majadiliano za Tanzania na Uganda kwa kufanikisha kuanza kwa mradi huo. Ameahidi kuwa Tanzania itauendeleza, kuuenzi, kuukuza na kuuimarisha uhusiano na ushirikiano wa kirafiki, kidugu na kihistoria kati yake na Uganda ikiwa ni pamoja na kuhakikisha mradi huu unafanikiwa kwa manufaa ya wananchi wa Tanzania na Uganda. Mhe. Rais Samia amesema anaamini kuwa mradi huo utachochea juhudi za pamoja za utafutaji mafuta na gesi katika nchi za ukanda huu zikiwemo Tanzania, DRC, Burundi na Sudan Kusini na pia utawavutia wawekezaji wengi zaidi kuja kuwekeza Tanzania na nchi nyingine za ukanda huu. Kwa upende wake, Mhe. Rais Museveni amesema moja ya changamoto kubwa alizoziona katika safari yake ya kupigania ukombozi na maendeleo ya Afrika ni kukosekana kwa mwelekeo lakini kuanza kwa mradi huu ni uthibitisho kuwa sasa mwelekeo unaonekana. Amefafanua kuwa katika kutafuta ustawi wa jamii, pamoja na kusimamia sekta za huduma za jamii zinazojumuisha elimu, afya, maji na usalama ni lazima kusimamia uzalishaji mali utakaosaidia kupata utajiri na fedha kama vile kilimo, viwanda, huduma na tehama ambazo kwa pamoja zinahitaji uwepo wa miundombinu bora na nishati. Hata hivyo, Mhe. Rais Museveni ameonya kuwa mradi wa bomba la mafuta usisababishe Tanzania na Uganda kubweteka na kuacha kusimamia ipasavyo sekta za kudumu za uzalishaji mali kwa kuwa mafuta yana mwisho. Mhe. Rais Samia na Mhe. Rais Museveni wametia saini tamko la pamoja la utekelezaji wa mradi huo (Communiqué) na kisha Mhe. Rais Museveni amerejea nchini Uganda.

Rais wa Jamhuri ya Muungano wa Tanzania, Mhe. Samia Suluhu Hassan leo tarehe 17 Mei, 2021 amewaapisha Majaji wa Mahakama ya Rufani 7 na Majaji wa Mahakama Kuu 21 aliowateua tarehe 11 Mei, 2021. Uapisho huo umefanyika Ikulu Jijini Dar es Salaam na kuhudhuriwa na Makamu wa Rais Mhe. Dkt. Philip Isdor Mpango, Waziri Mkuu Mhe. Kassim Majaliwa Majaliwa, Spika wa Bunge Mhe. Job Yustino Ndugai, Jaji Mkuu wa Tanzania Mhe. Prof. Ibrahim Hamis Juma, Jaji Mkuu wa Zanzibar Mhe. Othman Makungu, Waziri wa Katiba na Sheria Mhe. Prof. Palamagamba Kabudi, viongozi wakuu wa Vyombo vya Ulinzi na Usalama, viongozi wa Dini na viongozi wa taasisi mbalimbali. Majaji wa Mahakama ya Rufani walioapishwa ni Mhe. Patricia Saleh Fikirini, Mhe. Penterine Muliisa Kente, Mhe. Dkt. Paul Faustine Kihwelo, Mhe. Lucia Gamuya Kairo, Mhe. Lilian Leonard Mashaka, Mhe. Issa John Maige na Mhe. Abraham Makofi Mwampashi. Majaji wa Mahakama Kuu walioapishwa ni Mhe. Katarina Tengia Revocati Mteule, Mhe. Biswalo Eutropius Kachele Mganga, Mhe. Zahra Abdallah Maruma, Mhe. Devotha Christopher Kamuzora, Mhe. Messe John Chaba, Mhe. Lilian Jonas Itemba, Mhe. Awamu Ahmada Mbagwa, Mhe. Ayoub Yusuf Mwenda, Mhe. Nyigulila Robert Mwaseba, Mhe. John Francis Nkwabi, Mhe. Safina Henry Simfukwe. Majaji wa Mahakama Kuu wengine walioapishwa ni Mhe. David Patrick Ngunyale, Mhe. Frank Habibu Mahimbali, Mhe. James Mutakyahwa Karayemaha, Mhe. Emmanuel Loitare Ngigwana, Mhe. Abdi Shabaan Kagomba, Mhe. Arafa Mpinga Msafiri, Mhe. Dkt. Ubena John Agatho, Mhe. Dkt. Eliamani Isaya Laltaika, Mhe. Dkt. Theodora Nemboyao Mwenegoha, Mhe. Mwanabaraka Saleh Mnyukwa. Akizungumza baada ya kuwaapisha, Mhe. Rais Samia ameipongeza Mahakama ya Tanzania kwa kuongeza idadi ya Majaji wa Mahakama ya Rufani na Mahakama Kuu ambao watasaidia kupunguza mrundikano wa kesi na ucheleweshaji wa mashauri katika Mahakama hizo hali inayoleta dosari katika utoaji wa haki. Mhe. Rais Samia amewataka Majaji hao kwenda kutekeleza wajibu wao kwa uaminifu, uadilifu, utu, imani na nafsi zao huku wakizingatia kiapo chao na amevitaka vyombo vinavyohusika katika upelelezi wa mashauri mbalimbali kuharakisha upelelezi huo ili mashauri yanayopelekwa Mahakamani yafanyiwe maamuzi haraka. Ameipongeza Mahakama ya Tanzania kwa kazi kubwa wanayoifanya licha ya kukabiliwa na changamoto mbalimbali na ameahidi kuwa kadiri Serikali itakavyopata uwezo itashughulikia changamoto hizo. Jaji Mkuu wa Tanzania, Mhe. Prof. Ibrahim Hamis Juma amemshukuru Mhe. Rais Samia kwa kuwateua na kuwaapisha Majaji hao ambao wameongeza idadi ya Majaji wa Mahakama ya Rufani kutoka 17 hadi 24 na Majaji wa Mahakama Kuu kutoka 70 hadi 86. Amesema ongezeko la Majaji wa Mahakama ya Rufani litasaidia kuongeza idadi ya mashauri yanayosikilizwa na kuamuliwa na majopo ya Majaji hao kutoka 1,620 hadi kufikia 2,268, na kupungua kwa mzigo wa mashauri kwa kila Jaji wa Mahakama Kuu kutoka mashauri 342 hadi 257.

Rais wa Jamhuri ya Muungano wa Tanzania, Mhe. Samia Suluhu Hassan amefanya uteuzi wa Wakuu wa Mikoa na watendaji wakuu wa taasisi kama ifuatavyo; 1. Amemteua Bw. Anthony John Mtaka kuwa Mkuu wa Mkoa wa Dodoma. Kabla ya uteuzi huo Bw. Mtaka alikuwa Mkuu wa Mkoa wa Simiyu. 2. Amemteua Bi. Zainab Rajab Telack kuwa Mkuu wa Mkoa wa Lindi. Kabla ya uteuzi huo Bi. Telack alikuwa Mkuu wa Mkoa wa Shinyanga na anachukua nafasi ya Bw. Godfrey Zambi ambaye amestaafu. 3. Amemteua Mhandisi Robert Gabriel Luhumbi kuwa Mkuu wa Mkoa wa Mara. Kabla ya uteuzi huo Bw. Luhumbi alikuwa Mkuu wa Geita. 4. Amemteua Bw. Juma Zuberi Homera kuwa Mkuu wa Mbeya. Kabla ya uteuzi huo Bw. Homera alikuwa Mkuu wa Mkoa wa Katavi. 5. Amemteua Bw. Martin Reuben Shigella kuwa Mkuu wa Mkoa wa Morogoro. Kabla ya uteuzi huo Bw. Shigella alikuwa Mkuu wa Mkoa wa Tanga na anachukua nafasi ya Bw. Loata Erasto Ole Sanare ambaye amemaliza muda wake. 6. Amemteua Brig. Jen. Marco Elisha Gaguti kuwa Mkuu wa Mkoa wa Mtwara. Kabla ya uteuzi huo Brig. Jen. Gaguti alikuwa Mkuu wa Mkoa wa Kagera na anachukua nafasi ya Bw. Gelasius Gasper Byakanwa ambaye atapangiwa majukumu mengine. 7. Amemteua Bw. Albert Chalamila kuwa Mkuu wa Mkoa wa Mwanza. Kabla ya uteuzi huo Bw. Chalamila alikuwa Mkuu wa Mkoa wa Mbeya. 8. Amemteua Bw. Aboubakar Mussa Kunenge kuwa Mkuu wa Mkoa wa Pwani. Kabla ya uteuzi huo Bw. Kunenge alikuwa Mkuu wa Mkoa wa Dar es Salaam na anachukua nafasi ya Mhandisi Evarist Welle Ndikilo ambaye amestaafu. 9. Amemteua Bw. Joseph Joseph Mkirikiti kuwa Mkuu wa Mkoa wa Rukwa. Kabla ya uteuzi huo Bw. Mkirikiti alikuwa Mkuu wa Mkoa wa Manyara na anachukua nafasi ya Bw. Joachim Leonard Wangabo ambaye amestaafu. 10. Amemteua Dkt. Binilith Satano Mahenge kuwa Mkuu wa Mkoa wa Singida. Kabla ya uteuzi huo Dkt. Mahenge alikuwa Mkuu wa Mkoa wa Dodoma na anachukua nafasi ya Dkt. Rehema Nchimbi ambaye amestaafu. 11. Amemteua Dkt. Philemon Rugumiliza Sengati kuwa Mkuu wa Mkoa wa Shinyanga. Kabla ya uteuzi huo Dkt. Sengati alikuwa Mkuu wa Mkoa wa Tabora. 12. Amemteua Bw. John Vianney Mongella kuwa Mkuu wa Mkoa wa Simiyu. Kabla ya uteuzi huo Bw. Mongella alikuwa Mkuu wa Mkoa wa Mwanza. 13. Amemteua Bw. Ally Salim Hapi kuwa Mkuu wa Mkoa wa Tabora. Kabla ya uteuzi huo Bw. Hapi alikuwa Mkuu wa Mkoa wa Iringa. 14. Amemteua Bw. Adam Kigoma Malima kuwa Mkuu wa Mkoa wa Tanga. Kabla ya uteuzi huo Bw. Malima alikuwa Mkuu wa Mkoa wa Mara. 15. Amemteua Bw. David Zacharia Kafulila kuwa Mkuu wa Mkoa wa Arusha. Bw. Kafulila anachukua nafasi ya Bw. Idd Hassan Kimanta ambaye amestaafu. 16. Amemteua Bw. Amos Gabriel Makalla kuwa Mkuu wa Mkoa wa Dar es Salaam. Bw. Makalla anachukua nafasi ya Bw. Aboubakar Mussa Kunenge ambaye ameteuliwa kuwa Mkuu wa Mkoa wa Pwani. 17. Amemteua Bi. Rosemary Staki Senyamule kuwa Mkuu wa Mkoa wa Geita. Bi. Senyamule anachukua nafasi ya Bw. Robert Gabriel Luhumbi ambaye ameteuliwa kuwa Mkuu wa Mkoa wa Mara. 18. Amemteua Bi. Queen Cuthbert Sendiga kuwa Mkuu wa Mkoa wa Iringa. Bi. Sendiga anachukua nafasi ya Bw. Ali Salim Hapi ambaye ameteuliwa kuwa Mkuu wa Mkoa Tabora. 19. Amemteua Mej. Jen. Charles Mbuge kuwa Mkuu wa Mkoa wa Kagera. Bw. Mbuge anachukua nafasi ya Mej. Jen. Marco Elisha Gaguti ambaye ameteuliwa kuwa Mkuu wa Mkoa wa Mtwara. 20. Amemteua Bi. Mwanamvua Mrindoko kuwa Mkuu wa Mkoa wa Katavi. Bi. Mrindoko anachukua nafasi ya Bw. Juma Zubeir Homera ambaye ameteuliwa kuwa Mkuu wa Mkoa wa Mbeya. 21. Amemteua Bw. Stephen Kagaigai kuwa Mkuu wa Mkoa wa Kilimanjaro. Kabla ya uteuzi huo Bw. Kagaigai alikuwa Katibu wa Bunge la Jamhuri ya Muungano wa Tanzania na anachukua nafasi Bi. Anna Elisha Mghwira ambaye amestaafu. 22. Amemteua Brig. Jen. Wilbert Augustine Ibuge kuwa Mkuu wa Mkoa wa Ruvuma. Brig. Jen. Ibuge anachukua nafasi ya Bi. Christine Mndeme ambaye ameteuliwa kuwa Naibu Katibu Mkuu wa Chama Cha Mapinduzi (CCM). 23. Amemteua Bw. Omary Tebweta Mgumba kuwa Mkuu wa Mkoa wa Songwe. Bw. Mgumba anachukua nafasi ya Brig. Jen. Nicodemus Mwangela ambaye amestaafu. 24. Amemteua Bw. Makongoro Nyerere kuwa Mkuu wa Mkoa wa Manyara. Bw. Makongoro Nyerere anachukua nafasi ya Bw. Mkirikiti ambaye ameteuliwa kuwa Mkuu wa Mkoa wa Rukwa. 25. Amemteua Bw. Thobias Emir Andengenye kuwa Mkuu wa Mkoa wa Kigoma. Bw. Andengenye anaendelea na wadhifa huo katika Mkoa huo huo wa Kigoma. 26. Amemteua Bw. Marwa Mwita Rubirya kuwa Mkuu wa Mkoa wa Njombe. Bw. Rubirya anaendelea na wadhifa huo huo katika Mkoa huo huo wa Njombe. Mhe. Rais Samia amefanya uteuzi wa watendaji wakuu wa taasisi zifuatazo; 1. Amemteua Mhe. Balozi Joseph Edward Sokoine kuwa Katibu Mkuu wa Wizara ya Mambo ya Nje na Ushirikiano wa Afrika Mashariki. Mhe. Balozi Sokoine anachukua nafasi ya Mej. Jen. Ibuge ambaye ameteuliwa kuwa Mkuu wa Mkoa wa Ruvuma. 2. Amemteua Bi. Nenelwa Mwihambi kuwa Katibu wa Bunge la Jamhuri ya Muungano wa Tanzania. Bi. Mwihambi anachukua nafasi ya Bw. Stephen Kagaigai ambaye ameteuliwa kuwa Mkuu wa Mkoa wa Kilimanjaro. 3. Amemteua Dkt. Edwin Paul Mhede kuwa Mkurugenzi Mtendaji wa Wakala wa Mabasi Yaendayo Haraka (DART). Anachukua nafasi ya Mhandisi Ronald Muberwa Lwakatale ambaye uteuzi wake umetenguliwa. 4. Amemteua Bw. Sylvester Antony Mwakitalu kuwa Mkurugenzi wa Mashtaka (DPP). Bw. Mwakitalu anachukua nafasi iliyoachwa na Bw. Biswalo Mganga ambaye ameteuliwa kuwa Jaji wa Mahakama Kuu. 5. Amemteua Bw. Joseph Pande kuwa Naibu Mkurugenzi wa Mashtaka (DDPP). Bw. Pande anachukua nafasi ya Bw. Edson Athanas Makallo ambaye atapangiwa majukumu mengine. 6. Amemteua Kamishna Msaidizi wa polisi (ACP) Salum Rashid Hamduni kuwa Mkurugenzi Mkuu wa Taasisi ya Kuzuia na Kupambana na Rushwa (TAKUKURU). ACP Hamduni anachukua nafasi ya Mej. Jen. John Mbungo ambaye atapangiwa majukumu mengine. Aidha, Mhe. Rais Samia amempandisha cheo ACP Hamduni kuwa Kamishna wa Polisi (CP). 7. Amemteua Bi. Neema Mpembe Mwakalyelye kuwa Naibu Mkurugenzi Mkuu wa TAKUKURU. Uteuzi wa viongozi hao unaanza leo tarehe 15 Mei, 2021 na wataapishwa tarehe 18 Mei, 2021 kuanzia saa 9:00 alasiri, Ikulu Jijini Dar es Salaam.

Rais wa Jamhuri ya Muungano wa Tanzania, Mhe. Samia Suluhu Hassan leo tarehe 12 Mei, 2021 amehudhuria sherehe za kuapishwa kwa Mhe. Yoweri Kaguta Museveni kuwa Rais wa Jamhuri ya Uganda, zilizofanyika katika viwanja vya Kololo Jijini Kampala. Mhe. Rais Samia amehudhuria sherehe hizo pamoja na Marais wengine 10, wawakilishi wa Marais na mashirika mbalimbali ya kimataifa. Akizungumza katika sherehe hizo, Mhe. Rais Museveni amewashukuru Waheshimiwa Marais, wawakilishi wa Marais na viongozi mbalimbali waliohudhuria sherehe hizo na ametumia nafasi hiyo kueleza jinsi uongozi wake ulivyopiga hatua katika maeneo mbalimbali yakiwemo ya uzalishaji wa mazao, biashara, uwekezaji na kuongezeka kwa pato la Taifa. Mhe. Rais Museveni ametoa wito kwa mataifa ya Afrika kuongeza ushirikiano kwa kukamilisha itifaki ya soko la huru la Afrika ili kujihakikishia soko la ndani la bidhaa zinazozalishwa kwa wingi hasa mazao ya kilimo. Wakati huo huo, Mhe. Rais Samia amekutana na kufanya mazungumzo na Rais wa Jamhuri ya Kidemokrasia ya Shirikisho la Ethiopia, Mhe. Sahle-Work Zewde ambapo viongozi hao wamezungumzia kuongeza zaidi ushirikiano kati ya Tanzania na Ethiopia. Mhe. Rais Zewde amempongeza Mhe. Rais Samia kwa kupokea kijiti cha Urais na amesema ana imani kubwa katika kipindi chake Tanzania itapiga hatua kubwa za maendeleo. Mhe. Rais Samia pia amekutana na kufanya mazungumzo na Rais wa Jamhuri ya Sudan Kusini Mhe. Salva Kiir Mayardit ambaye amempongeza kwa kupokea kijiti cha Urais na amewasilisha ombi la Sudan Kusini kupatiwa chakula kutoka Tanzania. Kabla ya kuondoka Jijini Kampala Mhe. Rais Samia amekutana na Rais wa Jamhuri ya Uganda Mhe. Yoweri Kaguta Museveni na kumkaribisha kuhudhuria sherehe za utiaji saini mkataba kati ya Serikali ya Tanzania na kampuni za uwekezaji katika mradi wa ujenzi wa bomba la mafuta ghafi la Afrika Mashariki litakalojengwa kutoka Hoima nchini Uganda hadi bandari ya Tanga nchini Tanzania, zitakazofanyika tarehe 20 Mei, 2021 Jijini Dar es Salaam. Mhe. Rais Museveni amekubali mwaliko huo.

Rais wa Jamhuri ya Muungano wa Tanzania, Mhe. Samia Suluhu Hassan leo tarehe 09 Mei, 2021 amemkabidhi nyumba ya kuishi Rais Mstaafu wa Awamu ya Nne, Mhe. Dkt. Jakaya Mrisho Kikwete iliyojengwa katika Wilaya ya Kinondoni Mkoani Dar es Salaam.

Nyumba hiyo imejengwa na Serikali ya Tanzania kupitia Wakala wa Majengo Tanzania (TBA) ikiwa ni utekelezaji wa kifungu namba 12 cha Sheria ya mafao ya hitimisho la kazi kwa viongozi wa siasa, sura ya 225 na marejeo ya mwaka 2020 ambayo pamoja na stahili zingine za matunzo ya viongozi wakuu wastaafu inaelekeza kuwa Rais anayestaafu anastahili kujengewa nyumba ya kuishi yenye hadhi ya Rais.

Akizungumza baada ya kukabidhi nyumba hiyo, Mhe. Rais Samia amempongeza Mhe. Rais Mstaafu Kikwete kwa kupata makazi hayo na amemhakikishia kuwa Serikali itaendelea kumtunza yeye na viongozi wengine wastaafu kama inavyoelekezwa katika sheria.

Amebainisha kuwa Serikali itafanyia kazi uboreshaji wa sheria hiyo pamoja na kuhakikisha wajane/wagane wa viongozi wanatunzwa.

Mhe. Rais Samia amemuagiza Waziri wa Nchi, Ofisi ya Rais Menejimenti ya Utumishi wa Umma na Utawala Bora Mhe. Mohamed Mchengerwa kuanza maandalizi ya kutimiza haki zote anazostahili aliyekuwa Rais wa Jamhuri ya Muungano wa Tanzania Hayati Dkt. John Pombe Magufuli.

Kwa upande wake, Mhe. Waziri Mchengerwa amesema nyumba hiyo ni ya 3 kukabidhiwa ikitanguliwa na nyumba ya Mhe. Rais Mstaafu Hayati Benjamin William Mkapa na Mhe. Rais Mstaafu Dkt. Ali Hassan Mwinyi na kwamba nyumba ya Baba wa Taifa Hayati Mw. Julius Kambarage Nyerere ilijengwa na kukabidhiwa kwake na Jeshi la Ulinzi la Wananchi wa Tanzania (JWTZ).

Katika shukrani zake, Rais Mstaafu Mhe. Dkt. Jakaya Mrisho Kikwete aliyeongozana na Mkewe Mhe. Mama Salma Kikwete ameishukuru Serikali kupitia Ofisi ya Rais, Menejimenti ya Utumishi wa Umma na Utawala Bora kwa kutekeleza takwa hilo la kisheria, ameishukuru TBA kwa kukamilisha ujenzi tangu ulipoanza mwaka 2018 na amemshukuru Mhe. Rais Samia kwa kumkabidhi nyumba hiyo.

Mhe. Rais Mstaafu Kikwete amempongeza Mhe. Rais Samia kwa uongozi wake tangu alipopokea kijiti kufuatia kifo cha aliyekuwa Rais wa Jamhuri ya Muungano wa Tanzania Hayati Dkt. John Pombe Magufuli kwani nchi imetulia, mambo yanakwenda na watu wana matumaini makubwa nae.

Rais wa Jamhuri ya Muungano wa Tanzania, Mhe. Samia Suluhu Hassan amewahakikishia Wazee wote nchini kuwa Serikali ya Awamu ya Sita ina dhamira ya dhati ya kushughulikia masuala mbalimbali yanayowahusu ili waweze kuishi maisha mazuri na salama. Mhe. Rais Samia ametoa ahadi hiyo leo tarehe 07 Mei, 2021 Mkoani Dar es Salaam wakati akizungumza na Wazee wa Dar es Salaam kwa niaba ya Wazee wote wa Tanzania baada ya kupokea risala yao iliyosomwa na Mwenyekiti wa Baraza la Wazee, Mzee Salum Abdallah Matimbwa. Katika risala hiyo Wazee hao wameomba kutatuliwa changamoto za matibabu, kutungwa sheria ya wazee, kupatiwa fursa za kiuchumi ikiwemo mikopo na misaada, kupatiwa pensheni, kuondolewa kero katika vyombo vya usafiri na kupatiwa nafasi katika vyombo vya maamuzi. Mhe. Rais Samia amewashukuru na kuwapongeza Wazee wote wa Tanzania kwa juhudi kubwa wanazozifanya katika kulilea Taifa kutokana na uzoefu na ujuzi walionao na pia amewashukuru kwa pongezi za kupokea kijiti cha Urais na kuchaguliwa kuwa Mwenyekiti wa Chama Cha Mapinduzi (CCM). Amewaahidi kuwa Serikali ya Awamu ya Sita itajitahidi kushughulikia changamoto walizozitaja kulingana na uwezo wa kifedha utakavyoruhusu lakini amemtaka Waziri wa Afya, Maendeleo ya Jamii, Jinsia, Wazee na Watoto Dkt. Dorothy Gwajima kushughulikia kwa haraka changamoto ya matibabu ya Wazee nchini kote. Kuhusu pensheni kwa Wazee wote amesema kulingana na hali ya uchumi kwa sasa Serikali haitaweza kutekeleza ombi hilo mpaka hapo hali ya uchumi itakapoimarika lakini amesema imejipanga kuwawezesha Wazee kupitia mradi wa kusaidia kaya masikini unaoratibiwa na Mfuko wa Maendeleo ya Jamii Tanzania (TASAF) na kwamba baada ya kuisha kwa mradi unaoendelea hivi sasa Serikali inajipanga kuendeleza mradi huo ili uwafikie wazee wote nchini. Pamoja na kukubali kuwa Serikali itaimarisha nyumba za Wazee, Mhe. Rais Samia ametoa wito kwa jamii kuendeleza utamaduni mzuri wa kuwatunza wazee vizuri na kwa upendo majumbani badala ya kuwaweka kwenye vituo vya wazee. Aidha, ametoa wito kwa Wazee hao na Wazazi wote nchini kuwalea vijana wao katika maadili mema ili watambue wajibu wao kwa Wazee, nidhamu na heshima kwa jamii na kuwajali Wazee wote hasa wanapotumia huduma za kijamii ikiwemo mabasi ya abiria na sehemu za kutolea huduma. Ameonya dhidi ya vitendo vya ujambazi na wizi vilivyoanza kujitokeza katika Mkoa wa Dar es Salaam na amemtaka Mkuu wa Jeshi la Polisi nchini IJP-Simon Sirro kudhibiti vitendo hivyo mara moja. Mhe. Rais Samia amesema katika kutekeleza vipaumbele vya Serikali ya Awamu ya Sita anatarajia kuendeleza kazi nzuri iliyofanyika katika awamu zote za uongozi zilizopita, kumtumia Mtanzania yeyote mwenye ujuzi na maarifa ya kufanya kazi na atayeonekana anafaa ilimradi asiwe na dosari za kimaadili na usalama, na kutokana na hilo atafanya mabadiliko ya kitaasisi na uongozi kadiri atakavyoona inafaa kwa nia njema ya kulipeleka Taifa mbele. Ameupongeza Mkoa wa Dar es Salaam kwa kukaribia kumaliza kabisa kero ya maji baada ya kukamilika kwa miradi miwili ya maji, ameahidi kuendeleza juhudi za kuongeza uzalishaji wa umeme ili utumike kuendeleza viwanda na kuuza nje ya nchi, kuongeza kasi ya kupanua huduma za mawasiliano kupitia mkongo wa Taifa, kusimamia uhuru, haki na demokrasia na kukuza uhusiano na ushirikiano na Mataifa mbalimbali duniani kama alivyofanya hivi karibu katika ziara yake rasmi nchini Kenya. Mhe. Rais Samia amewaomba Wazee wote nchini kumuunga mkono na kuwakumbusha Watanzania wote wajibu wao wa kuchapa kazi kwa juhudi na maarifa, kulipa kodi na kusimamia maadili ya Kitanzania. Mkutano huo umehudhuriwa na Makamu wa Rais Mhe. Philip Isdor Mpango, Waziri Mkuu Mhe. Kassim Majaliwa Majaliwa, Makamu Mwenyekiti wa CCM Bara Ndg. Philip Mangula, Viongozi wa Dini na viongozi wa vyama vya siasa.

Rais wa Jamhuri ya Muungano wa Tanzania, Mhe. Samia Suluhu Hassan leo tarehe 08 Mei, 2021 amezindua kitabu cha maisha ya Rais Mstaafu wa Awamu ya Pili, Mhe. Dkt. Ali Hassan Mwinyi kiitwacho “Mzee Rukhsa” ambacho kimeandaliwa na Taasisi ya Uongozi (Uongozi Institute) kupitia mradi wa Tawasifu za Viongozi. Sherehe za uzinduzi wa kitabu hicho zimefanyika katika Kituo cha Mikutano cha Kimataifa cha Julius Nyerere Jijini Dar es Salaam (JNICC) na kuhudhuriwa na Makamu wa Rais Mhe. Dkt. Philip Isdor Mpango, Rais wa Zanzibar na Mwenyekiti wa Baraza la Mapinduzi Mhe. Dkt. Hussein Ali Mwinyi, Waziri Mkuu Mhe. Kassim Majaliwa Majaliwa na Makamu wa Pili wa Rais wa Zanzibar Mhe. Hemed Suleiman Abdulla. Viongozi wengine waliohudhuria sherehe hizo ni Rais Mstaafu wa Awamu ya Nne Mhe. Dkt. Jakaya Mrisho Kikwete, Makamu Mwenyekiti wa Chama cha Mapinduzi (CCM) Bara Ndg. Philip Mangula, Maspika na Maspika Wastaafu, Majaji Wakuu na Majaji Wakuu Wastaafu, Mawaziri, Mabalozi, Wabunge, Katibu Mkuu Kiongozi na Makatibu Wakuu Viongozi Wastaafu, Makatibu Wakuu, viongozi wa Dini, viongozi wa vyama vya siasa na viongozi wa taasisi na mashirika mbalimbali. Katika hotuba yake ya uzinduzi, Mhe. Rais Samia amempongeza Mzee Mwinyi kwa kuandika kitabu hicho kwa lugha ya Kiswahili na kubeba maudhui yanayohusu maisha yake binafsi na historia ya Tanzania ambayo inatoa mafunzo mengi kwa Watanzania hasa wenye dhamana za uongozi na kukuza lugha ya Kiswahili Barani Afrika na Dunia nzima. Kitabu hicho kimezinduliwa katika siku ya kuzaliwa ya Mzee Mwinyi ambapo ametimiza miaka 96, hivyo Mhe. Rais Samia amemtakia heri, afya njema na umri mrefu na ameahidi kuwa Serikali itaendelea kumtunza wakati wote wa uhai wake. Amempongeza Mzee Mwinyi kwa kufanya mageuzi makubwa ya kiuchumi katika kipindi chake cha Urais licha kupokea madaraka hayo makubwa wakati nchi ikiwa katika hali mbaya ya kiuchumi kutokana na madhara ya kuvunjika kwa Jumuiya ya Afrika Mashariki, Vita dhidi ya Nduli Idd Amin, ugonjwa wa Ukimwi na masharti magumu yaliyowekwa na taasisi za kifedha za Dunia dhidi ya Tanzania. Mhe. Rais Samia amesema kupitia kitabu hicho maisha ya Mzee Mwinyi yanatoa mafunzo mbalimbali yakiwemo uongozi ni dhamana, uongozi hautafutwi bali unatoka kwa Mungu, uongozi sio lelemama, uungwana wa kukiri makosa ana umuhimu wa viongozi kupendana na kushirikiana. Mhe. Rais Samia amempongeza Mtendaji Mkuu wa Taasisi ya Uongozi Bw. Kadari Singo, na wapigachapa (Mkuki na Nyota) kwa kuandaa kitabu hicho, na pia amemshukuru Balozi wa Finaland hapa nchini Mhe. Dkt. Timo Voipio na wadhamini kwa kufadhili uchapishaji wa kitabu hicho. Ameahidi kufanya uteuzi wa Mwenyekiti wa Bodi ya Taasisi ya Uongozi hizi karibuni. Katika salamu zake Mzee Mwinyi amemshukuru Mwenyezi Mungu kwa kumjaalia afya na neema ya uongozi, amemshukuru Mhe. Rais Samia kwa kukubali kukizindua kitabu hicho na amewashukuru wasaidizi wake wote aliofanyanao kazi akiwemo aliyekuwa mwandishi wake wa hotuba Mhe. Balozi Ombeni Sefue kwa kufanikisha uandishi wa kitabu hicho. Mchambuzi wa kitabu hicho Prof. Rwekaza Mukandala amepongeza umahiri katika uandishi wa kitabu hicho kilichoeleza maisha ya Mzee Mwinyi aliyezaliwa tarehe O8 Mei, 1925 katika Kijiji cha Kivule, wilaya ya Mkuranga Mkoani Pwani kikiwa na kurasa 491 na utangulizi wake ukiwa umeandikwa na aliyekuwa Rais wa Awamu ya Tatu Hayati Benjamini William Mkapa. Katika sherehe hizo, Mhe. Rais Samia amemkabidhi Mzee Mwinyi gari ndogo aina ya Mercedes Benz ili kumrahishia kupanda na kushuka baada ya gari alilopewa kuwa refu na hivyo kumpa shida kulitumia. Baada ya sherehe hizo, Mhe. Rais Samia amefuturu pamoja na viongozi waliohudhuria.