Tovuti Rasmi ya Rais

Rais wa Jamhuri ya Muungano wa Tanzania Mhe. Samia Suluhu Hassan, leo tarehe 16 Agosti, 2021 anatarajia kuondoka Jijini Dodoma kuelekea nchini Malawi kwa ajili ya kushiriki Mkutano wa 41 wa Wakuu wa Nchi na Serikali wa Jumuiya ya Maendeleo Kusini mwa Afrika (SADC) utakaofanyika kuanzia tarehe 17 – 18 Agosti, 2021.

Katika Mkutano huo wa 41 pamoja na mambo mengine, Wakuu wa Nchi na Serikali wa SADC, watathibitisha nchi ya Malawi kuwa Mwenyekiti wa SADC kwa kipindi cha mwaka mmoja (Agosti 2021 – Agosti 2022).

Matangazo ya kuwasili Mhe. Rais Samia nchini Malawi na Mkutano huo yatatangazwa moja kwa moja (Mbashara), kupitia Youtube Channel ya Ikulu Tanzania na Runinga mbalimbali nchini.

Rais wa Jamhuri ya Muungano wa Tanzania Mhe. Samia Suluhu Hassan, leo tarehe 13 Agosti, 2021 amekutana na kufanya mazungumzo na Rais na Mtendaji Mkuu wa kampuni ya Elsewedy Electric kutoka nchini Misri, Mhandisi Ahmed El Sewedy, Ikulu Chamwino Mkoani Dodoma.

Katika mazungumzo hayo, Mhandisi  El Sewedy amemfahamisha Mhe. Rais Samia kuwa kampuni yake mbali na kuwa miongoni mwa kampuni zinazojenga mradi wa kuzalisha umeme katika Bwala la Mwalimu Nyerere, pia imewekeza katika miradi mingine na kutarajia kuwekeza zaidi hapa nchini.

Mhandisi El Sewedy amesema kampuni yake inajenga mitambo ya kuzalisha umeme wa megawati 2115 katika Bwawa la Mwalimu Nyerere.

Pia amesema katika eneo la Kigamboni Jijini Dar es Salaam, kampuni yake imejenga kiwanda cha kuzalisha nyaya za umeme, transfoma, vifaa vya kuzuia nyaya za umeme zisilete hitilafu na mita za umeme, ambacho kinatarajiwa kufunguliwa rasmi mwezi Disemba mwaka 2021.

Aidha, amesema kutokana na mazingira mazuri ya uwekezaji yanayoendelea kuwekwa na Serikali, wameamua kuunga mkono na kuwekeza zaidi kwa kujenga eneo la viwanda lenye ukubwa wa mita za mraba milioni mbili ikiwemo ujenzi wa kiwanda cha mbolea.

Mhandisi El Sewedy ameongeza kuwa anatarajia kuwekeza katika ujenzi wa reli ya kisasa, na katika kipindi cha miaka 2 atahamasisha makampuni takriban hamsini (50) kutoka Misri kuja kuwekeza hapa nchini.

Kwa upande wake, Mhe. Rais Samia amemshukuru Mhandisi El Sewedy  na kumuhakikishia kuwa Serikali itampa ushirikiano katika kutekeleza miradi hiyo ya maendeleo kwa muda muafaka.

Mhe. Rais Samia amesema ujenzi wa eneo maalum la viwanda litasaidia kuchangia kwa kiasi kikubwa utoaji wa ajira na ujuzi.

Aidha, Mhe. Rais Samia amemjulisha Mhandisi huyo kuwa kwa sasa Tanzania inapitia sheria na sera zake mbalimbali ili kujenga mazingira mazuri zaidi ya biashara na uwekezaji.

Rais wa Jamhuri ya Muungano wa Tanzania Mhe. Samia Suluhu Hassan, leo tarehe 12 Agosti, 2021 amekutana na kufanya mazungumzo na Balozi wa Oman hapa nchini Mhe. Balozi  Ali Bin Abdallah Bin Salim Al Mahrouqi aliyemaliza muda wake wa uwakilishi hapa nchini, Ikulu Chamwino Mkoani Dodoma.

Katika mazungumzo hayo, Mhe. Balozi Al Mahrouqi amempongeza Mhe. Rais Samia kwa utawala wake na kuishukuru Serikali ya Tanzania  kwa ushirikiano mkubwa alioupata wakati alipokuwa akitekeleza majukumu yake.

Aidha, Mhe. Balozi Al Mahrouqi amesema Tanzania na Oman zina uhusiano mzuri na wa muda mrefu hivyo kuomba kuendelezwa kwa ajili ya maslahi ya nchi zote mbili pamoja na  kuimarishwa biashara.

Kwa upande wake, Mhe. Rais Samia amemhakikishia Balozi Al Mahrouqi kuwa Tanzania itaendeleza na kudumisha ushirikiano wake na Oman kwa masalahi ya nchi zote mbili.

Mhe. Rais Samia amemjulisha Balozi huyo kuwa kwa sasa Tanzania inapitia sheria na sera zake mbalimbali za biashara ili kujenga mazingira mazuri zaidi ya biashara na uwekezaji ikiwa ni pamoja na  kuongeza ufanisi katika viwanja vya Ndege na Bandari ili kurahisisha ufanyaji biashara baina ya nchi hizi mbili.

Pia, Mhe. Rais amezitaka Tume za pamoja kati ya Tanzania na Oman kukutana na kuzungumza ili kuimarisha mambo mbalimbali baina ya nchi hizo.

Mhe. Rais Samia amemshukuru na kumpongeza Mhe. Balozi Al Mahrouqi kwa kazi nzuri ya uwakilishi wake hapa nchini katika kipindi cha miaka 4 kwa kudumisha uhusiano kati ya Oman na Tanzania.

Rais wa Jamhuri ya Muungano wa Tanzania Mhe. Samia Suluhu Hassan, tarehe 06 Agosti, 2021 amefanya uteuzi wa viongozi wafuatao:-

1. Amemteua Bw. Athumani Seleman Mbuttuka kuwa Mkaguzi Mkuu wa Ndani wa Serikali (Internal Auditor General).

Bw. Mbuttuka anachukua nafasi ya Balozi Mohamed Mtonga ambaye amestaafu na Balozi wa Tanzania katika Umoja wa Falme za Kiarabu (UAE). Kabla ya uteuzi huo, Bw. Mbuttuka alikuwa Msajili wa Hazina (Treasury Registrar).

2. Amemteua Bw. Leonard John Mkude kuwa Mhasibu Mkuu wa Serikali (Accountant General). Bw. Mkude anachukua nafasi ya Bw. Francis M. Mwakapalila ambaye atapangiwa kazi nyingine. Kabla ya uteuzi, Bw. Mkude alikuwa Meneja Bajeti, Benki Kuu ya Tanzania.

3. Amemteua Bw. Mgonya A. Benedict kuwa Msajili wa Hazina.

Bw. Benedict anachukua nafasi ya Bw. Athumani Mbuttuka ambaye ameteuliwa kuwa Mkaguzi Mkuu wa Ndani wa Serikali. Kabla ya uteuzi huo, Bw. Benedict alikuwa Meneja wa Masuala ya Fedha na Madeni, Benki Kuu ya Tanzania.

4. Amemteua Bw. Frank Mugeta Nyabundege kuwa Mkurugenzi Mtendaji wa Benki ya Maendeleo ya Kilimo Tanzania (Tanzania Agriculture Development Bank). Kabla ya uteuzi huo, Bw. Nyabundege alikuwa Mkurugenzi Mtendaji wa Lake Oil Tanzania Limited.

5. Amemteua Bw. Casmir Kyuki kuwa Mwenyekiti wa Bodi ya Kampuni ya Uwekezaji ya UTT – AMIS. Bw. Kyuki ni Katibu wa Tume ya Kurekebisha Sheria Tanzania.

Teuzi hizi zimeanza tarehe 05 Agosti, 2021.

Rais wa Jamhuri ya Muungano wa Tanzania Mhe. Samia Suluhu Hassan, tarehe 06 Agosti, 2021 amezungumza kwa njia ya mtandao na Mkurugenzi Mtendaji wa Mfuko wa Kimataifa wa kusaidia Mapambano dhidi ya ugonjwa wa Ukimwi, Kifua Kikuu na Malaria (Global Fund) Bw. Peter Sands kuhusu masuala mbalimbali ya ushirikiano baina ya Mfuko huo na Tanzania.

Bw. Sands amempongeza Mhe. Rais Samia kwa kushika wadhifa wa Urais na kuahidi kuendeleza ushirikiano wa muda mrefu baina ya mfuko huo na Serikali ya Tanzania.

Mkurugenzi huyo amebainisha kuwa katika misaada inayotolewa na Global Fund, Tanzania ni nchi ya tano kutokana na matumizi mazuri ya  misaada hiyo na kuahidi kuwa wataendelea kushirikiana katika masuala mbalimbali yanayohusu afya hususan kujenga uelewa wa kina kuhusu masuala ya afya.

Kutokana na matumizi hayo mazuri ya misaada, Mkurugenzi huyo Bw. Sands ameahidi  kutoa Dola za Marekani milioni 794 katika kipindi cha mwaka 2021 hadi 2023.

Bw. Sands pia amempongeza Mhe. Rais Samia kwa jitihada zake za kupambana na UVIKO 19, ambapo amesema Bodi ya Mfuko wa Global Fund imeidhinisha Dola za Marekani Milioni 112 kwa ajili ya kusaidia Tanzania katika mapambano dhidi ya ugonjwa huo.

Amefafanua kuwa fedha hizo zitatumika kwa ajili ya kununua vifaa vya kuwakinga wahudumu wa afya (PPE), mitungi ya hewa ya Oxygen, kuziongezea uwezo maabara zetu na  kuboresha miundombinu.

Aidha, Bw. Sands amesema Global fund itashirikiana na wataalamu wa Tanzania kutoa elimu kwa wananchi juu ya mabadiliko ya mara kwa mara ya UVIKO 19.

Pia, amemshukuru Mhe. Rais Samia kwa jitihada zake kwa kuweka mazingira wezeshi ya kupunguza vikwazo vya kikodi vitakavyowezesha Mashirika yasiyo ya Kiserikali kuweza kutoa huduma kwa wananchi wengi zaidi.

Kwa upande wake Mhe. Rais Samia amemshukuru Mkurugenzi Mtendaji huyo kwa Mfuko wao kusaidia Tanzania tangu mwaka 2002 katika kupunguza vifo vitokanavyo na ugonjwa wa UKIMWI na matumizi ya dawa za kufubaza virusi vya ugonjwa huo, vifaa vya kuwakinga wahudumu wa afya (PPE) pamoja na utafiti, ufuatiliaji na tathmini ya utekelezaji wa mikakati mbalimbali ya afya.

Mhe. Rais amemueleza Mkurugenzi Mtendaji huyo kuwa janga  la  UVIKO 19  limekuwa na athari kubwa katika kupambana na magonjwa ya UKIMWI, kifua kikuu na malaria, hivyo inahitajika mikakati madhubuti ya kupambana na magonjwa hayo.

Aidha, Mhe. Rais Samia amewapongeza Global fund kwa kutimiza miaka 20 ya kuwezesha mifumo ya usimamizi na upatikanaji wa huduma ya afya na kuahidi kuwa Tanzania itaendelea kushirikiana na Mfuko huo katika kuimarisha afya za wananchi wake.

Rais wa Jamhuri ya Muungano wa Tanzania Mhe. Samia Suluhu Hassan, leo tarehe 06 Agosti, 2021 amewaongoza viongozi mbalimbali na waombolezaji kuaga mwili wa aliyekuwa Waziri wa Ulinzi na Jeshi la Kujenga Taifa Marehemu Elias John Kwandikwa.

Akizungumza wakati akitoa salamu za pole, Mhe. Rais Samia amesema kifo cha marehemu Kwandikwa kimeacha simanzi na pengo kubwa si kwa familia pekee bali pia kwa Serikali na Taifa kwa ujumla.

Amesema Serikali imempoteza mtumishi na kiongozi mwadilifu, makini, shupavu na mchapakazi hodari.

Aidha, Mhe. Rais Samia amewashukuru viongozi wa dini kwa kuongoza ibada ya kumuaga marehemu Kwandikwa ambapo mahubiri yao yametoa faraja na kukumbusha kuwa wanadamu duniani wanapita, hivyo kutakiwa kuishi kwa wema na kutenda yale ya kumpendeza Mungu.

Shughuli za kuaga mwili wa Marehemu Kwandikwa zimefanyika katika viwanja vya Karimjee Jijini Dar es Salaam na kuhudhuriwa na viongozi mbalimbali wa Serikali akiwemo Makamu wa Rais Mhe. Dkt. Philip Mpango, Rais wa Zanzibar Mhe. Dkt. Hussein Mwinyi, Waziri Mkuu Kassim Majaliwa, Makamu wa Pili wa Rais wa Zanzibar Mhe. Hemed Suleiman Abdallah, Naibu Spika wa Bunge Dkt. Tulia Ackson, Jaji Mkuu wa Tanzania Profesa Ibrahim Hamis Juma, Katibu Mkuu Kiongozi Balozi Hussein Kattanga, Katibu Mkuu Kiongozi-Zanzibar Mhandisi Zena Said pamoja na viongozi wengine wa  vyama vya Siasa na Serikali.

“Bwana ametoa, Bwana ametwaa, Jina lake lihimidiwe”

Rais wa Jamhuri ya Muungano wa Tanzania Mhe. Samia Suluhu Hassan, tarehe 04 Agosti, 2021 amemteua Bi. Mtumwa Khatib Ameir kuwa Makamu Mwenyekiti wa Bodi ya Mamlaka ya Usafiri wa Anga Tanzania (TCAA).

Bi. Mtumwa Khatib Ameir ni Afisa Mtendaji Mkuu na Msimamizi wa Hakimiliki Zanzibar.

Uteuzi huo unaanza tarehe 04 Agosti, 2021.

Rais wa Jamhuri ya Muungano wa Tanzania, Mhe. Samia Suluhu Hassan tarehe 04 Agosti, 2021 amekutana na kufanya mazungumzo na Naibu Waziri wa Mambo ya Nje wa Marekani anayeshughulikia masuala ya Siasa Mhe. Balozi Victoria Nuland Ikulu Jijini Dar es Salaam.

Mhe. Balozi Nuland amemshukuru Mhe. Rais Samia kwa kuendeleza ushirikiano na Serikali ya Marekani ambapo amesema mwaka 2021 ushirikiano huo unatimiza miaka 60, hivyo kuomba uimarike zaidi.

Amesema Marekani itazidi kushirikiana na Serikali ya Tanzania katika nyanja mbalimbali ikiwa ni pamoja na kuimarisha afya za Watanzania kwa kutoa misaada kama ilivyofanya kupitia mpango wa COVAX ambapo uliisaidia Tanzania kupata dozi zaidi ya Milioni 1 ya chanjo za UVIKO -19.

Mbali na eneo la Afya, Mhe. Balozi Nuland amesema Serikali ya Marekani itaendeleza ushirikiano na Tanzania katika kuimarisha Uwekezaji, Biashara na masuala ya Ulinzi.

Kwa upande wake Mhe. Rais Samia amemhakikishia Mhe. Balozi  Nuland kuwa Tanzania kupitia Mpango wake wa Maendeleo wa Miaka Mitano awamu ya Tatu (FYDPIII), imeimarisha mazingira ya uwekezaji na biashara kwa lengo la kuvutia Wawekezaji.

Mara baada ya mazungumzo yao, Mhe. Rais Samia amemshukuru Mhe. Balozi Nuland na kuahidi kuwa Serikali ya Tanzania  itazidi kuimarisha uhusiano baina ya Mataifa hayo mawili katika nyanja mbalimbali.

Rais wa Jamhuri ya Muungano wa Tanzania, Mhe. Samia Suluhu Hassan tarehe 03 Agosti, 2021 amehitimisha Ziara yake ya siku mbili nchini Rwanda kwa kutembelea viwanda vitatu na kujionea shughuli mbalimbali za uzalishaji zinazofanywa na viwanda hivyo.

Katika kiwanda cha kwanza cha Inyange kinachotengeneza vinywaji, Mhe. Rais Samia akiwa na mwenyeji wake Rais wa Rwanda Mhe. Paul Kagame wamejionea shughuli za uzalishaji wa bidhaa mbalimbali ikiwa ni pamoja na maji ya kunywa, maziwa na juisi.

Aidha, Mhe. Rais Samia pia ametembelea kiwanda cha kutengeneza simu za mkononi cha Mara Phone na kujionea hatua mbalimbali za utengenezaji wa simu kuanzia hatua ya awali hadi kukamilika kwake.

Pia Mhe. Rais Samia ametembelea kiwanda cha uunganishaji magari cha Volkswagen kilichopo nchini humo na kujionea hatua mbalimbali za kuunganisha magari hayo ambayo huuzwa nchini humo.

Mhe. Rais Samia amewaagiza Waziri wa Viwanda na Biashara Prof. Kitila Mkumbo na Waziri wa Uwekezaji Mhe. Geoffrey Mwambe kukutana na wamiliki wa viwanda hivyo ili kutumia fursa zilizopo katika viwanda hivyo ikiwa ni pamoja na kuwauzia malighafi zinazopatikana nchini Tanzania.

Mhe. Rais Samia ameagana na Rais wa Rwanda Mhe. Paul Kagame katika uwanja wa ndege wa kimataifa wa Kigali na kurejea Jijini Dar es Salaam baada ya kumaliza Ziara Rasmi ya siku mbili nchini humo.

Rais wa Jamhuri ya Muungano wa Tanzania Mhe. Samia Suluhu Hassan  tarehe 01 Agosti, 2021 amefanya uteuzi wa Wakurugenzi Watendaji  wa Halmashauri za Jiji, Manispaa,Miji na Wilaya kama ifuatavyo:-

1. MKOA WA ARUSHA

2.         MKOA WA DAR ES SALAAM

3.         MKOA WA DODOMA

4.        

MKOA WA GEITA:

5.         MKOA WA IRINGA:

6.         MKOA WA KAGERA:

7.         MKOA WA KATAVI:

8.         MKOA WA KIGOMA:

Rais wa Jamhuri ya Muungano wa Tanzania, Mhe. Samia Suluhu Hassan, kesho tarehe 02 Agosti, 2021 anatarajia kuanza ziara ya Rasmi ya Kiserikali ya siku mbili nchini Rwanda kwa mwaliko wa Rais wa nchi hiyo  Mhe. Paul Kagame.

Akiwa nchini humo, Mhe. Rais Samia pamoja na mambo mengine atafanya mazungumzo rasmi na mwenyeji wake Rais wa Jamhuri ya Rwanda, Mhe. Paul Kagame, kisha atashuhudia utiaji saini wa hati za makubaliano na kuzungumza na vyombo vya habari.

Ziara hiyo ya siku mbili inalenga kuimarisha zaidi uhusiano na ushirikiano baina ya Rwanda na Tanzania.

Rais wa Jamhuri ya Muungano wa Tanzania, Mhe. Samia Suluhu Hassan, tarehe 30 Julai, 2021 ameongoza Watanzania katika mapokezi ya Ndege mpya aina ya Bombardier Dash 8 Q400  katika Uwanja wa Ndege wa Kimataifa wa  Julius Nyerere Jijini Dar es Salaam.

Kuwasili kwa Ndege hiyo iliyotokea nchini Canada kunaongeza idadi ya Ndege zilizonunuliwa na kuwasili  kufikia 9 kati ya 11, Ndege nyingine 2 zinatarajiwa kuwasili mwezi Oktoba 2021.

Akizungumza wakati wa hafla ya kupokea Ndege hiyo, Mhe. Rais Samia amesema usafiri wa anga ni kichocheo muhimu cha maendeleo Duniani kwa sababu usafiri huo ni wa haraka, salama na wenye kutumiwa na watu wengi.

Mhe. Rais Samia amesema mbali na usafiri wa anga kusafirisha Watu, pia ni muhimu katika kusafirisha bidhaa mbalimbali, hususan zinazoharibika haraka kama vile matunda, mbogamboga, samaki, maua, nyama na nyinginezo.

Amesema Serikali imeamua kununua Ndege ya kusafirisha mizigo kwasababu nchi yetu ni miongoni mwa wazalishaji wakubwa wa matunda, mbogamboga na maua, ambapo mwaka 2019, Tanzania iliuza Nje mazao yenye thamani ya takriban Dola za Kimarekani milioni 700 na ina tarajia hadi kufikia mwaka 2025 kuingiza Dola za Marekani bilioni 2.

Aidha, Mhe. Rais Samia amesema ili nchi iweze kuvutia watalii wengi na kunufaika nao ni lazima iimarishe usafiri wa anga na ndio sababu  Serikali iliamua kufufua Shirika la Ndege la ATCL ikiwa na malengo ya kupokea watalii milioni 5 ifikapo mwaka 2025 kutoka watalii milioni 1.5 mwaka 2019.

Amesema Serikali imeamua kuimarisha huduma za usafiri nchini ili iweze kunufaika na fursa za kijiografia za kupakana na nchi 8, ambapo kati ya hizo 6 hazina Bahari.

Mhe. Rais Samia amezihimiza Wizara za Viwanda na Biashara, Wizara ya Uwekezaji na Sekta Binafsi kuweka mikakati ya kunufaika na fursa hizo ikiwemo kuanzisha kongani za kiuchumi kwenye maeneo ambapo miundombinu ya usafiri inajengwa.

Vilevile Mhe. Rais Samia ameipongeza ATCL kwa kuimarika tangu ilipofufuliwa ambapo idadi ya watu wanaosafiri kwa Ndege za shirika hilo imeongezeka kutoka wastani wa abiria 4000 hadi 60,000 kwa mwezi.

Kwa upande wake Mtendaji Mkuu wa Shirika la ATCL Mhandisi Ladislaus Matindi amesema  ATCL imeongeza safari za kimataifa kutoka kituo kimoja cha Comoro hadi saba ambavyo ni Burundi, China, India, Uganda, Zambia, Zimbabwe na hivi karibuni inatarajiwa kuanzisha safari katika miji ya  Kinshasa, Lubumbashi, Kalemie, Ndola, Nairobi, Dubai, Muscat, na London.

Mapokezi ya ndege hiyo mpya pia yamehudhuriwa na viongozi mbalimbali akiwemo Makamu wa Rais Mhe. Dkt. Philip Isdor Mpango, Waziri Mkuu Mhe. Kassim Majaliwa, Spika wa Bunge Mhe. Job Ndugai, Katibu Mkuu Kiongozi Balozi Hussein Katanga, Balozi wa Canada hapa nchini Mhe. Pamella O’Donell, viongozi wa Wizara ya Ujenzi na Uchukuzi pamoja na viongozi mbalimbali wa dini na vyama vya siasa.

Rais wa Jamhuri ya Muungano wa Tanzania, Mhe. Samia Suluhu Hassan, amefanya uteuzi wa viongozi wawili kama ifuatavyo-

1. Amemteua Bwana Rogatus Hussein Mativila kuwa Mtendaji Mkuu wa Wakala wa Barabara Tanzania (TANROADS).

Bwana Mativila anachukua nafasi ya Marehemu Mhandisi Patrick Mfugale ambaye alifariki dunia tarehe 29 Juni, 2021.

Kabla ya uteuzi huo Bwana Mativila alikuwa Mkurugenzi wa Barabara, Wizara ya Ujenzi na Uchukuzi (Sekta ya Ujenzi).

1. Amemteua Prof. Yunus Daud Mgaya kuwa Mwenyekiti wa Bodi ya Shirika la Uvuvi Tanzania (TAFICO).

Kabla ya uteuzi huo Prof. Mgaya alikuwa Mkurugenzi Mkuu, Taasisi ya Taifa ya Utafiti wa Magonjwa ya Binadamu.

 Uteuzi huo umeanza tarehe 28 Julai, 2021.

Rais wa Jamhuri ya Muungano wa Tanzania, Mhe. Samia Suluhu Hassan leo tarehe 28 Julai, 2021 amezindua utolewaji wa chanjo ya UVIKO 19 na kuongoza Watanzania kupata chanjo hiyo katika viwanja vya Ikulu Jijini Dar es Salaam.

Akizungumza kabla ya kuanza zoezi hilo, Mhe. Rais Samia amewatoa hofu Watanzania kuwa chanjo hiyo ni salama na yeye kama Rais na Amiri Jeshi Mkuu wa Majeshi ya Ulinzi na Usalama asingejitoa mwenyewe kujipeleka kwenye hatari huku akijua kuwa ana majukumu makubwa yanayomtegemea.

“ Nimekubali kwa hiyari yangu kuchanja nikijua ndani ya mwili wangu nina chanjo kadhaa ambazo nimeishi nazo kwa miaka 61 sasa, tangu tumezaliwa tumepata chanjo zisizopungua tano na hii ya sita na nyingine nilizochanja nikiwa nasafiri, hivyo sioni hatari ya chanjo hii baada ya wanasayansi kujiridhisha na zimekuja nchini na wanasayansi wetu nchini wamejiridhisha mimi niko tayari kuchanja” amesema Mhe. Rais Samia.

Mhe. Rais Samia amewaomba Watanzania kwa hiyari yao kushiriki katika zoezi hilo la  chanjo  hiyo ya UVIKO 19 ila waendelee kujihadhari na ugonjwa huo.

Aidha, Mhe. Rais Samia amesema kama hujaguswa na maradhi hayo ya UVIKO 19 au watu wako wa karibu unaweza kubeza chanjo ila walioguswa wanatamani kupata chanjo hiyo kwa haraka iwezekanavyo.

Amesema amekuwa akipokea jumbe mbalimbali za simu kutoka kwa baadhi ya Watanzania wakimuuliza jinsi ya kupata chanjo hizo ambapo amesema kwa sasa Serikali inaendelea kuratibu upatikanaji wa chanjo za kutosha ili kuwezesha wananchi wengi kupata chanjo hizo.

Kwa upande wake Waziri wa Afya, Maendeleo ya Jamii, Jinsia , Wazee na Watoto Mhe. Dkt. Dorothy Gwajima amewataka wananchi kuwapuuza wale wote wanaopotosha kuhusu chanjo hizo za UVIKO 19 na kusisitiza kuwa ni salama kwa afya baada ya  wataalam wetu nchini  kujiridhisha kabla ya kuamua kufanyika kwa zoezi hilo.

Mhe. Dkt. Gwajima amewaomba viongozi wa dini, siasa na viongozi wengine katika makundi mbalimbali na Watanzania kwa ujumla kupokea chanjo hiyo kwa kuwa ni silaha ya kisasa katika kukabiliana na UVIKO 19.

Mhe. Waziri Dkt. Gwajima amebainisha kuwa nchi ambazo zimefanya zoezi kama hili la  uchanjaji zimepata matokeo mazuri ikiwemo kupunguza maambukizi, kupunguza idadi ya wagonjwa wanaohitaji kulazwa pamoja na  kupunguza vifo vitokanavyo na UVIKO 19.

Wakati huohuo, Rais wa Jamhuri ya Muungano wa Tanzania na Amiri Jeshi Mkuu Mhe. Samia Suluhu Hassan amepokea miradi iliyofadhiliwa na kujengwa na Serikali ya Ujerumani kupitia Jeshi la nchi hiyo (GAFTAG) kwa Jeshi la Wananchi wa Tanzania (JWTZ) katika hafla iliyofanyika katika Hospitali ya Jeshi Lugalo Jijini Dar es Salaam.

Katika hafla hiyo, Mhe. Rais Samia na Amiri Jeshi Mkuu amesema miongoni mwa miradi iliyokabidhiwa leo ni Idara ya Magonjwa ya Kuambukiza (Infectious Disease Department) ambapo amesema msaada huo umekuja katika kipindi sahihi  na muda muafaka kutokana na Dunia ikiwa ni pamoja na Tanzania kukabiliwa na mlipuko wa magonjwa mengi ya kuambukiza, ikiwemo UKIMWI, Kifua Kikuu, Malaria, Ebola  pamoja na UVIKO 19.

Mhe. Rais Samia amesema ujenzi wa Idara hiyo utaongeza uwezo wa nchi wa kukabiliana na magonjwa ya kuambukiza ambapo pia inaendana na dhamira ya Serikali ya kuimarisha na kuboresha huduma za afya nchini pamoja na dhana ya utalii wa kitabibu.

Aidha, Mhe. Rais Samia amesema miradi iliyokabidhiwa ni muendelezo wa miradi mingi ambayo Serikali ya Ujerumani imefadhili nchini tangu mwaka 1961 kwenye sekta mbalimbali ikiwemo ujenzi wa Chuo cha Sayansi ya Tiba cha Jeshi (Military College of Medical Science), Hospitali ya Jeshi Kanda ya Arusha, Idara ya Dharura ya Hospitali Kuu ya Jeshi Lugalo, Ujenzi wa Mabweni ya wanafunzi katika Hospitali ya Kanda Bububu Zanzibar pamoja na ujenzi wa Karakana ya kisasa ya kutengeneza Magari ya Jeshi.

Mhe. Rais ameihakikishia Serikali ya Ujerumani kuwa Tanzania itaendelea kuenzi na kukuza zaidi uhusiano wa kirafiki na kihistoria kati ya mataifa haya mawili na kulitaka Jeshi la Wananchi wa Tanzania (JWTZ) kutunza miradi hiyo ili iendelee kutoa huduma kama ilivyokusudiwa.

Vilevile, Mhe. Rais Samia ameipongeza JWTZ kwa kazi nzuri ya kulinda mipaka ya nchi na kuiwakilisha vyema nchi kimataifa kwenye misheni mbalimbali za kulinda amani.

Hafla ya makabidhiano ya miradi mbalimbali iliyofadhiliwa na Serikali ya Ujerumani kwa Jeshi la Tanzania imehudhuriwa na Mkuu wa Majeshi ya Ulinzi Jenerali Venance Mabeyo, Mhe. Balozi wa Ujerumani nchini Bibi Regine Hess, Mkuu wa Kikundi Maalum cha Ushauri wa Kijeshi kwa Tanzania (GEFTAG)     Luteni Kanali Thomas Nalbach, Waziri wa Afya, Maendeleo ya Jamii ,Jinsia , Wazee na Watoto Mhe. Dkt. Dorothy Gwajima pamoja na viongozi mbalimbali wa Serikali.

Rais wa Jamhuri ya Muungano wa Tanzania, Mhe. Samia Suluhu Hassan leo tarehe 27 Julai, 2021 amewaapisha Mabalozi 13 katika hafla iliyofanyika katika ukumbi wa Jakaya Kikwete Ikulu Jijini Dar es Salaam.

Mabalozi walioapishwa pamoja na vituo vyao vya kazi ni Mhe. Mej. Jen. Richard Mutayoba Makanzo (Balozi wa Tanzania nchini Rwanda), Mhe.Edwin Novath Rutegaruka  ( Balozi na Mkurugenzi wa Idara ya Diplomasia ya Uchumi), Mhe. Caroline Kitana Chipeta (Balozi na Mkurugenzi wa Kitengo cha Huduma za Sheria), Mhe. Agness Richard Kayola (Balozi na Mkurugenzi Idara ya Ushirikiano wa Kikanda), Mhe. Masoud  Abdallah Balozi (Balozi na Mkurugenzi wa Idara ya mambo ya Nje, Zanzibar), Mhe. Mhe. Caesar George Waitara (Balozi na Mkurugenzi wa Idara  ya Asia na Australasia).

Mabalozi wengine walioapishwa na Mhe. Rais Samia ni Mhe. Swahiba Habibu Mndeme (Balozi na Mkurugenzi wa Ulaya na Amerika), Mhe. Maulidah Bwanakheir Hassan (Balozi Ofisi ya Rais Ikulu), Mhe. Alex Gabriel Kallua (Balozi Ofisi ya Rais Ikulu), Mhe. Saidi Juma Mshana (Balozi Ofisi ya Rais Ikulu), Mhe. Fredrick Ibrahim Kibuta (Balozi Ofisi ya Rais Ikulu). Mhe. Balozi Robert Kainunula Vedasto Kahendaguza  (atapangiwa kituo cha kazi) na Mhe. Hoyce Anderson Temu (Naibu Balozi Geneva Switzerland)

Akizungumza baada ya kuwaapisha Mabalozi hao, Mhe. Rais Samia amezungumzia masuala mbalimbali ya kitaifa ikiwemo tozo za miamala ya simu za mkononi pamoja na kupanda kwa bei ya mbolea kwa wakulima.

Kuhusu tozo za miamala, Mhe. Rais Samia ameelezea kuwa Serikali ilikuwa na nia nzuri ya kuanzisha mfuko maalumu ambao lengo lake  ilikuwa ni kuwasaidia wakulima wa vijijini katika kuboresha miundombinu ya barabara itakayowezesha kusafirisha mazao yao kwa urahisi pamoja na upatikanaji wa maji safi na salama.

Mhe. Rais Samaia amesema kwamba Serikali imesikia kilio cha wananchi kuhusu  tozo hizo za miamala na kuahidi kuwa  tarehe 29 Julai, 2021 atapokea maoni ya kamati aliyoiunda ili kuyafanyia kazi.

Aidha, Mhe. Rais Samia amezungumzia kupanda kwa bei ya mbolea ambapo amesema  hatua hiyo inatokana na kusimama kwa uzalishaji wa mbolea katika viwanda vya nje ya nchi kutokana na janga la ugonjwa wa UVIKO 19.

Mhe. Rais amewahakikishia wananchi kuwa Serikali itahakikisha mbolea inapatikana na wananchi kuendelea na shughuli za kilimo kama kawaida.

Akizungumza kuhusu Mabalozi aliowateua, Mhe.Rais Samia amewapongeza na kuwataka  Mabalozi hao kuzingatia majukumu yao ya kazi ikiwa ni pamoja na kukuza na kuimarisha uhusiano na ushirikiano kati yao na mataifa mengine pamoja na taasisi za kimataifa.

Mhe. Rais amewataka Mabalozi hao kutafuta fursa za kiuchumi kwa kutangaza vivutio  na fursa za uwekezaji zilizopo nchini, kutafuta masoko kwa ajili ya bidhaa za Tanzania na fursa za masomo na ajira kwa Watanzania nje ya nchi na kwenye taasisi za kimataifa.

Aidha, Mhe. Rais ameitaka Wizara ya Mambo ya Nje na Ushirikiano wa Afrika Mashariki na Mabalozi kuhakikisha wanalinda na kutunza rasilimali za nchi zilizopo nje ikiwa ni pamoja na majengo,viwanja, magari na vifaa vingine vilivyopo katika balozi zao .

Rais wa Jamhuri ya Muungano wa Tanzania, Mhe. Samia Suluhu Hassan, leo tarehe 27 Julai, 2021 amekutana na kufanya mazungumzo na Mkurugenzi wa Kituo cha Kudhibiti na Kuzuia Magonjwa Barani Afrika (Africa CDC) Dkt. John Nkengasong Ikulu Jijini Dar es Salaam.

Dkt. Nkengasong amempongeza Mhe. Rais Samia kwa hatua mbalimbali anazochukua katika kukabiliana na ugonjwa wa UVIKO 19 na kusema kuwa Africa CDC kinaunga mkono jitihada hizo za Serikali ya Tanzania katika mapambano dhidi ya ugonjwa huo.

Amesema Africa CDC, imedhamiria kushirikiana na nchi wanachama wa Umoja wa Afrika (AU) ikiwemo Tanzania kuweka mipango ya pamoja na kutumia fursa zinazopatikana kupitia kituo hicho katika mapambano dhidi ya ugonjwa wa UVIKO 19 ikiwa ni pamoja na upatikanaji wa chanjo na usambazaji wake.

Aidha, Dkt. Nkengasong amesema Africa CDC wameanzisha mpango wa Safari za Kuaminika (Trusted Travel) utakaowawezesha wanachama wa AU kusafiri ndani na nje ya Bara la Afrika bila vikwazo vitokanavyo na ugonjwa wa UVIKO 19.

Dkt. Nkengasong  ametaja maeneo mengine ambayo Africa CDC inaweza kushirikiana na Tanzania kuwa ni kuzijengea uwezo maabara na wataalamu ili kuimarisha upimaji na utambuzi wa aina mbalimbali za virusi (variant) vya UVIKO 19, pamoja na kusaidia masuala ya utafiti , kutoa elimu kwa umma kuhusu namna ya kujikinga na UVIKO 19 na kupokea chanjo.

Ameongeza kuwa Africa CDC kupitia Jukwaa la UVIKO 19 litaziwezesha nchi za Afrika kununua bidhaa za kukabiliana na ugonjwa wa UVIKO 19 kwa pamoja. Kupitia kikosi kazi maaalum, Africa CDC  inakusudia kufanya manunuzi ya pamoja ya chanjo zote zinazohitajika katika nchi wanachama wa Umoja wa Afrika.

Kwa upande wake Rais Samia amemshukuru Dkt. Nkengasong kwa uamuzi wake wa kuja Tanzania kwa lengo la kuunga mkono jitihada zinazofanywa na Serikali na kumjulisha kuwa tayari Tanzania ina Kamati Maalum ya kitaifa inayoratibu masuala yote yanayohusu ugonjwa wa UVIKO 19 na ipo tayari kufanya kazi na wataalamu kutoka Africa CDC katika kukabiliana na ugonjwa huo.

Mhe. Rais Samia amesema mbali na kamati hiyo, Serikali imeboresha huduma za Afya kwa kuongeza idadi ya vituo vya kutolea huduma za afya na utoaji wa elimu kwa umma kuhusu namna ya kujikinga na ugonjwa wa UVIKO 19.

Katika mazungumzo hayo Rais Samia  amesema Tanzania imejiunga na Mpango wa Covax (Covax facility)  kwa lengo la kunufaika na fursa zitokanazo na mpango huo ikiwemo upatikanaji wa chanjo.

Aidha, Mhe. Rais amesema kupitia Mpango wa Tatu wa Taifa wa miaka mitano wa Maendeleo (FYDP III), Serikali inakusudia kujenga viwanda vya kuzalisha chanjo za aina mbalimbali katika kukabiliana na magonjwa ya mlipuko.

Amesema Africa CDC ni muhimu katika kusaidia kutoa elimu kwa wanadiplomasia wetu ili kufahamu masuala ya afya na kuweza kushiriki kikamilifu katika mikutano inayohusu masuala hayo katika maeneo yao.

Mhe. Rais Samia amemhakikishia Dkt. Nkengasong kuwa Tanzania iko tayari kufanya kazi na Africa CDC haraka iwezekanavyo ili kukabiliana na ongezeko la kusambaa kwa ugonjwa wa UVIKO 19 katika nchi wanachama wa Umoja wa Afrika.

Rais wa Jamhuri ya Muungano wa Tanzania, Mhe. Samia Suluhu Hassan, ametuma salamu za rambirambi kwa familia, ndugu, jamaa na marafiki kufuatia kifo cha aliyekuwa Mkuu wa Mkoa wa Kilimanjaro Mhe. Anna Mghwira kilichotokea leo tarehe 22 Julai, 2021 katika hospitali ya Rufaa ya Mount Meru mkoani Arusha alipokuwa akipatiwa matibabu.

Mhe. Rais Samia amesema amepokea taarifa za kifo cha Mhe. Anna Mghwira kwa majonzi na masikitiko makubwa hasa akikumbuka mchango wake mkubwa alioutoa katika ujenzi wa taifa.

Amewaomba wanafamilia wote wawe na moyo wa uvumilivu katika kipindi hiki kigumu cha majonzi na amemuombea marehemu Anna Mghwira apumzike mahali pema peponi, Amina.

Rais wa Jamhuri ya Muungano wa Tanzania, Mhe. Samia Suluhu Hassan, leo tarehe 22 Julai, 2021 amekutana na kufanya mazungumzo na Waziri Mkuu Mstaafu wa Uingereza Mhe. Tony Blair, Ikulu Jijini Dar es Salaam.

Mhe.Tony Blair ambaye ni Mwenyekiti Mtendaji wa Taasisi ya Mabadiliko Ulimwenguni (Tony Blair Institute for Global Change) amemhakikishia Mhe. Rais Samia kuwa taasisi yake inaunga mkono jitahada mbalimbali anazochukua katika kuwaletea maendeleo wananchi wa Tanzania.

Amesema taasisi yake inafanya kazi katika nchi 16 Afrika ikijikita kutekeleza vipaumbele vya Serikali zao ambapo amsema katika kipindi cha mwaka mmoja na nusu taasisi yake imejikita zaidi katika masuala ya kukabiliana na janga la UVIKO 19.

Mhe. Tony Blair amesema katika kukabiliana na janga la UVIKO 19, taasisi yake inashughulika zaidi na masuala ya upimaji na usambazaji wa chanjo ambapo amesema taasisi yake inaweza kusaidia Tanzania kuwafikia wazalishaji wa chanjo hizo.

Aidha, amesema mbali na masuala ya UVIKO 19, pia wanajengea uwezo nchi washirika kufuatilia miradi ya kilimo, nishati na matumizi ya teknolojia.

Kwa upande wake Mhe. Rais Samia amemshukuru Mhe. Tony Blair kwa kumjulisha masuala yanayofanywa na taasisi yake katika kusimamia utekelezaji wa miradi ya maendeleo katika nchi washirika.

Mhe. Rais Samia amesema kwa sasa Serikali inaendelea na uboreshaji wa mazingira bora ya uwekezaji kwa sekta binafsi ili kuwezesha utekelezaji wa Mpango wa Tatu wa Maendeleo wa Miaka Mitano (FYDP III) wa Tanzania.

Kuhusu UVIKO 19, Mhe. Rais Samia amemueleza Mhe. Tony Blair kuwa tayari Serikali ina mpango wake wa Kitaifa kuhusu namna ya kushughulikia masuala yote ya UVIKO 19 ikiwemo uratibu wa chanjo.

Mhe. Rais Samia amesema katika kujijengea uwezo kwa sasa Serikali ina mpango wa kujenga viwanda vya kuzalisha chanjo za aina mbalimbali na hivyo kuomba taasisi ya Tony Blair kuunga mkono jitihada hizo.

Aidha, Mhe. Rais Samia ameikaribisha taasisi ya Tony Blair kuja nchini kufanya kazi na taasisi za Tanzania kusaidia utekelezaji wa vipaumbele vya Serikali.

Rais wa Jamhuri ya Muungano wa Tanzania, Mhe. Samia Suluhu Hassan, tarehe 17 Julai, 2021 amehutubia mkutano wa Jukwaa la Wafanyabiashara wa Tanzania na Burundi uliofanyika Jijini Bujumbura.

Mhe. Rais Samia amesema kufanyika kwa Kongamano hilo ni ishara tosha  ya kuimarika uhusiano mzuri uliopo  baina ya Tanzania na Burundi na kumuagiza Waziri wa Biashara na Uwekezaji Prof. Kitila Mkumbo kuhakikisha anashughulikia na kuondosha vikwazo vinavyokwamisha biashara kwa wafanyabiashara wa Tanzania na Burundi.

Vilevile, Mhe. Rais Samia amemtaka Waziri wa Ujenzi na Uchukuzi Dkt. Leonard Chamuriho na Mkurugenzi wa Shirika la Reli Tanzania (TRC) Masanja Kadogosa kuhakikisha wanaboresha huduma za usafiri wa reli ili kuongeza usafirshaji wa bidhaa kwa Wafanyabiashara wa Burundi ili kuongeza idadi ya mizigo inayosafirishwa kwenda nchini Burundi.

Amesema takwimu zinaonyesha kuwa Kampuni 17 za Tanzania zimewekeza nchini Burundi katika sekta ya ujenzi, fedha, afya, usafirishaji na madini huku Kampuni 18 za Burundi zikiwa zimewekeza nchini Tanzania katika sekta mbalimbali.

Mhe. Rais Samia amesema takwimu hizo zinaonyesha jinsi nchi mbili hizi zinavyofanya biashara kwa usawa ingawa jitihada zaidi zinahitajika kuwekeza katika maeneo mengi ambayo hayajafanyiwa kazi.

Aidha, Mhe. Rais amesema ni lazima kutumia kikamilifu fursa za soko lililopo katika nchi za Jumuiya ya Afrika Mashariki kwa kuzalisha bidhaa zilizoongezewa thamani.

Vilevile, ametaka kutumika kikamilifu fursa zilizopo kwenye sekta ya kilimo ili kuchochea upatikanaji wa ajira kwa vijana ambapo amesema Tanzania ina fursa nyingi ambazo wafanyabishara wa sekta binafsi wanaweza kuzitumia.

Amesema Tanzania ina takriban hekta milioni 44 za ardhi nzuri ambazo kati ya hizo hekta milioni 10 bado hazijatumiwa kikamilifu hivyo amewashauri Wafanyabiashara hao kutumia fursa ya hali ya hewa nzuri iliyopo nchini Tanzania kuwekeza katika kilimo.

Vilevile, Mhe. Rais Samia amesema Serikali ya Tanzania imeendelea kuimarisha miundombinu ya Bandari ya Dar es Salaam, Kigoma, Kalema, Kasanga na Kabwe katika kurahisisha usafiri wa watu na bidhaa na kuwaomba wafanyabiashara nchini Burundi kuendelea kutumia Bandari za Tanzania kikamilifu.

Eneo jingine ambalo Burundi inaweza kulitumia ni huduma ya afya ambayo Tanzania imewekeza kwa kiwango kikubwa kwa kuwa na wataalam mahiri na vifaa vya kisasa, hususan vya matibabu ya moyo katika Taasisi ya Moyo ya Jakaya Kikwete iliyopo Jijini Dar es Salaam, hivyo amewaomba wananchi wa Burundi kuja Tanzania kupata huduma hizo.

Wakati huohuo, Mhe. Rais Samia amekutakana na kufanya mazungumzo na Jumuiya ya Watanzania wanaoishi nchini Burundi (JUTABU) ambapo amewashukuru kwa mapokezi mazuri tangu alipowasili nchini humo.

Mhe. Rais ameipongeza Jumuiya hiyo kwa kushiriki katika shughuli mbalimbali za kijamii nchini Burundi na nchini Tanzania, ambapo JUTABU ilitoa mchango wa madawati  na kusaidia wahanga wa tetemeko la ardhi mwaka 2016 na pia wakati wa kuzama kwa Meli ya Mv. Nyerere mwaka 2018.

Mhe. Rais Samia amewaeleza Watanzania hao wanaoishi nchini Burundi kuwa hali ni shwari nchini Tanzania na wananchi wanaendelea na shughuli zao kama kawaida.

Amesema raia wanaoishi nje ya nchi kwa jina maarufu Diaspora ni kundi muhimu kutokana na mchango wao kwa nchi zao kama walivyo wao wanaoishi nchini Burundi. Inakadiriwa kuwa, Watanzania wapatao milioni moja wanaishi katika nchi mbalimbali duniani.

Mhe. Rais Samia amesema kwa mujibu wa Benki Kuu ya Tanzania, Diaspora wa Tanzania mwaka  2018 walituma nchini kiasi cha Dola za Marekani milioni 475.65, kutokana na umuhimu wao huo ndio maana Serikali imekuwa ikichukua hatua mbalimbali za kulinda na kutetea maslahi ya Watanzania waishio nje ikiwa ni pamoja na kuanzisha Kitengo cha Diaspora katika Wizara ya Mambo ya Nje.

Aidha, Mhe. Rais ametoa wito kwa Watanzania wote wanaoishi nje ya nchi kujiandikisha kwenye Balozi za Tanzania katika mataifa wanayoishi ili iwe rahisi kwa Serikali kuwahudumia pamoja na kunufaika na fursa zinazopatikana nyumbani, pia amewataka Watanzania wanaoishi nje ya nchi kujiepusha na vitendo vya uhalifu kwani vinachafua jina la Tanzania.

Mhe. Rais Samia amemaliza ziara ya siku mbili nchini Burundi na kurejea nchini Tanzania.  

Rais wa Jamhuri ya Muungano wa Tanzania, Mhe. Samia Suluhu Hassan,  tarehe 16 Julai, 2021 amehudhuria Dhifa ya Kitaifa iliyoandaliwa na mwenyeji wake Rais wa Jamhuri ya Burundi Mhe. Rais Evariste Ndayishimiye Ikulu Jijini Bujumbura.

Akizungumza wakati wa Dhifa hiyo Mhe. Rais Samia amempongeza Mhe. Rais Ndayishimiye kwa kazi kubwa anayoifanya tangu ashike madaraka ya kuiongoza nchi hiyo

Mhe. Rais Samia amesema Mhe. Rais Ndayishimiye katika kipindi kifupi cha utawala wake ameongoza mapambano dhidi ya rushwa, ameanzisha mageuzi ya kiuchumi na kijamii, ameimarisha amani na usalama na kuimarisha uhusiano na nchi mbalimbali pamoja na taasisi za kimataifa.

Kufuatia jitihada hizo, Mhe. Rais Samia amezitaka nchi na taasisi za kimataifa ambazo bado hazijaondoa vikwazo kwa Burundi kufanya hivyo ili nchi hiyo iweze kupiga hatua zaidi  kimaendeleo.

Aidha, Mhe. Rais Samia ameahidi kuendeleza uhusiano na ushirikiano wa muda mrefu baina ya Tanzania na Burundi ambapo viongozi hao wamekubaliana kuondoa vikwazo ili kuongeza biashara na uwekezaji katika mataifa yao.

Katika kukuza biashara na uwekezaji, viongozi hao wamekubaliana kukamilisha ujenzi wa Kituo cha Huduma za Pamoja kwenye mpaka katika eneo la Manyovu na Mugina. Pia wamekubaliana kushirikiana kwenye ujenzi wa barabara, ikiwemo Barabara ya Nyakanazi – Kasulu – Manyovu /Rumoge – Gitaza pamoja na Reli ya Uvinza – Msongati – Gitega.

Kwa upande wake Mhe. Rais Ndayishimiye amempa pole Mhe. Rais Samia na Watanzania kwa ujumla kwa hasara kubwa waliyoipata kufuatia kuungua kwa Soko la Kariakoo Jijini Dar es Salaam, ambapo amesema hasara hiyo si kwa Wafanyabiashara wa Tanzania pekee bali hata Warundi kwani Soko hilo si kwamba linahudumia Tanzania pekee bali nchi nyingi za Afrika Mashariki ikiwemo Burundi.

Mhe. Rais Ndayishimiye amemshukuru Rais Samia kwa kufanya ziara nchini Burundi na kusema kuwa ziara hiyo imedhihirisha uhusiano na ushirikiano wa kweli uliopo kati ya Tanzania na Burundi.  

Rais wa Jamhuri ya Muungano wa Tanzania, Mhe. Samia Suluhu Hassan,  tarehe 16 Julai, 2021 ameanza rasmi ziara ya Kitaifa ya siku mbili Nchini Burundi kwa mwaliko wa Rais Mhe. Evariste Ndayishimiye.

Katika uwanja wa ndege wa Kimataifa wa Mechior Ndadaye Jijini Bujumbura, Mhe. Rais Samia amepokelewa na Makamu wa Rais wa Burundi Mhe. Prosper Bazombanza.

Mhe. Rais Samia amefanya mazungumzo rasmi na mwenyeji wake Rais wa Jamhuri ya Burundi, Mhe. Rais Evariste Ndayishimiye yaliyolenga kukuza zaidi uhusiano kati ya mataifa haya mawili hususan katika kukuza biashara na uwekezaji.

Amesema biashara kati ya Tanzania na Burundi imeongezeka kutoka shilingi bilioni 83.9 mwaka 2015 hadi kufikia shilingi bilioni 200.1 mwaka 2019, ambapo uwekezaji kutoka Burundi ni miradi 18 yenye thamani ya Dola za Marekani milioni 209.42 iliyotoa ajira zipatazo 3,544 ukiwemo mradi mkubwa wa kiwanda cha mbolea kinachojengwa na kampuni ya ITRACOM wenye thamani ya Dola za Marekani milioni 180. 

Kwa upande wa Tanzania, Mhe. Rais Samia amesema kampuni nyingi zimewekeza Nchini Burundi zikiwemo kampuni ya Azam, Azania Group, Interpetrol, Ndaki Contractors, Tanzania Bile Acid na Benki ya CRDB.

“ hivyo basi, tumekubaliana kuendelea kushirikiana kuboresha mazingira ya biashara na uwekezaji kwenye nchi zetu kwa kuondoa vikwazo vya kodi na visivyo vya kodi, ikiwemo kuharakisha ujenzi wa Kituo cha Pamoja cha Huduma za Mpakani kwenye Mpaka wetu wa Manyovu/Mugina.” amesema Rais Samia.

Vilevile, Mhe. Rais Samia na Rais Ndayishimiye  wameshuhudia utiaji saini wa hati 8 za makubaliano kuhusu ufundishaji wa lugha ya Kiswahili nchini Burundi na Kifaransa nchini Tanzania, masuala ya afya, Nishati, Kubadilishana Wafungwa, Madini, Kilimo, Sekta ya Uvuvi na masuala ya Siasa na Dipolasia.

Aidha, Mhe. Rais Samia amewaomba wafanyabishara wa Madini Nchini Burundi kuleta madini yao nchini Tanzania ili kuongezwa thamani katika kiwanda kinachojengwa Kahama badala ya kuuza madini hayo yakiwa ghafi pia kuuza madini yao katika masoko ya Tanzania.  

Mhe. Rais Samia ametembelea Benki ya CRDB iliyopo Jijini Bunjumbura na kuzungumza na wafanyakazi wa benki hiyo ambapo amewataka kuendelea kuchapa kazi zaidi mbali na mafanikio wanayoyapata.

Pia Mhe. Rais ametembelea kiwanda cha kuzalisha Mbolea Asili cha Fertilizer Organo Mineral Industries (FOMI),na kumshukuru Mhe. Rais Ndayishimiye kwa mapokezi makubwa tangu alipoingia katika uwanja wa ndege wa kimataifa wa Mechior Ndadaye na katika maeneo mbalimbali aliyotembelea.

Mhe. Rais Samia kesho ataendelea na ziara yake nchini Burundi ambapo atakutana na Jumuiya ya Watanzania wanaoishi nchini hapa na kuzungumza na Jukwaa la Wafanyabiashara wa Burundi na Tanzania.

Rais wa Jamhuri ya Muungano wa Tanzania, Mhe. Samia Suluhu Hassan,  tarehe 16 Julai, 2021 anatarajia kuanza ziara ya Kitaifa ya siku mbili nchini Burundi kwa mwaliko wa Rais Mhe. Evariste Ndayishimiye.

Akiwa nchini humo, Mhe. Rais Samia atafanya mazungumzo rasmi na mwenyeji wake Rais wa Jamhuri ya Burundi, Mhe. Rais Evariste Ndayishimiye, kisha atashuhudia utiaji saini wa hati za makubaliano na kuzungumza na vyombo vya habari.

Aidha, Mhe. Rais Samia atahudhuria na kuhutubia mkutano wa jukwaa la Wafanyabishara wa Burundi na Tanzania kwa lengo la kujadili masuala mbalimbali yanayohusu fursa za biashara na uwekezaji zilizopo nchini Tanzania na Burundi.

Rais wa Jamhuri ya Muungano wa Tanzania, Mhe. Samia Suluhu Hassan, tarehe 15 Julai, 2021 amekutana na kufanya mazungumzo na Mjumbe Maalum wa Mfalme wa Umoja wa  Falme za Kiarabu (U.A.E) Sheikh Shakhboot Bin Nahyan Al Nahyan Ikulu Jijini Dar es Salaam.

Sheikh Al Nahyan amemshukuru Mhe. Rais Samia kwa kuendeleza ushirikiano na Nchi za Falme za Kiarabu na kumkabidhi barua yenye ujumbe maalum kutoka kwa Mfalme wa U.A.E  Sheikh Mohamed Bin Zayed Al Nahyan ambapo pia mfalme huyo ametoa salamu za pole kwa Mhe. Rais Samia kufuatia kifo cha Hayati Rais Magufuli na kumpongeza kwa kushika nafasi ya uongozi wa nchi.

Amesema U.A.E itaendeleza ushirikiano na uhusiano na Tanzania katika nyanja mbalimbali ikiwa ni pamoja na kuunga mkono usawa wa kijinsia na haki za wanawake hasa wakizingatia kuwa Mhe. Rais Samia ni mfano bora kwa wanawake nchini Tanzania na dunia kwa ujumla.

Aidha, Sheikh Nahyan amesema U.A.E inaunga mkono jitihada za Mhe. Rais Samia za kupambana na ugonjwa wa UVIKO 19 ambapo amesema Umoja wa Falme za Kiarabu upo tayari kuipatia Tanzania chanjo ya ugonjwa huo.

Kwa upande wake Mhe. Rais Samia ameshukuru Umoja wa Falme za Kiarabu (U.A.E) kwa kuendeleza ushirikiano na Tanzania na kumuahidi Mjumbe huyo Maalum kuwa Serikali itaendeleza mahusiano mazuri kwa ajili ya  manufaa ya nchi hizi mbili.

Mhe. Rais Samia amesema U.A.E ni mbia muhimu katika maendeleo ya Tanzania kwasababu wamesaidia kuboresha miundombinu hususan ya barabara  na biashara.

Aidha, Mhe. Rais Samia  amesema kumekuwa na ongezeko la usawa wa kibiashara kati ya nchi hizi mbili mwaka hadi mwaka na kuongeza kuwa Tanzania inaendelea kufanya maboresho ya kibiashara ili kuvutia zaidi wawekezaji.

Pia Mhe. Rais ameshukuru kupokea mualiko wa kuhudhuria maonesho ya biashara ya kimataifa ya Dubai (Dubai Expo) yanayotarajiwa kufanyika mwezi Machi, 2022.

Rais wa Jamhuri ya Muungano wa Tanzania, Mhe. Samia Suluhu Hassan, leo tarehe 12 Julai, 2021 amezungumza kwa njia ya mtandao na Rais wa Baraza la Umoja wa Ulaya Mhe. Charles Michel.

Mazungumzo hayo yamefanyika Ikulu Jijini Dodoma ambapo viongozi hao wawili wamezungumzia masuala yanayohusu uhusiano kati ya Tanzania na Umoja huo.

Mhe. Michel amempongeza Mhe. Rais Samia kwa hatua mbalimbali anazochukua tangu kushika hatamu ya uongozi na kumhakikishia kuwa Umoja wa Ulaya (EU) utaendelea kuwa mshirika muhimu na wa kimkakati wa maendeleo nchini Tanzania na kikanda.

Aidha, Mhe. Michel amempongeza pia kwa jitihada anazochukua kupambana na ugonjwa wa Corona. Vilevile amemueleza kuwa EU tayari inashirikiana na viwanda mbalimbali  vinavyozalisha chanjo barani Afrika kwa kuvijengea uwezo na kuongeza kuwa iwapo Tanzania itahitaji msaada huo EU iko tayari kuisaidia.

Kwa upande wake Mhe. Rais Samia ameshukuru Umoja wa Ulaya (EU) kwa ushirikiano katika masuala ya maendeleo ya jamii na kuwekeza katika miradi ya miundombinu kupitia Benki ya Uwekezaji ya EU. Mhe. Rais Samia amesema kuwa Benki hiyo imetoa Euro milioni 50 kwa ajili ya ujenzi na ukarabati wa baadhi ya viwanja vya ndege vya mikoani.

Amesema katika kipindi cha miezi mitatu iliyopita Tanzania na Umoja wa Ulaya zimesaini makubaliano ya msaada wa Euro milioni 111.5 kwa ajili ya kuboresha miradi ya sekta ya nishati hususani  matumizi ya majiko banifu, uongezaji thamani  mazao ya nyuki, kuboresha mazingira ya biashara na kuimarisha usalama wa chakula.

Mhe. Rais Samia amesema kwa sasa Serikali inaendelea na uboreshaji wa mazingira bora ya uwekezaji kwa sekta binafsi ili kuwezesha utekelezaji wa Mpango wa Tatu wa Maendeleo wa Miaka Mitano (FYDP III) wa Tanzania.

Aidha, Mhe. Rais Samia amemhakikishia Mhe. Michel kuwa utawala wake utasimamia na kuimarisha  demokrasia, utawala bora na haki za msingi za binadamu.

Kuhusu mapambano dhidi  ya ugonjwa wa Corona, Mhe. Rais Samia amemtaarifu Rais huyo wa Baraza la Umoja wa Ulaya (EU) Mhe. Michel kuwa Tanzania tayari imeshajiunga na Mpango wa Kimataifa wa ugawaji wa chanjo kwa nchi masikini (COVAX facility) na ina Mpango wake wa taifa wa kupambana na Corona unaoainisha mahitaji ya nchi hivyo itawasilisha mahitaji yake kwa EU  ili kupata msaada.

Mhe. Rais ameshukuru kupokea mualiko wa kutembelea Umoja wa Ulaya na kumtumia salamu Rais wa Umoja huo Mhe. Bi Ursula von der Leyen.

Rais wa Jamhuri ya Muungano wa Tanzania, Mhe. Samia Suluhu Hassan, tarehe 11 Julai, 2021 ametoa pole kwa Mkuu wa Mkoa wa Dar es Salaam Mhe. Amos Makalla na Wafanyabiashara wa Soko Kuu la Kariakoo kufuatia hasara kubwa waliyoipata kutokana na kuungua moto kwa Soko Kuu la Kariakoo lililopo Jijini Dar es Salaam.

Kufuatia hasara kubwa iliyotokana na kuungua kwa Soko hilo usiku wa Julai 10, 2021, Mhe. Rais Samia ameviagiza vyombo vya Ulinzi na Usalama kufanya uchunguzi wa kina kujua chanzo cha moto huo.

Amesema Soko kuu la Kariakoo ni soko kubwa Jijini Dar es salaam ambalo lina mkusanyiko mkubwa wa wafanyabiashara na kuteketea kwa soko hilo kutakuwa kumesababisha hasara kubwa kwa wapangaji na wamiliki wa soko hilo kongwe nchini.

Mhe. Rais Samia amesema Soko la Kariakoo licha ya kuajiri wafanyabiashara wengi lakini ni kitovu cha biashara kwa nchi za Afrika Mashariki hivyo tukio hilo si hasara kwa Wafanyabiashara tu bali hata kwa Serikali.

Wakati huohuo, Mhe. Rais Samia ametoa pole kwa Mkuu wa Mkoa wa Morogoro Mhe. Martin Shigella na Jumuiya za Kiislaam Tanzania kufuatia kuungua moto kwa Bweni la Shule ya Sekondari ya Kiislam ya Wasichana AT TOWN inayomilikiwa na Taasisi ya Kiislam iliyopo mji Mpya katika Manispaa ya Morogoro.

Mhe. Rais Samia amsema kumekuwa na matukio ya mara kwa mara ya kuungua moto kwa shule zinazomilikiwa na Jumuiya za Dini nchini hivyo ameviagiza vyombo vya Ulinzi na Usalama kwa kushirikiana na Jumuiya hizo kutafuta vyanzo vya matukio hayo na kuyadhibiti ili matukio ya kuungua moto kwa shule hizo yasijirudie.

Rais wa Jamhuri ya Muungano wa Tanzania, Mhe. Samia Suluhu Hassan, leo tarehe 09 Julai, 2021 amekutana na kufanya mazungumzo na Naibu Mkurugenzi Mtendaji wa Shirika la Mazingira la Umoja wa Mataifa UNEP Bi. Joyce Msuya Ikulu Jijini Dodoma.

Bi. Msuya amesema UNEP kwa kushirikiana na Umoja wa Mataifa (UN) wako tayari kuunga mkono jitihada mbalimbali zinazofanywa na Serikali ya Tanzania katika maendeleo na mipango yake ya kutunza na kuhifadhi mazingira.

Pia Naibu Mkurugenzi huyo wa UNEP ametoa salamu za pongezi kutoka kwa Katibu Mkuu wa Umoja wa Mataifa Mhe. António Guterres na Naibu Katibu Mkuu Balozi Amina Mohammed kwa Mhe. Rais Samia kwa uongozi wake mahiri tangu ashike nafasi ya Urais nchini Tanzania.

Aidha, Bi Msuya amempongeza Mhe. Rais Samia kwa jitihada zake anazochukua kukabiliana na ugonjwa wa Corona ambapo amesema Umoja wa mataifa uko tayari kuunga mkono jitihada hizo.

Mwakilishi Mkazi wa Shirika la Maendeleo la Umoja wa Mataifa (UNDP) Bi. Christine Musisi amesema kupitia mpango mkakati wa miaka mitano wanaouandaa utazingatia mpango wa maendeleo wa tatu wa miaka mitano (FYDP III) wa Tanzania.

Kwa upande wake Mhe. Rais Samia ameshukuru na kuahidi kuendelea kushirikiana na UNEP katika mipango thabiti ya utunzaji na uhifadhi wa mazingira nchini.

Mhe. Samia amewataka UN kuhakikisha kuwa mpango wao wa miaka mitano wanaouandaa uwe endelevu na wenye kuleta tija katika kukabiliana na mabadiliko ya tabia nchi.

Pia, Mhe. Samia amesema Serikali inaendelea na jitihada mbalimbali za kukabiliana na uharibifu wa mazingira ikiwa ni pamoja na kuwawekea mazingira bora wananchi katika shughuli zao za maendeleo ili wasizidi kuharibu mazingira.

Mhe. Rais amewaomba UNEP kwa kushirikiana na UN kuendeleza jitihada za Serikali kwa kuwapatia rasilimali fedha na rasilimali watu ili azma ya kutunza mazingira ifanikiwe kikamilifu.

Rais wa Jamhuri ya Muungano wa Tanzania, Mhe. Samia Suluhu Hassan, tarehe 08 Julai, 2021 amefungua Mkutano Mkuu wa 31 wa Jumuiya ya Kikristo Tanzania (CCT) uliofanyika katika Kituo cha Mafunzo ya Wanawake(CCT) mkoani Morogoro.

Mhe. Rais Samia amesema viongozi na taasisi za kidini zina nafasi kubwa kwenye jamii na taifa kwa ujumla kutokana na mchango wao wa kutoa huduma za kiroho na kimaadili, hivyo amewaomba viongozi hao kusaidia kuimarisha amani na utulivu nchini.

Pia, Mhe. Rais Samia amewaomba viongozi wa dini kuwahimiza wananchi kuheshimu sheria na taratibu za nchi na kuwaomba kuwakemea watu wanaovunja sheria kwa makusudi na kuhatarisha amani ya nchi.

Mhe. Rais Samia amesema taifa linatarajia kufanya Sensa ya Watu na Makazi mwezi Agosti 2022 hivyo kuwasihi viongozi wa dini kuwahimiza wananchi kushiriki kwenye zoezi hilo muhimu la kitaifa.

Kuhusu suala la kodi kwa Taasisi za kidini zinazotoa huduma za afya na elimu, Mhe. Rais Samia amesema Serikali inalazimika kuzitoza kodi taasisi hizo kwasababu baadhi ya taasisi hizo zinamazingira ya kufanya kazi kibiashara na sio kutoa huduma.

Rais Samia amebainisha kuwa Serikali imeanza kufanya mapitio ya kodi na kufuta baadhi ya kodi ambapo kupitia sheri ya Fedha ya mwaka 2021/ 22 Serikali imefuta tozo ya elimu na mafunzo ya ufundi stadi iliyokuwa ikilalamikiwa muda mrefu.

Aidha, Mhe. Rais amewaomba viongozi wa dini kuwakumbusha wananchi kuendelea kujikinga dhidi ya ugonjwa wa Corona ili kuepuka maambukizi ya ugonjwa huo.

Kwa upande wake Mwenyekiti wa Jumuiya ya Kikristo Tanzania (CCT) Askofu Dkt. Alinikisya Cheyo amempongeza Mhe. Rais Samia kwa kudumisha amani ,utulivu , umoja wa kitaifa na kusimamia misingi ya utawala bora, haki za binadamu na kuimarisha uchumi wa nchi.

Askofu Dkt. Cheyo pia amempongeza Mhe. Rais Samia kwa kuimarisha mahusiano ya kidemokrasia na nchi mbalimbali pamoja na mashirika ya kimataifa kwa kuwa ni muhimu kwa amani na ustawi wa taifa lolote duniani.

Wakati huohuo, Mhe. Rais Samia akiwa njiani kurejea Jijini Dodoma amepata fursa ya kuzungumza masuala mbalimbali ya kimaendeleo na wananchi wa Dumila na Gairo mkoani Morogoro.

Akiwa katika maeneo hayo ya Dumila na Gairo mkoani Morogoro, Mhe. Rais Samia amezungumzia hatua mbalimbali zinazochukuliwa na Serikali katika kuboresha miundombinu ya barabara za vijijini.

Rais Mhe. Samia amesema Serikali imeongeza shilingi 100 katika kila lita ya mafuta(Petroli na Diseli) nchini ili fedha hizo zichangie uboreshaji wa miundombinu ya barabara za vijijini.

Aidha, Mhe. Rais amewahakikishia wakazi wa wilaya za Kilosa na Gairo mkoani Morogoro kuwa Serikali inafanyia kazi changamoto mbalimbali zinazowakabili ikiwa ni pamoja na afya, elimu, maji na barabara.

Mhe. Rais Samia amemaliza ziara yake ya kikazi ya siku mbili mkoani Morogoro na kurejea Jijini Dodoma.

Rais wa Jamhuri ya Muungano wa Tanzania, Mhe. Samia Suluhu Hassan, leo tarehe 07 Julai, 2021 ameanza ziara ya kikazi ya siku mbili mkoani Mororogo.

Akiwa katika eneo la Kibaigwa Mkoani Dodoma njiani kuelekea mkoani Morogoro, Mhe. Rais Samia amewataka wananchi wa eneo hilo na Watanzania kwa ujumla kuchukua tahadhari dhidi ya ugonjwa wa Corona kwa kufuata maelekezo ya wataalam wa Afya ili kuepuka kupata maambuzi ya ugonjwa huo.

Mhe. Rais Samia amesema baadhi ya maeneo nchini tayari yana wagonjwa wa Corona hivyo ni vyema wananchi wakafuata maelekezo ya wataalam wa Afya ikiwa ni pamoja na kuvaa barakoa ili waweze kujikinga na maambukizi ya ugonjwa huo.

Katika eneo la Msamvu mkoani Morogoro, Mhe. Rais Samia amewasihi wakazi wa mkoa huo pamoja na wananchi wengine kuendelea kuitunza amani iliyopo nchini kwasababu ndio msingi mkuu wa maendeleo ya taifa lolote duniani.

“Kuna baadhi ya watu wameshaanza chokochoko naomba muwapuuze kwani hawawatakii mema, wanataka kuvunja amani ya nchi iliyopo kwa muda mrefu na kusababisha vurugu nchini” . amesema Mhe. Rais Samia.

Pia Mhe. Rais Samia amewapongeza wakazi wa mkoa wa Morogoro kwa kuwa sehemu ya miradi mikubwa miwili ya kimkakati ya Reli ya Kisasa (SGR) na Mradi wa Kufua Umeme wa Mwalimu Nyerere katika mto Rufiji.

Amesema kutokana na kuwepo kwa miradi hiyo mkoani Morogoro ni vyema wananchi wakawa walinzi ili iweze kuwanufaisha wao na taifa kwa ujumla.

Aidha, Mhe. Rais Samia amewahakikishia wakazi wa mkoa wa Morogoro kuwa changamoto mbalimbali zinazowakabili zikiwemo uhaba wa maji, migogoro ya ardhi, masuala ya afya na mengineyo kuwa serikali tayari imeshazifanyia kazi.

Kesho tarehe 8 Julai, 2021 Mhe. Rais Samia ataendelea na ziara yake mkoani Morogoro ambapo atashiriki Mkutano Mkuu wa Jumuiya ya Kikristo Tanzania (CCT).

Rais wa Jamhuri ya Muungano wa Tanzania, Mhe. Samia Suluhu Hassan, leo tarehe 07 Julai, 2021 amekutana na kuzungumza na Afisa Mtendaji Mkuu wa Makampuni ya Barrick Gold Bw. Mark Bristow Ikulu Jijini Dodoma na kuzungumzia masuala mbalimbali yanayohusu utendaji kazi wa kampuni hiyo na kampuni ya Twiga.

Bw. Bristow amemhakikishia Mhe. Samia kuwa Barrick itaendelea kushirikiana na Serikali katika Uwekezaji wa Sekta ya Madini nchini na wako tayari kuendelea kuwekeza katika maeneo mengine. Amesema wanaendelea vizuri na mfumo wa utekelezaji wa makubaliano baina yao na Serikali katika kuhakikisha pande zote mbili zinanufaika na rasilimali ya madini nchini.

Aidha, Bw. Bristow amesema kwa sasa Barrick imeajiri Watanzania wengi ikiwa ni pamoja na uongozi wa juu kama Mkurugenzi Mtendaji, Meneja Mkazi na Mkuu wa mahesabu kuwa ni Watanzania.

Ameongeza kuwa Barrick imefanya maboresho ya usimamizi wa mazingira katika Mgodi wa North Mara ikiwa ni pamoja na kuboresha mfumo wa kuhifadhi na kutibu maji yanayotokana na uzalishaji wa madini katika mgodi huo.

Ameongeza kuwa kwa sasa Barrick imeongeza ushiriki wa Watanzania katika kutoa huduma mbalimbali katika migodi yao ambapo takriban asilimia 70 ya manunuzi hutoka kwa Watanzania.

Kwa upande wake Mhe. Samia amemhakikishia Muwekezaji huyo kuwa Serikali yake itaendelea kushirikiana nao kwa kutekeleza yale yote waliyokubaliana kwa lengo la kuhakikisha rasilimali ya madini inanufaisha pande zote mbili kwa manufaa ya Taifa.

Aidha, Mhe. Samia amemshukuru Bw. Bristow kwa utayari wake wa kushirikiana na Serikali katika kukabiliana na ugonjwa wa Corona nchini.